SAM 4 - Khumi Common Language Bible

Kasabawmra nga ai nai dym mang chiu sa nai

¹ Aw Tameuh, kai ai ama hai nai keung! kai i palau nai khala y pathang pi kyh ba. Kai patang nai thym khala y sabawm ba. Vai py kai ai pahen iy kai i chiu sa nai tangai pi kyh ba.

² Khumichi awi, nangchi ly kai ai mana tanrei mei angai u y ai mo? Nangchi ly ati sai py ny y nai ai manatanrei ngai u iy, teng y nai mang y abang u ai a?

³ Areng ly mymy i vui molam y khumi kahawi ai vawi takhra nai ly pany u ba. Kai palau nai khala y mymy ly tangai pi bo.

⁴ Nangchi ly jei hyn naimy kamngo so y ai nai amkyn u; nangchi ly ira salo y nangmychi tlairei dawn amcheng iy, hini ai ka-dawn thiu parai naimy dawn patyp u.

⁵ Areng teng y avo nai kapathypra talam iy mymy teng y ym naimy abyh u.

⁶ “Aw Areng, amtheaung naira pei panawi bi kyh ba. Kaichi i tlang tleaung y pahen nai paleung hawi khen ba,” nanai khumi neangneangchi my chiu sa u bo.

⁷ Na i py kai teng y nang i pei nai amo theu naira ly choh hawi kreip hang nang naichi i amo theu nai tleaung y typ keh.

⁸ Kai ly aseaung nai khala y awmnem naimy i nem bo; aw Areng, nang naini kai ai chymme naimy awm ai nai pei nai ne.