SAM 17 - Khumi Common Language Bible

Kamngo by y nai leaungrei i chiu sa nai

¹ Aw Areng, adyh adawi ai nai molam y, kai i takeng nai tangai pi kyh ba. Kasabawmra nga ai nai kai i aeu nai raawi dawn pi patyp kyh ba! Kai ly neaung hawi parai naimy hnei takeng nai ne i, kai i chiu sa nai tangai pi kyh ba.

² Nang ly kateng lam pany nai deaungkho y, kai i hawi ai nai molam y tara chih pi kyh ba.

³ Nang ly kai i paleung pany; vum y kai teng jeu iy kai i paleung awm nai sai hawihai palai cham nai khala, hawi y nai sai niu y.

⁴ Kai ly khumi takhrachi kamta, chai y nai leu katheu y; nang i reita leu tangai nai ne. Ta-li ta-phang sa nai lam mang y py abang y nai ne.

⁵ Nang i lam naini tako nai ne; huni lam i nai amphri vai y leang.

⁶ Aw Tameuh, nang ly pathang pi reng nai deaungkho y, kai ly nang teng y chiu kang sa; hunai deaungkho y kai mang y hi iy, kai i chiu sa nai raawichi tangai pi kyh ba.

⁷ Nang i lyh ai hawi parai nai tamen naira amteng hai iy, kai ai atleu kyh ba; nang i sahawi y kai ly paleung ka-echi my patang hai naira i nai, law tleaung naira nga bo.

⁸ Nangmy i meicho kangvai kamta kai ai kry kyh ba. Khumi hawi y naichi my tiu naira i nai kai ai

⁹ nang i pakhi ka-khui anui y khiu me ba. Kai ai padei ai hau nai paleung ka-echi ly kai ai katan u meuh bo.

¹⁰ Nichi ly pahen nai paleung by y naimy, amlyh am-e nai leu katheu u.

¹¹ Nichi ly kai i chei naira tleirei y kai ai atlym pa-rei tapheu ai nai katanmeuh iy ajeng u.

¹² Nichi ly khrangsichi kamta, kai ai angtheng piupa ai nai ngai u i, kai ai ajeng u rym paryp bo.

¹³ Aw Areng, jeu ba! kai i paleung ka-echi ai neaung vui iy, taphra pi pawn ba! Nang i haisau hawi, khumi hawi y naichi kiu i nai kai ai atleu pi kyh ba.

¹⁴ Vai, heng nai deung y ngai nai kamta angym nai khumichi kiu i nai kai ai atleu kyh ba. Nichi i vui y nangmy pateung pi achu nai ngari kamtang hawimy, nichi ai pajeng kyh ba. Huni ngari kamtangchi ai nichi i cho chanauchi teng khyh chang y naimy, nichi i katu chanauchi ai py avum hai ba.

¹⁵ Kai ly kamngo so y nai deaungkho y nang ai niu ai; kai ly ira i nai ang thau nai khala, nang ly kai hawi vanrei awm nai deaungkho y, amo theu naira nga ai.