SAM 138 - Khumi Common Language BibleKawn naimy chiu sa nai 1 Aw Areng, kai ly paleung hawi verei, nang ai kawn naimy palo ai; tameuhchi mo y nang ai palo nai khulym thui nai ne. 2 Kai ly nang i nang parai nai Achura yhm kachai mang y motha iy, lu meung naimy nang i khaw parai nai tamen naira hawi, ka-ym awm nai molam y, nang i amyn kang palo mang; ati mana nai mo nabaly, nang i amyn hawi adeu naichi ly tahm awm keh, nanai patei pi nai deaungkho y ne. 3 Nang ai kaimy palau nai khala y nang ly pathang iy, kai ai atho kangtha pei panawi bo. 4 Aw Areng, khaileaung pri y awm nai samrang bawibawichi ly nang i adeu nai leuchi thai u nai deaungkho y nang ai palo u ai. 5 Nichi ly nang i sa nai leaungsaichi ai py, nang i nang parai nai phum-angchi ai py, khulym hawi palo u ai. 6 Nang ly tahm asang parai teu i py, tahm anem nai khumichi ai kry nai ne; paleung len amlyh nai khumichi ai ly kamlo mang my pany bo. 7 Kai ai patang nairachi my ang taki meuh nai neng khala malawn py, nang ly kai ai ama hai bo. Nang ly kai i paleung ka-echi kado theu nai paka iy, sa thai naira hawimy kai ai atleu bo. 8 Nang ly kai teng y adeu pi nai kamta sa pi ai; aw Areng, nang i tamen naira ly deungtasarei ne. Nang i sa amteaung nai kalop ai ly amcheang hai kyh ba. |
Khumi Common Language Bible © Bible Society of Myanmar, 2005.
Bible Society of Myanmar