ROM AVANGCHI TENG Y PAWLA I CHA PA NAI 8 - Khumi Common Language Bible

Phailo i saho y heng nai

¹ Hunaibaly vai ly Krista Isu y awm naichi i vui ly sum hai ai naira ha py by y leang bo.

² Ati mana nai mo nabaly Krista Isu y heng naira phailo i reita my ly kamngo hawi dei naira reita i nai ly kai ai ang law hai veng bo.

³ Naibaly tlang deaungkho y Reita ly ham y i sa pajau ai vuilam ny y nai ly, achi, tlang i reita y tako y naimy Phailo i reita y takho lawh nai keungchi y ly Reita leu khai rym nai ly sa angym naimy awm thai ai nai,

⁴ Tameuh my mymy i Chapo kypkyp ai ly kamngo awm nai tlang kamta apu nai, kamngo pathyp pi ai nai pato iy, tlang y ly kamngo ai pasum hai veng bo.

⁵ Tlang i reita y awm naichi ly tlang mang i atitichi ngai; Phailo i reita y awm naichi naini Phailo mang i atitichi ngai.

⁶ Tlang mang i atitichi ngai nai ly dei naira ne, Phailo mang i atitichi ngai nai naini heng naira hawi awmnem naira py ne;

⁷ ati mana nai mo nabaly tlang i ngai nai ly Tameuh ai tiu nai ne; huni ly Tameuh i reita anui y akhai y leang, akhai py akhai thai y leang:

⁸ naibaly tlang i reita y awm naichi ly Tameuh ai kawn hai thai y leang.

⁹ Na i py Tameuh i Phailo ly nangmychi y awm tatang baly, nangchi ly tlang i reita y awm nai ny y i, Phailo i reita y awm u nai teu. Na i py ami py Krista i Phailo by y nai khumi ly mymy i khumi ny y leang.

¹⁰ Naibaly Krista ly nangmychi y awm baly kamngo nai deaungkho y tlang ly dei nai ne; phailo naini hawi naira deaungkho y heng nai ne.

¹¹ Na i py Isu ai kadeichi theung i dengdairei pathau nai keung i Phailo ly nangmychi y awm baly, kadeichi theung i nai Krista Isu ai pathau nai keung my ly nangmychi y awm nai Phailo i saho y nangchi i tlang dei thai naichi ai ly ang paheng teang ai.

¹² Hunai deaungkho y amjo amnauchi awi, achi ly kalai awm: ne mang ly tlang i reita y awm ai nai tlang teng y ny y leang.

¹³ Nangchi ly tlang i reita y awm baly dei u takengkei ai nai tla; na i py nangchi ly Phailo y tlang i atiti sa naichi ai padei baly, heng u ai.

¹⁴ Ati mana nai mo nabaly Tameuh i Phailo my pahawi nai ngiereichi ly Tameuh i chanauchi ne.

¹⁵ Nangchi ly jei nai awm bi ai nai miseaung lawn ai nai phailo nga u bi nai ny y leang; na i py chanau lawn ai nai phailo nga u nai teu; achi ly huni deaungkho y Abba, Ngaai, nanai aeu reng.

¹⁶ Achi ly Tameuh i chanauchi ne, nanai Phailo kypkyp my ly achi i phailo hawi ang pany hai reng;

¹⁷ naibaly achi ly chanauchi ne baly, achi ly yhmtheaung amtym nai keungchi ne; achi ly mymy teng y tahm asang naimy awm teang thai ai nai mymy hawi patang ahawi tatang baly, achi ly Tameuh i kamtym Krista hawi amtym ahawi nai keungchi ne.

Momamg i nang naira

¹⁸ Vai dymkhawn i patang nairachi ly vai mo mang y achi teng y nang parai naira amteng hai ai nai hawi pata nai lawn y, nanai kapalawn,

¹⁹ Atiti sa naichi bawibawi ly khrikhri pa-rei athang khai nai, Tameuh i chanauchi ai amteng ai nai ly khrikhri pa-ri ajeng na.

