SAM 33 - Khumi Common Language Bible

Palo nai khulym

¹ Aw khumi kahawi bawibawichi awi, nangchi ly Areng my sa pi nai leaungsaichi molam y amo theu naimy aeu u. Mymy i leu tangai nai khumi bawibawichi awi, mymy ai ly palo u.

² Tarochi beu iy Areng ai palo u. Vui horei awm nai katyn kapau hawi, mymy i mo y khulym thui u.

³ Mymy i mo y khulym kangtha thui u; katyn hawi parai naimy taro beu u; amo theu parai naimy aeu u!

⁴ Areng i leu ly teng parai; mymy i sa nai kalopchi py, leu meitang hawi amlau nai ne.

⁵ Areng ly meitang naimy tara chih nai ai khei nai ne. Mymy i khaw parai nai tamen naira ly khaileaung pri y khiu bo.

⁶ Areng ly mymy i leu pei nai hawimy kani khusang ai py, mymy i leu hawimy kani, lo, ka-si taukichi ai py sa nai ne.

⁷ Pangli ngiereichi ai meingtym hareira y achu hai bo. Thiu parai nai suida pangli tuichi ai, khaira takunchira y kry me bo.

⁸ Khaileaung pri khumi bawibawichi awi, Areng ai tahm khai u! Khaileaung pri y awm nai khumi bawibawichi awi, mymy ai jei naimy tahm khai u!

⁹ Mymy leu pei nai khala y khaileaung pri lawm bo. Mymy leu pei nai khala y ati cheaungkhangchi ly amteng nai ne.

¹⁰ Areng ly khumi cheng cheaungkhangchi i dawn nairachi phra hai bo. Nichi i dawn tau naichi ai py, amcheang hai y ai nai paka vui nai ne.

¹¹ Na i py mymy i dawn nai saichi ly mana khala py phra ai ny y. Mymy i patyp nai saichi ly deungtasarei eaung nai ne.

¹² Areng ai Tameuh palawn iy chiu nai khumi cheng ly taham hawi; Mymy i khumi lawm ai nai vawi takhra nai khumichi ly taham hawi.

¹³ Areng ly kani pri mang dengdairei khen kathiu iy, khumi bawibawichi ai niu bo.

¹⁴ Mymy ly my i peang nai meingtym i dengdairei meung iy, khaileaung pri y awm nai, heng nai bawibawichi ai khen nai ne.

¹⁵ Mymy ly nichi i paleungchi ai sa nai keung ne nai deaungkho y, nichi i dawn nai leaungsai ngiereichi ai pany.

¹⁶ Samrang napi nai ly my i tavaimi kamkawm pui deaungkho y, tavai eaung nai ny y; Tavaimi risa py my i atho haiho molam y eaung nai ny y.

¹⁷ Tavai keaungngochi ly eaung naira nga nai deaungkho y ati sai py ny y. Nichi i atho len nai py atleu pajau y leang.

¹⁸ Areng ly mymy ai jei kaji nai hawi khaw parai nai tamen naira ai ym nai khumichi ai kry nai ne.

¹⁹ Mymy ly nichi ai deira i nai atleu bo. Cha nei takang nai neng khala y, nichi ai heng ai nai pei bo.

²⁰ Achi ly Areng ai ajeng u bo. Mymy ly achi ai sabawm iy, ang kry nai ne.

²¹ Achi ly mymy deaungkho y amo theu u nai ne. Achi ly mymy i amyn kachai ai ym u bo.

²² Aw Areng, nang ai kaichi my ajeng nai ne i, kaichi teng y khaw parai nai tamen naira pei kyh ba.