SAM 38 - Khumi Common Language Bible

No patang nai khumi leaungrei i chiu sa nai

¹ Aw Areng, kado theu iy kai ai kamngo pajeng moh kyh ba!

² Nang ly kai ai thailiho hawi ko iy tamo nga hai bo. Nang i kiu my nui i, kai ai atlym hai bo.

³ Nang i kado theu nai molam y kai ly no patang naira avum nai ne. Kaimy i kamngo nai molam y tlang verei no-na man bo.

⁴ Kamngo tui my um naira y kai ly anum nai ne. Hunichi ly khri pa-rei ji nai kamngo mynji ne i, kai ly pho pajau y na bo.

⁵ Kaimy i akhum nai molam y nga nai tamochi ly kaveaung mui na bo.

⁶ Kai ly khri pa-rei patang naira avum i, tahm anem naimy awm bo. Kani khengrei paleung si naimy kavo nai ne.

⁷ Kai ly keaung kabi len nai deaungkho y, dei vi na bo.

⁸ Kai ly paleung ka-dawn akawm i, atho bai nai khikhe na bo. Kai ly paleung akawm naimy no patang nai y, tangam nai ne,

⁹ Aw Areng, nang ly kai i kangai pany pi. Kai i tangam nai raawi thai bo.

¹⁰ Kai i paleung ly ahyn thlyh thlyh na; kai teng y atho by y leang bo. Kai i mei py angvang y bo.

¹¹ Kai i tamo angvawichi molam y ahawichi hawi yhm deaungpachi ly kai i sahawi y ahai u y. Kaimy i yhm dengtheungchi malawn py, kai teng y jeu u y na bo.

¹² Kai ai padei ai ngai naichi ly deaungchi pateung u bo. Kai ai patang hai ai ngai naichi ly ang pajei u nai ne. Nichi ly kai ai padei ai nai avawrei patym u bo.

¹³ Kai ly kano pang nai khumi kamta, kano thai y. Leu kawp y nai khumi kamta, leu katheu thai y bo.

¹⁴ Kai ly kano pang nai deaungkho y, leu katheu kawp y nai khumi kamta lawm bo.

¹⁵ Na i py aw Areng, kai ly nang ai kang-ym nai ne. Hunai deaungkho y kai i Areng Tameuh, nang ly kai i hnei takeng nai pathang pi ai.

¹⁶ Kai i patang nai molam y paleung ka-echi ai paleung ateng hai ai nai pei moh. Nichi ai kai i atlym nai molam y amlyh ai nai pei pi moh.

¹⁷ Kai ly atlym vi na bo; avawrei no patang nai ne.

¹⁸ Kai ly kaimy i kamngochi ahui bo. Huni kamngochi molam y, paleung mawn parai nai ne.

¹⁹ Kai i paleung ka-echi ly noso keaungno by y; atyhtyh naimy kai ai niu ngai y nai khumichi ly nawi parai.

²⁰ Kai ly kateng sa ai nai atho sa nai deaungkho y, hawi naira ai hawi y naira hawimy patlai reng nai khumichi ly kai ai ka-awi sa u bo.

²¹ Aw Areng, kai ai khai su moh ba; kai i Tameuh, kai hawi kamlo y awm vui moh ba!

²² Kai ai atleu nai keung Areng, vaimy kai ai sabawm ba!