SAM 16 - Khumi Common Language Bible

Ym naimy chiu sa nai

¹ Aw Tameuh, kai ly nang teng y abyh bo; hunai deaungkho y kai ai ama hai iy kry ba.

² Kai ly Areng teng y, “Nang ly kai i Areng ne; kai i nga nai hawi naira ngierei ly nangmy pei naichi ne,” napi.

³ Areng ai ka-ym awm nai khumi ly khri pa-rei hawi parai na lawh ly! Kai i ngai keh nai ly huni khumichi hawi vanrei awm ai nga nai ne.

⁴ Tameuh takhrachi teng y ahihawi iy chiu nai khumichi ly khri pa-rei patang u ai. Kai ly nichi i apathyp naichira y abawi ai ny y; nichi i tameuhchi ai py chiu ai ny y.

⁵ Aw Areng, kai i abyhra ly nang leaungrei awm khyh; kai i ngai nai ngiereichi ai py nangmy pei bo. Kai i momang i vui ly nang i kiu tleaung y awm.

⁶ Kai i tlang tleaung y nangmy pei nai amtheaungrachi ly lyh ai hawi parai; hunichi ly khri pa-rei hawi parai na!

⁷ Areng ly kai ai lam patei nai deaungkho y, kai ly mymy ai kapalo bo. Kai i kangji ngailai nai paleung ly vum y kai ai ang pany hai pi nai ne.

⁸ Areng ly kai hawi vanrei awm, nanai kai avawrei pany; mymy ly kai i sahawi y awm nai deaungkho y, ati my py kai ai atlym hai pajau ai ny y.

⁹ Hunai deaungkho y kai ly amo theu nai ne; kai ly chymme naimy awm bo.

¹⁰ Ati mana nai mo nabaly nang ly kai ai tavau kho y chei ai nai pei y nai deaungkho y ne. Kai ly ka-ym awm parai naimy kalop sa pi bo. Kai ai deira tavau kho y au su ai ny y.

¹¹ Nang ly kai ai heng naira lam patei pi ai; nang ly kai i sahawi y awm nai deaungkho y, kai ly amo theu iy deungtasarei paleung tuinem naimy awm bo.