SAM 2 - Khumi Common Language Bible

Tameuh my vawi nai samrang

¹ Khumi chengchi ly ati mana nai atiu ai nai tau u lawh mo? Khumichi ly kangviu y ati mana nai dawn u atyhtyh lawh mo?

² Huni khumichi i samrangchi ly tiu u bo. Hunichi i samrangchi ly Areng hawi mymy i khai takhra nai samrang ai tiu ai nai kangviu y arum u nai ne.

³ Nichi my, “Achi ly nichi my peang naira i lawi ai nai atho so u sina; nichi my peang nai ai paka u sina,” nanai thui u.

⁴ Kani mang y awm nai areng atehra salo y Areng ly panui naimy nichi i dawn pasym nai ai panui hai nai ne.

⁵ Naibaly mymy ly kado theu naimy pany hai pi nai deaungkho y nichi ly kado theu nai haiho molam y jei hyn naimy kaso theu u bo.

⁶ Mymy ly “Tahm asang parai nai kai i Zion mawi salo y, kaimy vawi takhra nai samrang ai kaimy kapalyn bo,” napi.

⁷ Samrang my, “Areng i amteng hai naichi kaimy thai hai ai; mymy ly kai teng y, “Nang ly kai i chapo ne; vaini my kai ly nang i ampo lawm bo.

⁸ Hnei, khumi cheng cheaungkhangchi ai nang teng y kang pei ai; khaileaung pri verei y nangmy peang ai.

⁹ Nang ly khumi cheng cheaungkhangchi ai tamo cheaungvawi hawi peang ai; nichi ai alai laawm pakhawi nai kamta kawi hai phro ai, nanai leu ang pei,” napi.

¹⁰ Nangchi samrangchi awi, tau tleaung y awm u; nangchi samrang bawibawichi awi, dawn pany u.

¹¹ Nangchi ly jei kaji nai paleung hawi Areng i kalop so u;

¹² Jei hyn naimy mymy i mo y lu meung u; huna nai so y baly mymy ly kado theu nai deaungkho y nangchi ly dei u takengkei ai. Mymy teng y ahihawi naimy abyh nai khumi bawibawichi ly taham hawi u nai ne.