SAM 140 - Khumi Common Language Bible

Ama hai ai nai chiu sa nai

¹ Aw Areng, khumi hawi y naichi kiu i nai kai ai atleu kyh ba; atho y khrukhra hai nai khumichi teng i nai, kai ai chymme hai kyh ba.

² Nichi ly hawi y sa ai nai avawrei dawn u iy, ajo ai nai leu pakei u jojo.

³ Nichi i palai ly thailai kaso nai pavui hawi atawm iy, nichi i leu ly thauvau i thailai hawi atawm nai ne.

⁴ Aw Areng, kai ai khumi aso y naichi teng i nai amo hai kyh ba; kai ai atlym hai ai tau nai, khrukhra hai nai keungchi teng i nai, kai ai chymme hai kyh ba.

⁵ Paleung len amlyh nai khumichi ly kai i vui deaung pateung u; nichi ly kai ai patiu ai nai lam y mawipy jang iy tlaha sa u bo.

⁶ Kai ly Areng teng y, “Nang ly kai i Tameuh ne,” napi. Aw Areng, sabawm ai nai kai i aeu nai raawi tangai pi kyh ba!

⁷ Kai i salo kangteng Areng, kai i vui ham parai nai atleu keung, nang ly kai ai tavai akeung y ama hai bo.

⁸ Aw Areng, khumi aso y naichi i kangai angym hai moh kyh ba; nichi i katau hawi y naichi ly eaung ai nai pei moh kyh ba.

⁹ Kai i paleung ka-echi ai eaung ai nai pei moh kyh ba; kai ai pajei nai leu thui nai ngiereichi ly nichi avum u sy.

¹⁰ Mai-aichi ly nichi i lu tleaung y tlo hai sy; nichi ly angawm theung y tla iy, mana khala py lyn teang pajau moh sy.

¹¹ Amichi ai ka-chawi naimy neng hai nai khumichi ly eaung u moh sy; hawi y naimy ly khrukhra hai nai khumichi ai hui kai iy, tamyh pawn na sy.

¹² Aw Areng, nang ly khumi kamawnchi i hawi naira hawi, kamawn katichi i vui nga sang naichi ai ama hai, nanai kai ly pany bo.

¹³ Khumi kahawichi ly nang ai meitang khyp naimy palo ai; nichi ly nang i mo y awm ai nai nga u ai.