SAM 139 - Khumi Common Language Bible

Tameuh i pany nai hawi kry nai sai

¹ Aw Areng, nang ly kai ai cham chum bo i, kai i satang pany bo.

² Nang ly kai i sa nai ngiereichi pany; kai i dawn pasym nai ngiereichi ai kamlo mang my pany nai ne.

³ Kai i kalop sa nai py ne sy, anawn nai py ne sy, nang ly kai ai niu; kai i sa nai ngiereichi ai pany.

⁴ Kai i labeaung ang y rai khala my, nang ly kai i thui ai nai leuchi pany yb veng nai ne.

⁵ Nang ly kai i lengthun mo kry naimy awm bo; sa thai naira hawimy kai ai ama hai nai ne.

⁶ Kai i satang angym pa-rei nang pany nai ly lyh ai hawi parai; huni pany nai sai ly kai pany pajau y na pa-rei thiu parai.

⁷ Kai ly nang hawi palo ai nai mani meingtym mang y chei vui ai mo? Nang i mei keung i nai amphri vui ai nai mani meingtym mang y theu vui ai mo?

⁸ Kai ly kani mang y lyn kalau lawh baly, hu y nang awm; kai ly tavau kho y aseaung lawh baly, hunira y nang ly awm nai ne.

⁹ Kai ly kani si nai mang y akheang vui lawh teu i py, kani dym nai mang y awm lawh teu i py,

¹⁰ nang ly kai ai lam patei iy pahawi ai nai, hunira y nang awm ai; nang ly kai ai sabawm ai nai, hunira y awm ai.

¹¹ Kai ly kaimy ai khiu ai nai kaveng ai py, kaimy i sahawi y awm nai kangvang ai vum mang y amtlau hai ai nai py, leu pei lawh baly,

¹² nang i vui y kaveng malawn py veng y ai; vum py kanithun kamta angvang ai. Nang i vui y kaveng hawi kangvang ly vanrei ne.

¹³ Nang ly kai i tlang kangpreang ngiereichi ai sa iy, hunichi ai kai i amhm taku theung y amtawn hai bo.

¹⁴ Nang ly jei ai hawi parai nai keung ne nai deaungkho y, kai ly nang ai kang palo bo. Nang i sa nai leaungsai ngiereichi ly lyh ai nai hawi parai, nanai kai pany angchi khyp bo.

¹⁵ Kai ly amhm taku theung y angpa ryh nai neng, kai i hiuchi amny ryh iy, ha harei amtawn nai neng khala y, nang ly kai ai pany nai ne.

¹⁶ Kai ai tapen y rai khala y my, nang ly kai ai pany yb veng bo. Kai i vui heng ai nai neng kani vuikanaichi ai, kai tapen y rai khala y my nang i cha-iu theung y tajiu pi yb veng bo.

¹⁷ Aw Tameuh, nang i dawn nai saichi ly kai i vui khri pa-rei rai parai; hunichi ly nawi parai na ly!

¹⁸ Hunichi ai kati ai nabaly, hunichi ly spryh amaichi tleaung y nawi keh ai. Kai ly i naira i nai ang thau nai khala y, nang hawi vanrei kaawm ai.

¹⁹ Aw Tameuh, khumi aso y naichi ai nangmy padei pawn sy! Atho y khrukhra hai nai khumichi ly kai teng i nai theu pawn sy!

²⁰ Nichi ly nang i satang hawi y nai cheichei thui u; nichi ly nang i amyn hawi y nai thui tamawn u nai ne.

²¹ Aw Areng, nang ai niu ngai y nai khumichi ai, kai py niu ngai y na a! Nang ai tiu nai khumichi ai kai ly paso na a!

²² Kai ly nichi ai paleung hawi verei niu ngai y; kai ly nichi ai paleung ka-echi kamta kapalawn nai ne.

²³ Aw Tameuh, kai ai cham iy, kai i paleung ai pany ba; kai ai cham ly kai i dawn naichi ai pany ba.

²⁴ Kai ly hawi y nai lam mang y abang mo, abang y mo, nanai cham iy kai ai deungtasa lam mang y pahawi ba.