SAM 46 - Khumi Common Language Bible

Tameuh ly achi hawi vanrei awm

¹ Tameuh ly achi i abyhra, achi i atho ne; patang naira avum nai khala y, achi ai sabawm ai nai angveirym jojo.

² Hunai deaungkho y khaileaung ahyn naimy mawichi ly suida pangli theung y tla teu i py,

³ pangli tui sampyh theu i, tyn amsau nai deaungkho y, mawichi ahyn teu i py, achi ly jei hyn ai ny y.

⁴ Tameuh i mary pui napi nai tahm asang parai nai Tameuh i yhm y amo theu hai nai tavo awm.

⁵ Huni mary pui ly Tameuh i awm naira ne nai deaungkho y, mana khala py phra pajau y; khutawi mo neng khala mymy ly ang jeu iy, huni mary y sabawm ai.

⁶ Khumi cheng cheaungkhangchi ly jei hyn u ai; Tameuh my leu pei nai khala y khaileaung ly tlawn vui nai ne.

⁷ Ati cheaungkhang sa thai nai Areng ly achi hawi vanrei awm; Jakob i Tameuh ly achi i abyhra ne.

⁸ Jeu u, Areng i sa pi nai saichi ai khen u; khaileaung pri y sa pi nai, lyh ai hawi parai naichi khen u.

⁹ Mymy ly khaileaung pri verei y atiu naichi ai anawn hai bo; thailihochi ai khei vui iy, tivichi tameang pawn iy, khopuichi ai py mai y veang pawn bo.

¹⁰ Mymy ly “Atiu naichi anawn u; kai ly khumi cheng cheaungkhangchi theung y py, khaileaung pri verei y Tameuh nang parai nai ne, nanai pany u,” nanai leu pei bo.

¹¹ Ati cheaungkhang sa thai nai Areng ly achi hawi vanrei awm; Jakob i Tameuh ly achi i abyhra ne.