SAM 115 - Khumi Common Language Bible

Tameuh meitang ly harei khyh

¹ Aw Areng, nang i khaw parai nai tamen naira hawi ka-ym awm nai molam y, nang teng y naini nang parai naira awm khyh; kaichi teng y nang parai naira by y.

² “Nangchi i Tameuh ly ma y awm mo?,” nanai khumi cheng cheaungkhangchi ly ati mana nai y kaichi teng y deng u lawh mo?

³ Kaichi i Tameuh ly kani pri mang y awm iy, mymy i ngai nai kamta, ati cheaungkhangchi ai sa bo.

⁴ Nichi i tameuhchi ly muku, tangka hawi khumi i kiu y sa nai tameuhchi ne.

⁵ Hunichi ly labeaungchi awm i py leu katheu thai y; meichi awm i py niu pajau y.

⁶ Hunichi ly kanochi awm i py thai pajau y; notareangchi awm i py mui thai y.

⁷ Hunichi ly kiu awm i py nam thai y; kheuchi awm i py tako thai y; hunichi ly raawi katyn sai py patheu thai y.

⁸ Huni mynchi ai sa nai khumichi hawi ym nai khumichi ly mychi sa nai mynchi kamta lawm u sy.

⁹ Israela chengchi awi, Areng ai ym u. Mymy ly nangchi ai sabawm iy ama hai nai ne.

¹⁰ Nangchi Tameuh i pathyp pi nai keungchi awi, Areng ai ym u. Mymy ly nangchi ai sabawm iy ama hai nai ne.

¹¹ Areng ai jei naimy tahm khai nai khumi bawibawichi awi, mymy ai ym u. Mymy ly nangchi ai sabawm iy ama hai nai ne.

¹² Areng ly achi ai pany jo iy amtheaung naira pei ai; mymy ly Israela chengchi ai py, Tameuh i pathyp pi nai keung bawibawichi ai py, amtheaung naira pei ai.

¹³ Mymy ly mymy ai jei naimy tahm khai nai khumi bawibawichi teng y, kamawn, kanang khawi patleh y naimy amtheaung naira pei ai.

¹⁴ Areng ly nangchi hawi nangchi i katu chanauchi teng y, cho chanauchi pei sy!

¹⁵ Kani hawi khaileaung sa nai keung Areng ly nangchi ai amtheaung naira pei sy!

¹⁶ Kani khusang ai ly Areng leaungrei my peang khyh; na i py khaileaung ai ly achi khumichi ai pei nai ne.

¹⁷ Dei chum naichi hawi, tavau kho y ang vum kathiu nai khumichi ly Areng ai palo u y.

¹⁸ Na i py achi heng jo nai khumichi ly vai i dengdairei, mymy ai kawn naimy palo u ai. Areng ai palo u!