SAM 32 - Khumi Common Language Bible

Kamngo apany nai hawi kamngo pahen nai

¹ Amy i kamngochi lawira nga iy, sa tamang naichi molam y, law tleaung naira nga nai khumi ly taham hawi.

² Hawi y sa nai khumi, nanai Areng my neng hai nai avum y naimy tapawp paryp nai ngiereira y abawi y nai khumi ly taham hawi.

³ Kai ly kaimy i kamngochi ai apany hai y, ahui y naimy awm nai khala y, kani khengrei kavo nai deaungkho y, atho khei bo.

⁴ Aw Areng, nang ly kai ai vum kanithun kamngo pajeng bo. Kanipui kabi saho y am-i nai ly phui rawm vui nai kamta, kai i atho py khei be veng bo.

⁵ Huna nai khala y kai ly kaimy i kamngochi ai, nangmy teng y pany hai bo. Kai i sa tamang naichi ai nang teng y apha y leang bo. Hunichi ai nang teng y ahui ai nai, kai i paleung y dawn yb veng bo. Nang ly kai i sa tamang nai ngiereichi, kamngo palawi pi bo.

⁶ Hunai deaungkho y nang ai ka-ym awm nai khumichi ly aly aeang nai khala, nang teng y chiu sa hnei takeng ai nai avo nai ne. Khrikhri pa-rei ho nai tui ly nichi teng y tym ai ny y.

⁷ Nang ly kai i abyh naira ne. Kai ai patangra i nai atleu kyh ba. Nang ly kai ai ama hai nai deaungkho y, kai ly nang i atleu pi nai satang tao pajeng parai naimy khulym kathui ai.

⁸ Areng my, “Kai ly nang i tako ai avo nai lam kang patei pi ai. Nang ai tau kang pei iy kang kry ai.

⁹ Nang ly pakaura hawi pakaura vuinawn hawi kry nai keaungngo, ti y baly keaungngo kaneaung kasau kamta, akhum moh,” napi.

¹⁰ Khumi hawi y naichi ly patangra avum u ai. Na i py Areng ai ym nai khumichi ly khaw parai nai tamen naira hawimy, ama hai naira avum ai.

¹¹ Aw khumi kahawi bawibawichi awi, Areng i sa pi nai molam y amo theu u. Mymy i leu tangai nai khumi bawibawichi awi, amo theu nai aeu u!