SAM 24 - Khumi Common Language Bible

Nang parai nai samrang

¹ Khaileaung pri hawi khaileaung pri y awm nai ngiereichi ai py, khaileaung hawi khaileaung salo y heng nai amjy bawibawichi ai py, Areng my peang nai ne.

² Mymy ly khaileaung ai khaileaung anui i tui kathiura y langdeng pala bo. Thiu parai nai suida panglichi theung y sangum pala iy sa nai ne.

³ Areng i mawi salo y lyn pajau ai nai khumi ly ami mo? Mymy i Achura yhm kachai theung y kun pajau ai nai khumi ly ami mo?

⁴ Kaja hawi iy paleung chai naimy tameuh takhrachi ai chiu y nai khumichi, tapawp y, adeu nai vaineng taphra vai y nai khumichi ne.

⁵ Areng ly huni khumichi ai amtheaung hai iy atleu ai. Huni khumichi ly kamngo chai nai khumichi ne, nanai Areng ly amthang hai ai.

⁶ Huna nai khumichi ly Tameuh teng y ahihawi nai khumichi, Jakob i Tameuh ai chiu u nai khumichi ne.

⁷ Mary apai katheu pa-khochi paeaung u; jangni i katheuchi py paeaung u; nang parai nai samrang kun ai.

⁸ Huni nang parai nai samrang ly ami mo? Huni samrang ly sa thai naira haiho awm nai Areng, tavai eaung nai Areng ne.

⁹ Mary apai katheu pa-khochi paeaung u; jangni i katheuchi py paeaung u; nang parai nai samrang kun ai.

¹⁰ Huni nang parai nai samrang ly ami mo? Nang parai nai samrang ly tavai eaung nai Areng ne.