SAM 21 - Khumi Common Language Bible

Tavai eaung nai molam palo nai

¹ Aw Areng, nang ly samrang teng y atho haiho pei nai deaungkho y ni ly amo theu; nang ly tavai eaung hai nai deaungkho y, ni ly khri pa-rei amo theu bo.

² Nang ly ni i kadeaung nai pei pi; ni i chiu sa nai pathang pi bo.

³ Nang ly ni ai amtheaung naira kahawichi pei pi. Ni ai muku lukhym amym hai bo.

⁴ Ni ly hengra hnei i, nang ly ni ai hengra pei nai khyh chang y, deungtasa hengra py pei pi nai ne.

⁵ Nangmy sabawm nai deaungkho y, samrang ly sa thai naira angvang na. Nang ly ni ai amthang leaung ai nai hawi, apu parai naira pei pi bo.

⁶ Nang i amtheaung nairachi ly ni i tlang tleaung y avawrei tym hai bo. Nang ly ni i sahawi y awm nai deaungkho y, ni ly amo theu nai ne.

⁷ Samrang ly ati cheaungkhang sa thai nai Areng ai ym nai ne. Areng i khaw parai naimy tamen nai saho y ni ly chymme ai.

⁸ Samrang ly my i paleung ka-e bawibawichi ai patiu ai. Mymy ai niu ngai y nai khumi bawibawichi ai patiu pawn ai.

⁹ Mymy ang jeu nai khala angveaung nai mai kadeu kamta, nichi ai taphra ai. Areng ly kado theu iy nichi ai taphra pawn ai; nichi ly mai y kang be ai.

¹⁰ Samrang ly nichi i cho chanau bawibawichi ai padei ai. Nichi i cheng bawibawichi ai tamyh pawn ai.

¹¹ Nichi ly samrang ai padei ai nai hawi y nai ka-dawnchi sa u. Na i py eaung ai ny y.

¹² Ni ly thailiho hawi ko i, nichi ly anaw iy ang preng hai ai.

¹³ Aw Areng, nang ly sa thai naira phum-ang awm nai deaungkho y, nang ai kaichi my kang palo u bo! Nang i nang parai nai ai palo nai khulym thui ai.