SAM 114 - Khumi Common Language Bible

Katlen Vui nai Pawi khulym

¹ Jakob i kangpreang Israela chengchi ly pri takhra Aikupta pri i dengdairei theu u nai khala y,

² Juda chengchi ly Areng i khumi kachaichi lawm u bo; Israela chengchi ly mymy i peang nai khumichi lawm u bo.

³ Pangli kamsen ly niu i, angpreng veng bo; Jordan tavo ly leaung y naimy anawn veng bo.

⁴ Mawi puichi ly mi-ichi kamta, mawi chychi ly beramchi kamta, ampyh u lengleang bo.

⁵ Pangli awi, nang ly ati mana nai y preng vui mo? Jordan tavo awi, nang ly ati mana nai y, leaung y naimy anawn vui mo?

⁶ Mawi puichi awi, nangchi ly ati mana nai y, mi-ichi kamta ampyh u lawh mo? Mawi chychi awi, nangchi ly ati mana nai y, beram chochi kamta ampyh u lawh mo?

⁷ Khaileaung awi, Areng ang jeu nai thym khala y, mymy i mo y jei hyn naimy kaso theu u; Jakob i Tameuh i mo y ly jei kaji naimy kaso theu u.

⁸ Nang ly lengseaung ai tui sampum, lengseaung para ai tavo micheaung lawm hai nai ne.