SAM 116 - Khumi Common Language Bible

Deira i lawi nai khumi my Tameuh ai palo nai

¹ Areng ly kai i hnei takeng nai raawi tangai pi nai deaungkho y, kai ly mymy ai khrei; mymy ly kai i chiu sa nai tangai pi nai ne.

² Kai i palau nai tleirei y mymy ly tangai pi bo.

³ Deira ka-jei awm nai ly kai ai patiu bo; deira ly kai ai taki maimy awm; Kai ly jei hyn i, paleung mawn parai na bo.

⁴ Huna nai khala y, “Aw Areng, nang teng y kang takeng nai ne; kai ai atleu kyh ba,” nanai Areng teng y chiu kasa bo.

⁵ Areng ly hawi i pahen; achi i Tameuh ly pahen nai keung ne.

⁶ Areng ly jeaungmang nai khumichi ai ama hai; kai ka-jeira avum nai khala y, kai ai atleu nai ne.

⁷ Aw kai i paleung awi, Areng ai ym kalingie ba; ati mana nai mo nabaly mymy ly kai ai pahen nai keung ne.

⁸ Areng ly kai ai deira i nai py, kai ai meikatui tla ai naira i nai py, kai i kheu athei y ai nai py atleu bo.

⁹ Hunai deaungkho y kai ly heng nai khumichi theung y, Areng i mei ka-niu y heng ai nga nai ne.

¹⁰ Kai ly jei nai deaungkho y, “Kai ly ym ai nai khumi leaungrei py by y,” nanai py,

¹¹ “Kai ly khri pa-rei paleung mawn naira avum bo,” nanai py, kathui nai khala y, Areng ai ym veangveang nai ne.

¹² Areng ly kai ai hawi hai nai deaungkho y, kai ly mymy ai ati talam pi ai mo?

¹³ Kai ai atleu nai deaungkho y kawn naimy palo ai nai Areng teng y kai ly kreip hang talam ai.

¹⁴ Kai ly mymy teng y vaineng adeu nai kamta, mymy i khumichi awm achu naira y, kaimy i adeu nai talam ai.

¹⁵ Areng i khumichi theung y leaungrei dei vui baly, mymy i vui sum naira khri pa-rei len na!

¹⁶ Aw Areng, kai ly nang i miseaung ne; kai i amhm sa nai kamta, kai ly nang i kalop sa pi ai. Nang ly kai ai deira i nai atleu pi bo.

¹⁷ Kai ly nang teng y kawn nai kapathypra talam ai; nang teng y chiu sa ai.

^18-19 Kai ly nang teng y vaineng adeu nai kamta, nang i khumichi awm achu nai Jerusalem mary, nang i Achura yhm y adeu nai talam ai. Areng ai palo u!