SAM 48 - Khumi Common Language Bible

Tameuh i mary pui Zion

¹ Areng ly nang parai keh nai ne iy, chai parai nai mawi pui napi nai achi i Tameuh i mary puira y, khri pa-rei palo ai ataing nai ne.

² Tameuh i mawi pui napi nai Zion mawi ly asang iy, apu parai nai ne; nang parai nai samrang i mary pui ly khaileaung pri khumichi ai amo theu hai bo.

³ Huni mary pui i amtangrachi theung i mymy teng y chymme naira awm, nanai Tameuh my patei pi bo.

⁴ Samrangchi ly akachu u iy, Zion mawi y tiu ai nai tavai amsa u bo.

⁵ Huni mawi ai niu nai khala nichi ly lyh parai nai y jei u i, angpreng u pawn bo.

⁶ Nichi ly deaungdi tapen ai nai neng kasa nai neampachy kamta py, khri pa-rei aho nai ali kamchai avum nai deaungkho y,

⁷ liliu nanai sampho puichi kamta py, jei hyn u bo.

⁸ Mymy sa nai leaungsaichi achi thai vai bo; huna nai thai u vai nai kamta, ati cheaungkhang sa thai nai keung napi nai Tameuh i mary puira y, vai achi niu u bo. Mymy ly huni mary pui ai deungtasarei chymme ai nai khai ai.

⁹ Aw Tameuh, nang i Achura yhm theung y kaichi ly nang i khaw parai nai tamen nai satang ka-dawn u bo.

¹⁰ Meingtym tleirei y khumi bawibawichi ly nang ai palo u; nang i satang ly khaileaung pri verei y amthang nai ne. Nang ly leu meitang naimy peang bo.

¹¹ Zion mary i khumichi ly amo theu u sy! Mymy ly leu meitang naimy tara chih bo; Juda pri mary kalenchira y amo theu naira awm sy!

¹² Tameuh i khumichi awi, Zion mawi ai taki iy, amtangra yhmchi ai kati u.

¹³ Huni mary i apaichi ai ma-kheng iy, amtangrachi ai py khen u.

¹⁴ Huna nai khala nangchi ly “Hini Tameuh ly deungtasa khrairei achi i Tameuh ne; mymy ly achi ai deungtasarei ang pahawi ai,” nanai mo mang i deung kangthauchi teng y thui pi pajau ai.