SAM 105 - Khumi Common Language Bible

Tameuh hawi mymy i khumi

¹ Areng i pahen nai ai palo u; mymy i nang parai nai sai ai amthang hai u; mymy i sa nai saichi ai khumi cheng cheaungkhangchi teng y thui pi u.

² Areng i nang parai nai ai khulym thui iy palo u; mymy i sa nai lyh ai hawi parai naichi thui pi u.

³ Mymy ly achi ai peang nai deaungkho y amo theu u; mymy ai chiu nai bawibawichi awi, amo theu u.

⁴ Sabawm naira hnei ai nai Areng teng y ahihawi u; mymy i mo y chiu so u jojo.

^5-6 Mymy i miseaung Abraham i kangpreangchi awi, mymy i vawi takhra nai Jakob i kangpreangchi awi, nangchi ly Tameuh i patei nai rengrang ka-ma-rachi ai py, mymy i khai pi nai tara chih nairachi ai py, pany u jo ba.

⁷ Areng ly achi i Tameuh ne; mymy i leu pei nai ly khaileaung pri verei i vui ne.

⁸ Mymy ly mymy i Leu Maikawm ai deungtasa khaw hai ai; mymy i adeu naichi ai deung kangthau tym pa-rei awm hai ai.

⁹ Abraham hawi asa nai Leu Maikawm hawi, Isaka teng y adeu nai leu ai py, khaw hai ai.

¹⁰ “Kai ly nang ai kanan pri kang pei ai; nang ly huni pri amtym ai,” nanai

¹¹ Areng ly Jakob hawi Leu Maikawm sa nai ne. Hini Leu Maikawm ly deungtasarei awm jo ai.

¹² Tameuh i khumichi ly vuikanai di parai i, kanan pri i angvynchi ne.

¹³ Nichi ly pri harei dengdai pri harei mang py, meingtym harei dengdai meingtym harei mang py, amki u ai nai tla bo.

¹⁴ Na i py Tameuh ly nichi theung i leaungrei ai py, ana patang hai ai nai pei y; nichi ai kry ai nai samrangchi ai leu pei nai ne.

¹⁵ Mymy ly “Kai i vawi takhra nai miseaungchi ai patang hai u moh; kai i amochi ai kiu pajeung kadeaung hawi py teaung u moh, nanai samrangchi ai leu pei bo.

¹⁶ Areng ly nichi i pri y teicha teinei takang hai nai deaungkho y, teicha teinei avaw nai khala y,

¹⁷ miseaung y jo vui nai Josepha ai, nichi i mo y pato nai ne.

¹⁸ Josepha my thui yb nai kamta tym y rai khala y, Josepha ly kheu y dengki thiu naira avum bo.

¹⁹ Ni i kaneaung y py sengkry hawi pakheng cheng bo. Ni i molam y Areng i thui naichi ly angym nai ne.

²⁰ Naibaly Aikupta samrang ly Josepha ai theaung i nai lawi hai; khumi cheng cheaungkhangchi i samrang ly Josepha ai lawi hai bo.

²¹ Samrang ly ni teng y pri peang nai kalop au iy, pri verei i samrang i bangtang kalenra y khai bo.

²² Ni ly samrang my khai nai miteaung kehchi ai leu pei pajau nai sa thai naira py, samrang i bangtangchi ai leu pei pajau nai haiho py nga nai ne.

²³ Naibaly Jakob ly Aikupta pri y tym i, huni pri y khuteng sa bo.

²⁴ Areng ly mymy i khumichi ai cho chanau neangneang peung hai i, paleung ka-echi tleaung y malawn py atho awm hai bo.

²⁵ Mymy ly Aikupta khumichi ai paleung amtlau hai nai deaungkho y nichi ly mymy i khumichi ai niu ngai y i, tapawp u nai ne.

²⁶ Naibaly mymy ly mymy i miseaung Mosi hawi mymy vawi takhra nai Aron ai pato bo.

²⁷ Nini ly Aikupta pri y Tameuh i lyh ai awm nai sa thai naira hawi rengrang ka-ma-rachi patei pi nai ne.

²⁸ Tameuh my pri verei y khuveng theu hai bo; na i py Aikupta khumichi ly mymy i leu pei nai tangai u y.

²⁹ Mymy ly nichi i tavo tuichi ai thi lawm hai i, ngo awm nai ngiereichi dei hai be bo.

³⁰ Samrang i yhm raurei, nichi i pri ly uiphochi kawi na bo.

³¹ Tameuh my leu pei i, pathauchi hawi saimawmchi ly pri verei y tym miu bo.

³² Mymy ly huni pri y kanitui i jeng y, ji akawi tla hai iy amlosadichi theu hai bo.

³³ Nichi i kreip keungchi hawi thaidu keungchi ai py taphra pawn iy, pri verei i dengkeaung keungchi ai tleu hai bo.

³⁴ Mymy leu pei nai khala y kati pajau y na pa-rei akhutamachi tym iy,

³⁵ huni pri y awm nai keung katheang ngiereichi ai cha krai iy, thengthai bawibawichi cha be nai ne.

³⁶ Mymy ly Aikupta pri yhm dengtheung bawibawira i chapo chaluchi ai padei chauchau bo.

³⁷ Hunaibaly Israela chengchi ai patheu iy pahawi bo; nichi ly muku, tangkachi syn u; nichi bawibawi ly tlumtlang atho awm nai khumichi ne.

³⁸ Aikupta chengchi ly nichi ai jei nai deaungkho y, nichi theu u nai khala y amo theu u bo.

³⁹ Tameuh ly mymy i khumichi salo y tamai deng hai iy, vum y kangvang nga ai nai mai khai pi bo.

⁴⁰ Nichi my hnei nai deaungkho y, mymy ly thengmynchi pato pi; nichi bym pa-rei cha ai nai kani mang dengdairei, teicha teinei pala pi bo.

⁴¹ Mymy ly lengseaung khawi nai khala, tui achawn hai i, khutaha daichi ka-vym y tavo kamta leaung bo.

⁴² Mymy ly mymy i miseaung Abraham teng y adeu nai leu ai pany pi bo.

⁴³ Hunai deaungkho y mymy ly mymy i khumichi ai pahawi nai ne; nichi ly amo theu naimy khulym thui iy aeu u bo.

⁴⁴ Mymy ly nichi teng y khumi takhrachi i prichi pei pi nai deaungkho y, nichi ly huni khumichi i li hlauchi nga nai ne.

⁴⁵ Hina nai sa nai ly mymy i khumichi ly mymy pei nai Reitachi kry iy, leu pei naichi tangai hai ai nai ne. Areng ai palo u!