SAM 137 - Khumi Common Language Bible

Israela chengchi ai pri pala nai thym khala nichi i vo tangam nai

¹ Zion mary ai adawn nai thym khala y, kaichi ly Babulon pri i tavo micheaungchi peang y ateh naimy kavo u bo.

² Huni sahawi y awm nai paijeaung keungchira y kaichi i tarochi bang nai ne.

³ Kaichi ai patiu nai khumichi my, “Kaichi amo theu ai nai Zion mary satang ai khulym mang y thui pi,” ang napi u bo.

⁴ Areng ai palo nai khulym ai kaichi ly pri takhrara y mana kathui u pajau ai mo?

⁵ Aw Jerusalem mary, nang ai tami vui lawh ai nabaly, kai ly taro ai vai mo mang y, mana khala py beu thai y naimy awm sy!

⁶ Kai ly nang ai tami vui lawh baly, kai ly nang ai khri pa-rei amo theu hai nai mary palawn ai nai paleung ano y lawh baly, khulym thui pajau y naimy awm sy!

⁷ Aw Areng, Jerusalem mary ai peang vui nai neng khala y, Edom khumichi i sa nai sai pany pi jo kyh ba. “Hini mary ai khaileaung hawi angeng pa-rei panawi vui,” nanai huni khumichi i thui nai leu ai pany pi jo kyh ba.

⁸ Aw Babulon mary, nang ly taphra naira avum ai. Kaichi ai nangmy sa nai kamta nang ai vawitheung tha nai khumi,

⁹ nang i deaungdi chymplei naichi ai syn iy, lengseaung salo y nip piupa naimy padei nai khumi ly taham hawi.