SAM 29 - Khumi Common Language Bible

Kamchai theung i Areng i raawi

¹ Aw kani pri chochi awi, Areng ai ly palo u. Mymy i nang parai nai hawi sa thai naira ai palo u.

² Nang parai nai hawi angym nai Areng amyn palo u. Chai parai nai keung ang jeu nai khala y, mymy i mo y lu meung u.

³ Areng i raawi ly panglichi salo y amsau bo. Nang parai nai hawi angym nai Tameuh ly kani pajyh hai. Mymy i raawi ly suida pangli salo y avah na bo.

⁴ Areng i raawi ly amsau bo. Huni raawi ly sa thai naira hawi, nang parai naira kawi angym nai ne.

⁵ Areng i raawi molam y saitleang keungchi ly aheang be bo. Lebanon daichira i saitleang keungchi malawn ly aheang be bo.

⁶ Mymy ly Lebanon mawichi ai, sichochi kamta ampyh hai. Heramon mawi ai py si katai beaungjeaung kamta ampyh hai bo.

⁷ Areng i raawi ly amlosadi kamta angvang hai bo.

⁸ Mymy i raawi ly daichi ka-vym ai amchyh hai. Mymy ly kadesa daichi ka-vym ai amchyh hai bo.

⁹ Areng i raawi ly ngopraibiu keungchi ai ahyn hai iy, dengkeaung keungchira i ngam awm nai ngiereichi ai vui hai bo. Tlenrei khyh my, “Tameuh ly nang parai nai awm sy!,” nanai Achura yhm theung y khumi bawibawichi aeu u bo.

¹⁰ Areng ly tui thiu parai nairachi ai peang. Mymy ly deungtasa peang nai samrang ne.

¹¹ Areng ly mymy i khumichi teng y sa thai naira pei; nichi teng y tlamsa nai amtheaung naira pei pi bo.