SAM 132 - Khumi Common Language Bible

Achura yhm ai palo nai

¹ Aw Areng, samrang Davida hawi ni i ngari kamtang avum nai ngiereichi ai pany jo pi kyh ba.

² Davida my, “Kai ly Areng awm ai nai yhm py, Jakob i ati cheaungkhang sa thai nai Tameuh i yhm py,

³ sa nai cheng y ryrei ly anawn ai ny y;

⁴ yhm y py vawi y, ira theung y py kun ai ny y;

⁵ Aw Areng, Jakob i ati cheaungkhang sa thai nai Tameuh teng vaineng abeu nai ly pany pi jo kyh ba.

⁶ Bethlehem mary y Leu Maikawm Pawm satang achi thai i, huni Pawm ai ly Jarim adym y niu u nai ne.

⁷ “Achi ly Areng i yhm y chei u sina; Areng atehra mo y mymy ai chiu u sina,” nanai achi thui u bo.

⁸ Aw Areng, nang i sa thai nai ka-ma-ra Leu Maikawm Pawm hawi vanrei, Achura yhm y jeu pi kyh ly hu y deungtasarei awm pi ba.

⁹ Nang i pathyp pi nai keungchi ly kateng lam so u jojo sy; nang i khumichi ly amo theu parai naimy aeu u sy!

¹⁰ Aw Areng, nang i miseaung Davida teng y adeu pi nai saho y, nang i vawi takhra nai samrang ai ly khai su moh kyh ba.

¹¹ Nangmy, “Kai ly nang i chapo leaung leaungrei ai samrangra y kapalyn ai; ni ly nang i meingtym amtym ai; nang i chapochi ly kai i Leu Maikawm ai kry iy, kai i leu pei naichi tangai u lawh baly, ni i chapochi py nang i meingtym amtym ai.

¹² Samrang lawm iy peang jojo ai nai nga u ai,” nanai nang i miseaung Davida teng y vaineng abeu bo; nang ly huni adeu nai leu ai ajiu ali teang ai ny y.

¹³ Areng ly Zion mary ai vawi takhra bo; mymy ly huni mary y awm ai nai ngai.

¹⁴ “Kai ly hini mary y kaawm jojo ai; kai ly hini mary ai peang ai nai ngai.

¹⁵ Kai ly Zion mary y aly ngai naichi by y na pa-rei, nang chawn nai mary lawm hai ai; hini mary i khumi kamawnchi ai bym pa-rei kapacho ai.

¹⁶ Hini mary i pathyp pi nai keungchi i, sa nai ngiereichi ai amtheaung hai ai; mary i khumichi py amo theu nai khulym thui aeu u ai.

¹⁷ Kai ly hini mary y Davida i katu chanau leaungrei ai tahm asang keh nai samrang y kakhai ai; hini mary y kaimy vawi takhra nai samrang i sa thai naira khaw hai ai.

¹⁸ Ni i paleung ka-echi ai kangji nga hai ai; ni i pri ly nang chawn iy sareaung hawi ai,” napi.