SAM 144 - Khumi Common Language Bible

Tavai eaung nai y samrang i Tameuh teng kawn nai

¹ Kai i lengseaung pui lawm nai Areng ai ly palo u! Mymy ly kai ai tavai atiu ai nai ang patiu pi; tavai thau nai sai py patiu pi nai ne.

² Mymy ly kai ai ama hai nai kai i apai; kai i khengsi apai, kai ai atleu keung, kai i abyhra khupui ne. Mymy ly khumi cheng cheaungkhangchi ai kai i kiu anui y tym hai bo.

³ Aw Areng, khumi ly ati mana nai khumi nai y nang ly ni ai tahm khai ai nai tla lawh mo? Khumicho ly ati mana nai khumi nai y, nang ly ni ai dawn patyp ai nai tla lawh mo?

⁴ Khumi ly taho kathiu, taho kalau nai ali hawi atawm; ni i heng nai ly tama veng reng nai pa-pui hawi atawm nai ne.

⁵ Aw Areng, kani khusang ai paeaung iy jeu kathiu ba; mawichi ai teaung baly, hunichira i nai maikhyh theu ai.

⁶ Amlosadi theu hai iy nang i paleung ka-echi ai, ahei hai phro kyh ba; nang i thailihochi hawi ko iy, nichi ai angpreng hai pawn ba.

⁷ Salo keh mang kiu jaha iy, tui kathiura i nai kai ai atheu kalau ly atleu kyh ba; cheng takhrachi kiu i nai kai ai atleu kyh ba.

⁸ Huni khumichi ly mana khala py leu kateng katheu u vai y; vaineng tleang i malawn py, ka-chawi thui reng naichi ne.

⁹ Aw Tameuh, kai ly khulym kangtha thui iy nang ai kang palo ai; taro beu iy khulym thui naimy palo ai.

¹⁰ Nang ly samrangchi ai tavai eaung ai nai pei pi; nang i miseaung Davida ai atleu bo.

¹¹ Pahyp y naimy ana nai paleung ka-echi teng i nai kai ai atleu pi kyh ba; pri takhra khumichi kiu i nai atleu kyh ba; huni khumichi ly mana khala py leu kateng katheu u vai y; vaineng tleang i malawn py, ka-chawi thui u reng naichi ne.

¹² Kaichi i chapochi ly thawndeang nai thym khala y, keung cheangryh cheangryh nai keung dichychi kamta lawn sy. Kaichi i chanauchi ly samrang i yhm takichira y ka-pu leng nai lengseaung yhm mawnchi kamta lawn sy.

¹³ Kaichi i pai pateung naichi ly amti amjang cheaungkhangchi kawi naimy awm sy. Sui patlai nai angdym y awm nai beramchi ly sang neangneang nawi nai beram chochi tapen sy.

¹⁴ Kaichi i sichi py kapawm ju nai hawi, dei tama naichi by y naimy neangneang peung sy. Kaichi i lam ly patang naira avum nai khumichi i vo tangam nai raawichi awm moh sy.

¹⁵ Hina nai kamta awm nai pri ly taham hawi; Areng ly Tameuh ne, nanai ym nai khumichi ly taham hawi.