SAM 108 - Khumi Common Language Bible

Paleung ka-echi hawi atiu naira y kasabawmra nga ai nai chiu sa nai

¹ Aw Tameuh, kai ly hawihai palai kang ym bo! Kai ly khulym thui iy nang ai palo ai! Aw kai i phailo anglaw jau!

² Kai i taro teaungteng katheang kalenchi awi, anglaw u! Kai ly kanito ai anglaw hai ai.

³ Aw Areng, khumi cheng cheaungkhangchi theung y, kai ly nang ai kawn naimy palo ai. Khumi mipuichi theung y nang ai kang palo ai.

⁴ Nang i khaw parai nai tamen naira ly kani khusang salo y py, nang i ka-ym awm nai ly kani pri mang y khrairei py tym na bo.

⁵ Aw Tameuh, nang i tahm len parai nai sai ly kani khusang mang py, nang i nang parai nai sai ly khaileaung pri verei y py, patei pi ba.

⁶ Nang i tamen nai khumichi ly hengra nga u ai nai sa thai naira hawimy kaichi ai atleu kyh ba; kai i chiu sa nai tangai pi kyh ba.

⁷ Achura yhm y Tameuh my, “Kai ly eaung nai hawimy Sekhem mary ai patleh takhra ai; Sukkoth leaunghawi ai py, kai i khumichi teng y paji pi ai.

⁸ Kilead pri ly kai i ne; Manase pri ai py kaimy peang; Ephraim pri ly kai i tamo lukhym ne i, Juda pri ly kai i areng cheaungvawi ne.

⁹ Na i py kai ly Moba pri ai kai i kheu asira rahum kamta teaung ai; Edom pri ai kaimy peang i, kai i phainai khaira y teaung ai; Philistin pri tlang tleaung y eaung naimy aeu ai,” napi.

¹⁰ Aw Tameuh, khaw pa-rei sa yb nai mary theung y, kai ai ami my tha ai mo? Edom mary mang y ami my kai ai pahawi ai mo?

¹¹ Nang ly meitang khyp naimy, kai ai khai su nai bo a? Nang ly kai i tavaimichi hawi vanrei, tavai thau y ai bo a?

¹² Khumichi i kasabawm ly atyhtyh teu deaungkho y, paleung ka-echi ai tiu pajau ai nai, kai ai sabawm kyh ba.

¹³ Tameuh my kaichi mang y awm ha ai nabaly, kaichi ly eaung naira nga ai; mymy ly kaichi i paleung ka-echi ai sum hai ai.