SAM 143 - Khumi Common Language Bible

Kasabawmra nga ai nai chiu sa nai

¹ Aw Areng, kai i chiu sa nai tangai pi kyh ba! Nang ly neaung hawi parai nai deaungkho y, kai i takeng nai pathang pi kyh ba; nang ly ka-ym awm nai deaungkho y, kai i hnei takeng nai tangai pi kyh ba.

² Nang i miseaung kai hawi ka-jo ka-thui awm moh sy ba; nang i mo y kamngo chai nai leaungrei py by y.

³ Paleung ka-e ly kai ai ang hui i, ang kai; kai ai sum hai be bo. Ni ly kai ai kaveng theung y ang paeung cheng iy, kai ly jangni khala y dei chum nai khumi kamta lawm bo.

⁴ Hunai deaungkho y kai ly kasum pei ai nai angchi yb bo; khri pa-rei paleung phra atho di na bo.

⁵ Kai ly lawm veng nai neng kanichi ai tami pajau y; kai ly nang i sa nai ngiereichi ai dawn pasym bo; nang i sa nai kuchi bawibawichi ai py dawn pasym nai ne.

⁶ Kai ly kiu pheu naimy nang teng y chiu sa bo; tui ahai nai khaileaung kamta, kai i phailo ly nang ai kadeaung nai ne.

⁷ Aw Areng, vaimy kai i hnei takeng nai pathang pi kyh ba! Kai ly athang khai naira pipi by y na bo. Kai ai meimai hi pi veng moh kyh ba; meimai hi pi vui lawh baly kai ly tavau kho y chei nai khumi kamta lawn ai.

⁸ Nang i khaw parai nai tamen naira ly kai ai khawn tleirei pany hai jo kyh ba; kai ly nang ai ym nai ne. Kai i chiu sa nai nang teng y tym sy; kai i tako ai nai lam patei pi kyh ba.

⁹ Aw Areng, nang teng y abyh ai nai kai ly ahihawi bo; kai ai paleung ka-echi kiu i nai atleu kyh ba.

¹⁰ Nang ly kai i Tameuh ne; nang i kangai sa ai nai kai ai patiu pi kyh ba. Kai ai pahen parai naimy chymme naira lam patei kyh ba.

¹¹ Aw Areng, nang i adeu nai kamta kai ai atleu kyh ba; nang i neaung hawi naira hawimy, kai ai ngari kamtangra i nai atleu pi kyh ba.

¹² Nang ly kai i tlang tleaung y tamen nai deaungkho y, paleung ka-echi ai padei pawn kyh ba; kai ly nang i miseaung ne nai deaungkho y, kai ai ana nai khumi bawibawichi ai padei pawn ba.