SAM 101 - Khumi Common Language Bible

Samrang i adeu nai leu

¹ Aw Areng, kai ly ka-ym awm naira hawi leu meitang satang khulym thui ai; kai ly nang i mo y huni khulym thui ai.

² Kai ly kamngo by y pa-rei kaawm ai. Nang ly mana khala y kai teng jeu ai mo? Kai ly kaimy i yhm y chai parai nai paleung ka-dawn hawi kaawm ai.

³ Hawi y naira ai ly mana khala py kham pi ai ny y. Tameuh ai nithun thun vui nai khumichi i sa nai saichi ai, kai ly mei angai y; kai ly hunichi hawi ati sai py, amtawn abi y ai.

⁴ Kai ly katapawp paleung ka-kawi awm ai ny y; hawi y sa nai khumichi hawi py, amkawm ai ny y.

⁵ Khumi takhra i hawi y sa nai satang ai, leu kamsyh y thui reng nai khumi ai ly nawi su veng ai; amlyh am-e naimy paleung asang nai khumi ai ly kham pi ai ny y.

⁶ Kai ly Tameuh y ka-ym awm nai khumichi ai ly paleung apei ai; nichi ai kaimy i samrang yhm y awm ai nai kapei ai. Katapawp paleung ka-kawi by y nai khumichi ai kai i kalop sa hai ai.

⁷ Ka-chawi thui nai khumi ly kai i samrang yhm y awm ai nai ngo y ai; khumi kahawi amlawn reng nai khumi ly kai i mo y awm ai nai ngo y ai.

⁸ Kaichi i pri y awm nai khumi aso y naichi ai ly, kaimy kani tleirei tamyh vui ai; Areng i mary pui i dengdairei, khumi hawi y nai bawibawichi ai, kaimy patheu pawn ai.