SAM 20 - Khumi Common Language Bible

Eaung naira nga ai nai chiu sa nai

¹ Patang nai neng khala nang i chiu sa nai Areng ly pathang pi sy! Jakob i Tameuh ly nang ai amo hai sy!

² Mymy ly nang ai Achura yhm theung i my kasabawmra pei sy; Zion mawi dengdairei sabawm sy.

³ Mymy ly nang i katalamra ngiereichi ai kawn pi iy, leng patlum nai kapathypra bawibawichi ai py kawn pi sy.

⁴ Nang i ngai nai angym hai iy dawn tau nai ngiereichi py, eaung ai nai sabawm pi sy.

⁵ Hunaibaly kaichi ly nang i eaung pawi molam y, amo theu parai naimy aeu u ai. Areng ai palo naimy nang i eaung pawira y abawi u ai. Tameuh my nang i hnei takeng nai ngierei pei pi sy.

⁶ Areng ly mymy i khai takhra pi nai samrang ai tavai eaung naira pei, nanai vai ly kai pany bo. Mymy ly nang i hnei takeng nai ai kani pri meingtym kachai mang dengdairei thai i, sa thai naira hawimy nang ai eaung nai pawi puichi ang pei bo.

⁷ Phyrei khumichi ly mychi i tavai ka-ri hawi keaungngochi ai a-ym u. Na i py achi ly achi i Areng Tameuh ai a-ym u nai ne.

⁸ Huna nai khumichi ly athei iy atlym u ai. Na i py achi ly ang thau iy khaw parai naimy angdo ai.

⁹ Aw Areng, samrang ai eaung ai nai pei ba. Kaichi my palau nai khala y pathang pi kyh ba.