SAM 112 - Khumi Common Language Bible

Khumi kahawi ly taham hawi

¹ Areng ai palo u! Areng ai jei kaji naimy tahm khai iy, Reita leuchi kry ai nai ngai keh nai khumi ly taham hawi.

² Khumi kahawi i cho chanauchi ly pri theung y sa thai naira awm u ai; ni i katu chanauchi ly amtheaung naira nga u ai.

³ Ni i yhm dengtheungchi ly nang chawn u ai; ni ly nang chawn jojo ai.

⁴ Tamen iy pahen naira kawi naimy, leu meitang teaung nai khumi kahawichi i vui ly kaveng theung y kangvang tym hai reng nai ne.

⁵ Paleung kahawi naimy alai ai pei reng nai, amy i kalopra y kateng sa reng nai khumi ly taham hawi.

⁶ Khumi kahawi ly mana khala py sum ai ny y; khumichi ly ni ai mana khala py tami ai ny y.

⁷ Hunai deaungkho y ni ly satang hawi y naichi thai ai ny y; ni ly Areng ai ym nai khumi ne nai deaungkho y, ni i paleung ly khaw nai ne.

⁸ Ni ly paleung mawn nai py, jei nai py awm ai ny y; my i paleung ka-echi sum nai ly niu takengkei ai.

⁹ Ni ly khumi kamawnchi ai paleung hawi parai naimy sabawm reng; ni ly pahen jojo reng nai keung ne; ni ly sa thai naira awm iy tahm khai nai avum ai.

¹⁰ Khumi aso y naichi ly huni atitichi niu nai khala y kado theu ai i, ho akachai naimy tama u pawn ai; nichi i kangai ly phra ai.