SAM 30 - Khumi Common Language Bible

Kawn naimy chiu sa nai

¹ Aw Areng, kai ai atleu nai deaungkho y py, kai i patang nai molam y paleung ka-echi my paleung ateng hai ai nai pei y nai deaungkho y py, nang ai kai ly kang palo nai ne.

² Kai i Areng Tameuh, kasabawmra nga ai nai nang teng y kai aeu. Nang ly kai i patang nai rym hai bo.

³ Kai ai deira tavau kho i dengdairei palau ali teang bo. Kai ly tapreaung angawm theung y satla nai ne i py, nang ly kai ai dei hai y naimy, heng ai nai pei bo.

⁴ Mymy ai ka-ym awm nai khumichi awi, Areng ai palo nai khulym thui u. Chai parai nai keung i sa nai leaungsai ai pany jo iy, kawn naimy palo u!

⁵ Mymy i kado theu nai ly tanareichy khyh; hawi naira ly deungtasarei ne. Vum y meikatui beu teu i py, khawn mang y ly amo theu hai ali teang nai ne.

⁶ Amymy ai chymme naira awm bo, nanai a-ym iy, “Kai ly mana khala py sum ai ny y,” nanai kai ly kaimy tlairei thui bo.

⁷ Aw Areng, nang ly kai ai hawi hai bo. Mawi salo i lengseaung yhm kamta, kai ai khaw hai bo. Na i py nang ly kai ai meimai hi pi vui nai khala y, kai ly jei hyn nai ne.

⁸ Aw Areng, kai ly nang teng y kaau naimy, nang teng i kasabawmra kang hnei bo.

⁹ “Kai dei baly ati amran ai mo? Tapreaung angawm y tym nai molam y ati kahawi theu ai mo? Khumi kadeichi ly nang ai palo pajau na a? Nichi ly nang i ka-ym awm nai amthang hai pajau na a?

¹⁰ Aw Areng, kai i palau nai raawi tangai pi iy, kai ai pahen kyh ba! Aw Areng, kai ai sabawm kyh ba!,” nanai kang takeng nai ne.

¹¹ Nang ly kai ai paleung mawn naira i nai amo theu naimy lam hai bo. Kai i paleung si nai ka-ma-ra paisiu aleng iy, amo theu nai ka-ma-ra ateaung amthyp ai nai pei bo.

¹² Hunai deaungkho y kai ly awm pypy ai ny y; nang ai palo nai khulym thui ai. Aw Areng, nang ly kai i Tameuh ne. Kai ly nang ai kawn naimy kang palo jojo ai.