SAM 127 - Khumi Common Language Bible

Tameuh i hawi nai sai ai palo nai

¹ Areng my yhm so pi y baly sa nai keungchi i kalop ly atyhtyh teu; Areng my mary typ pi y baly tamcheaungchi i typ nai py atyhtyh teu.

² Tlang heng ai nai i vui khawn angthodyh ang thau iy, veng na nai pa-rei akawm parai naimy kalop sa nai py atyhtyh teu. Ati mana nai mo nabaly Areng ly mymy i tamen nai khumichi i nai thym khala, nichi i ngai nairachi pei pi nai deaungkho y ne.

³ Cho chanauchi ly Areng my pei nai langseaungchi ne; nichi ly amtheaung hai naira tatangchi ne.

⁴ Hawi thym khala y nga nai cho chanauchi ly tavailu i kiu y awm nai thailiho chynchi hawi atawm.

⁵ Hunai kamta thailiho chyn neangneang awm nai khumi ly taham hawi; ni ly paleung ka-echi hawi tara chih nai jeung y avum nai khala sum y ai.