²⁰ Ati mana nai mo nabaly atiti sa naichi bawibawi kypkyp py veaung thai nai miseaung i nai law hai naira nga iy, Tameuh i chanauchi savai ru nai nang parai naira y kun u ai nai,

²¹ atiti sa naichi bawibawi ai ly ati sai py ny y naira i ngaingai anui y awm hai veng bo(mymychi i kangai y ny y leang, anui y awm hai nai keung my athang khai nai deaungkho y teu.)

²² Atiti sa naichi bawibawi ly vai khrairei tangam nai hawi no patang nai awm bawibawi, nanai ly achi my pany.

²³ Huni khyh ny y leang, achi kypkyp py phailo i amtheaung hai man naira nga naichi ly achi i chanau lawn ai naira ajeng iy (huni ly tlang i atleu naira ne.) achi py paleung y tangam teang.

²⁴ Ne, achi ly athang khai naira y hengra nga bo; na i py niu ryhryh nai athang khai nai ly athang khai nai ny y leang:ami my mymy i niu ryhryh nai nga nai ly mana nai athang khai nai mo?

²⁵ Achi ly amychi i niu thai y nai nga ai nai athang khai baly, achi ly huni ai ajeng tanga.

²⁶ Hunai kamta teang Phailo my ly achi i ham y naira y ang sabawm; achi ly chiu sa ai nai avo nai sai pany y; na i py Phailo my ly tangam nai thui pajau y pa-rei chiu ang sa pi;

²⁷ naibaly mymy ly Tameuh i ngai nai kamta khumi kaichai ai ly chiu ang sa pi reng nai deaungkho y, paleung y khen patawm nai keung ly Phailo i kangai pany nai ne.

²⁸ Naibaly Tameuh ai tamen nai keung mymy i khai rym nai kamta palau naichi i vui ly ati py tym sy, mymychi i vui hawi ai naira theu hai reng, nanai achi pany.

²⁹ Ati mana nai mo nabaly mymy i Chapo ly amjo amnau neangneangchi theung y chalu lawn thai ai nai Tameuh ly mymy i pany rym naichi ai ly mymy i Chapo kamta khyp awm teang ai nai ang khai rym nai ne;

³⁰ naibaly mymy i khai rym naichi ai ly ang palau teang; naibaly mymy i palau naichi ai ly ang eaung hai teang; naibaly mymy i eaung hai naichi ai ly ang palo teang.

Krista Isu y Tameuh i tamen naira

³¹ Hunaibaly hunichi i molam y ly achi mana thui ai mo? Tameuh my achi mang y asa baly ami my ang tiu pajau ai mo?

³² Mymy i Chapo kypkyp ai malawn py khai y nai, achi bawibawi i jeng y ang pei nai keung ly, mymy hawi atiti bawibawi jawm naimy ang pei teang y ai a?

³³ Tameuh i vawi nai khumi ai ly ami my ang seu ai mo? Eaung hai nai keung ly Tameuh ne khy veng;

³⁴ pasum ai nai keung ly ami mo? Dei nai ly Krista ne; ne, mymy ai ly pathau teang veng bo; mymy ly Tameuh i lamtang mang y awm i, achi ai chiu ang sa pi nai keung ne teang.

³⁵ Krista i tamen naira i dengdairei ly ami my ang taprei ai mo? Patang naira my mo, khrikhri paleung mawn naira my mo, ana hai naira my mo, takang my mo, tlang ka-keu naira my mo, ka-jei awm naira my mo, haisau my mo taprei ai a?

³⁶ “Nangmy deaungkho kaichi ai ly kani khengrei ang padei, Kaichi ai ly beram tleh ai naichi kamta ang dawn nai ne,” nanai tajiu nai kamta.

³⁷ Ny y leang! Huni bawibawi y ly ang tamen nai keung deaungkho y achi ly pajau nai tleaung y pajau ra nai keung ne.

³⁸ Dei nairachi, heng nairachi, kani pri i amtaw thau naichi, areng nairachi, atiti awm angchichi,

³⁹ atiti awm ai naichi, atiti sa thai nairachi, asang nairachi, thiu nairachi, atiti sa nai takhra lyh lyhchi my py achi i Areng Krista Isu y awm nai Tameuh i tamen naira hawi achi ai taprei thai y leang, nanai kai pany khypkhyp.