SAM 27 - Khumi Common Language Bible

Palo naimy chiu sa nai

¹ Areng ly kai i kangvang, kai i atleu keung ne. Kai ly ami ai jei hyn ai mo? Areng ly ka-jeira cheaungkhang i nai kai ai ama hai bo. Kai ly jei hyn ai ny y.

² Khumi hawi y naichi my kai ai padei ai nai atho sa u nai khala y, nichi ly pathuikhe iy atlym u bo.

³ Tavaimi kamkawm pui harei my kai ai ang katanmeuh teu i py, kai ly jei y ai. Kai i paleung ka-echi my malawn py kai ai tiu lawh teu i py, kai ly Tameuh ai ym ai.

⁴ Areng teng y hnei ai ngai nai, kai i kadeaung nai langseaung harei awm; huni langseaung ly Areng i yhm y deungtasarei awm ai nai, kawn nai leu thui naimy palo ai nai hawi, mymy i patei pi nai lam nga ai nai py ngai nai ne.

⁵ Patang naira tym nai neng khala y, mymy ly kai ai ang kry ai. Achura yhm y chymme naimy ang khai ai. Patang naira avum y ai nai lengseaung pui saleung y ang khai ai.

⁶ Hunai deaungkho y kai ly kai ai ang takimeuh nai paleung ka-echi ai eaung naira nga ai. Kai ly amo theu aeu naimy Achura yhm y apathyp ai. Khulym thui naimy Areng ai palo ai.

⁷ Aw Areng, nang ai kaimy palau nai khala pathang pi kyh ba! Pahen parai naimy pathang pi kyh ba!

⁸ “Kai teng y ahihawi iy chiu ba,” nanai nangmy leu pei nai kamta, aw Areng, kai ly nang teng y ahihawi ai.

⁹ Kai teng i nai meimai hi vui moh kyh ba!,” Kado theu moh kyh ba. Nang i miseaung kai ai sabawm nai keung ne. Kai ai atleu keung aw Tameuh, kai ai khai su moh kyh ba. Kai ai aphi su moh kyh ba.

¹⁰ Kai i amhm ampo my kai ai khai su teu i py, Areng ly kai ai ang kry jojo ai.

¹¹ Aw Areng, nangmy sa hai ai ngai nairachi kai ai patiu ba. Kai i paleung ka-echi ly nawi parai; Hunai deaungkho y kai ai chymme nai lam mang y pahawi ba.

¹² Tapawp nai hawi pajei nai paleung ka-echi kiu y kai ai khai su moh kyh ba.

¹³ Areng i hawi nairachi hini deung y kai ly niu ai, nanai ym bo.

¹⁴ Areng ai ly ym ba. Paleung phra moh; ym naira awm. Areng ai ly ym.