SAM 136 - Khumi Common Language Bible

Kawn nai khulym

¹ Areng ly hawi nai ne i, mymy i tamen nai ly deungtasarei khaw jo nai deaungkho y, mymy ai kawn naimy palo u.

² Tameuhchi bawibawi tleaung y len keh nai keung ai ly kawn naimy palo u; mymy i tamen nai ly deungtasarei ne.

³ Arengchi bawibawi tleaung y nang parai keh nai keung ai ly kawn naimy palo u; mymy i tamen nai ly deungtasarei ne.

⁴ Mymy leaungrei naini rengrang ka-ma-rachi patei pi; mymy i tamen nai ly deungtasarei ne.

⁵ Mymy ly cheng naira hawimy kani khusang ai sa; mymy i tamen nai ly deungtasarei ne.

⁶ Mymy ly suida pangli saleung y khaileaung sa; mymy i tamen nai ly deungtasarei ne.

⁷ Mymy ly kanito hawi lo ai sa; mymy i tamen nai ly deungtasarei ne.

⁸ Kanito ai sa nai ly kanithun y peang hai ai nai ne; mymy i tamen nai ly deungtasarei ne.

⁹ Lo hawi ka-sichi ai sa nai ly vum y peang hai ai nai sa nai ne; mymy i tamen nai ly deungtasarei ne.

¹⁰ Mymy ly Aikupta chengchi i chapo chaluchi ai dei hai bo; mymy i tamen nai ly deungtasarei ne.

¹¹ Mymy ly Israela chengchi ai Aikupta pri i dengdairei pahawi bo; mymy i tamen nai ly deungtasarei ne.

¹² Huna nai kamta pahawi nai ly atho awm parai nai kiu hawi py, sa thai naira awm nai kiuban hawi py ne; mymy i tamen nai ly deungtasarei ne.

¹³ Mymy ly pangli kamsen ai phy nyhrei khawi hai bo; mymy i tamen nai ly deungtasarei ne.

¹⁴ Mymy ly mymy i khumichi ai, huni pangli tako prei ai nai pahawi bo; mymy i tamen nai ly deungtasarei ne.

¹⁵ Mymy ly samrang Pharao hawi ni i tavaimichi ai tui y anum hai be bo; mymy i tamen nai ly deungtasarei ne.

¹⁶ Mymy i khumichi ai daichi ka-vym tako prei ai nai pahawi bo; mymy i tamen nai ly deungtasarei ne.

¹⁷ Mymy ly phum-ang len nai samrangchi ai padei vui bo; mymy i tamen nai ly deungtasarei ne.

¹⁸ Mymy ly amyn amthang nai samrangchi ai padei vui bo; mymy i tamen nai ly deungtasarei ne.

¹⁹ Amori pri i samrang Sihon ai padei vui bo; mymy i tamen nai ly deungtasarei ne.

²⁰ Bashan pri i samrang Oka ai py padei vui bo; mymy i tamen nai ly deungtasarei ne.

²¹ Mymy ly nichi i pri ka-peangchi ai, mymy i khumichi teng y pei pi bo; mymy i tamen nai ly deungtasarei ne.

²² Mymy ly huni pri ka-peangchi ai, mymy i miseaung Israela teng y pei pi bo; mymy i tamen nai ly deungtasarei ne.

²³ Mymy ly achi sum nai khala y achi ai tami vui y leang; mymy i tamen nai ly deungtasarei ne.

²⁴ Mymy ly achi ai paleung ka-echi teng i nai lawi hai bo; mymy i tamen nai ly deungtasarei ne.

²⁵ Mymy ly heng nai amjy cheaungkhangchi ai, teicha teineichi pei pi bo; mymy i tamen nai ly deungtasarei ne.

²⁶ Kani pri mang y awm nai Tameuh ai ly kawn naimy palo u; mymy i tamen nai ly deungtasarei ne.