SAM 14 - Khumi Common Language Bible

Khumichi i aso nai sai

¹ Khumi ka-khumchi my, “Tameuh by y,” nanai dawn iy athang khai u nai ne. Nichi bawibawi ly sa nai sai hawi y i, amso ngai nairachi sa u; kahawi sa nai khumi leaungrei py by y.

² Areng ly khumi kachengchi hawi mymy ai chiu nai khumichi awm mo, by y mo, nanai pany ai nai kani pri mang dengdairei khumichi ai khen kathiu bo.

³ Na i py khumi bawibawichi ly lam tamang be veng; nichi bawibawi ly vanrei, tamang u bebe nai ne. Nichi theung y kahawi sa nai by y, leaungrei py by y.

⁴ Areng my, “Huni khumichi ly pany pacha y nai khumichi ne a? Huni khumi hawi y naichi ly pany thai naira by y nai khumichi ne a? Nichi ly kai i khumichi teng i lawm iy, heng u naichi ne. Kai teng y py chiu sa hnei takeng nai by y,” napi.

⁵ Na i py Tameuh ly mymy i leu tangai nai khumichi hawi vanrei awm nai deaungkho y, nichi ly kaso theu u ai.

⁶ Khumi hawi y naichi ly paleung apanem nai khumichi dawn nai sai ai phra hai teu i py, Areng ly nichi i abyhra ne.

⁷ Israela chengchi ai atleu nai pahenra ly Zion mawi i dengdairei theu hai sy. Areng ly Israela chengchi ai amtheaung hai aliteang nai khala, nichi ly khri pa-rei amo theu u ai!