SAM 149 - Khumi Common Language Bible

Palo nai khulym

¹ Areng ai palo u! Areng i mo y khulym kangtha thui u; mymy ai ka-ym awm nai khumichi i achu naira y, mymy ai palo u!

² Israela chengchi awi, nangchi ai sa nai keung molam y amo theu u; Zion mary i khumichi awi, nangchi i samrang molam y amo theu u!

³ Lam nai hawimy mymy i amyn palo u; atymchi hawi tarochi beu naimy mymy ai palo u.

⁴ Areng ly mymy i khumichi ai tamen nai ne; tahm anem nai khumichi ai, eaung nai hawimy tahm pasang u.

⁵ Tameuh i khumichi ly tavai eaung nai deaungkho y amo theu u sy; vumtorei amo theu naimy khulym thui u sy.

⁶ Pri bawibawichi ai tiu pajau iy, khumi cheng cheaungkhangchi ai pajeng ai nai py,

⁷ nichi i samrangchi ai sengkry hawi pakheng iy nichi i lu sa nai keungchi ai tamo dengki thiu ai nai py,

⁸ Tameuh i leu pei nai kamta, pri bawibawichi ai pajeng ai nai py,

⁹ Tameuh i khumichi ly chiu parai nai haisau syn u sy; hini ly Tameuh i khumichi i eaung pawi ne. Areng ai palo u!