ROM AVANGCHI TENG Y PAWLA I CHA PA NAI 16 - Khumi Common Language Bible

Pawla i kawn nai leuchi

¹ Achi i tuicho amni Phawibi, Kenkria avang i palau takhra kamkawmchi ai sabawm nai keung ai ly,

² Areng i amyn y khumi kachaichi kamta kawn u ai nai hawi, mymy ai sabawm ai nai aly ngai nai ngierei sabawm u ai nai py, nangchi ai mymy i meimai kang pany hai ai nai ngai: mymy kypkyp py khumi neang neangchi ai sabawm nai keung ne i, kaimy kypkyp ai py ang sabawm bo.

³ Priska nini Akuila, Krista Isu y kai i kalop sa ahawi nai, kai i vui y dei ai mawn y nai pa-rei sa vam nai, nini teng y ly kawn nai leu thui pi kyh;

⁴ kai khyh ny y naimy Cheng Takhra palau takhra kamkawm bawibawichi my nini teng y ly kawn nai leu thui nai ne;

⁵ nini i yhm y achu nai palau takhra kamkawm teng y py kawn nai leu thui pi kyh. Kai i ngai parai nai Epainita, Asia pri i Krista ai ym manme nai teng y ly kawn nai leu thui pi kyh.

⁶ Mari, nangchi i vui y sa akawm nai keung teng y ly kawn nai leu thui pi kyh.

⁷ Kai i miso Andronika nini Junia, kai hawi vanrei theaung tla hawi nai teng y ly kawn nai leu thui pi kyh; nini ly amtaw thau naichi theung y amyn amthang parai nai ne i, nini ly kai tleaung y Krista y awm manme nai ne.

⁸ Ampliata, Areng y kai i ngai parai nai teng y ly kawn nai leu thui pi kyh.

⁹ Krista y kaichi i kalop sa ahawi nai Urbana nini kai i ngai parai nai Stakua teng y ly kawn nai leu thui pi kyh.

¹⁰ Krista y khumi meitang Apelia teng y ly kawn nai leu thui pi kyh. Aristobula i dengtheungchi teng y ly kawm nai leu thui pi kyh.

¹¹ Kai i miso Herodian teng y ly kawn nai leu thui pi kyh. Narkisa i dengtheung i Areng y awm naichi teng y ly kawn nai leu thui pi kyh.

¹² Truphaina nini Truphosa, Areng y sa akawm parai nai nini teng y ly kawn nai leu thui pi kyh. Persi, Areng y sa akawm parai nai teng y ly kawn nai leu thui pi kyh.

¹³ Areng y vawi nai Rupha nini mymy i amhm, kai i amhm py ne teang nai nini teng y ly kawn nai leu thui pi kyh.

¹⁴ Asunkrista, phlekona, Hermia, Patroba, Herma, hawi, nichi khi y amjo amnau awm naichi teng y raurei kawn nai leu thui pi kyh.

¹⁵ Philoloka nini Julia hawi, Neria nini mymy i tuicho hawi, Olumpa hawi, nichi khi y khumi kachai bawibawichi teng y raurei kawn nai leu thui pi kyh.

¹⁶ Apachawm nai kachai y akawn u. Krista i palau takhra kamkawmchi bawibawi my nangchi teng y kawn nai leu ang thui pi mang.

Pawla i kangkhym leu pei nai

¹⁷ Naibaly amjo amnauchi awi, patiu nai leu nangchi i amtiu y nai mang y amprei naira hawi atlym naira sa nai keungchi ai ly hawihai khen u, naibaly nichi mang i nai hi vui ai nai kang takeng.

¹⁸ Hunai kamta khumichi ly achi i Areng Isu Krista i kalop so y naimy, mymychi i kajeu i kalop sa u lawh; naibaly mymychi i leu kahawi hawi leu kakawp nai my ly cheng y naichi i paleung y tapawp lawh.

¹⁹ Nangchi i leu tangai nai sai ly khumi bawibawichi theung y amthang veng bo. Hunai deaungkho y kai ly nangchi i tlang tleaung y kakawn; na i py nangchi ly atiti kahawi mang y ly cheng u iy, kamngo mang y ly cheng u y ai nai kang ngai.

²⁰ Naibaly aly nai Tameuh my ly nangch i kheu padawi anui y Setan ai ly ang chiu hai piupa praw ai. Achi i Areng Isu Krista i pahenra ly nangchi teng y awm sy.

²¹ Kai i kalop sa ahawi nai Timothei hawi, kai i miso lukia. Jasona, Sosipatera nichi my nangchi teng y ly kawn nai leu ang thui pi.

²² Kai Tertia, hini cha tajiu nai keung ly Areng i amyn y nangchi teng y ly kawn nai leu kang thui pi.

²³ Kai hawi palau takhra kamkawm bawibawichi i anga hai nai yhm keung Kaia my ly nangchi teng y ly kawn nai leu ang thui pi. Avang i yhmtheaung kry nai keung Erasta hawi, amjo amnau Kuarta my ly nangchi teng y ly kawn nai leu ang thui pi.

²⁴ [Achi i Areng Isu Krista i pahenra ly nangchi bawibawi teng y tym sy. Amen]

Tameuh ai palo naimy patem nai

²⁵ Kai i Satang Kahawi hawi Isu krista i leu thui pi nai kamta,

²⁶ naibaly leu kathiu amteng hai nai kamta (huni leu kathiu ly deungtasa dengdairei aheu reng i, vai naini amteng hai nai ne; naibaly deungtasa khrairei awm nai Tameuh i leu pei nai kamta, ym naira patawm ai nai, amochi i cha-iu leu ly cheng cheaungkhangchi teng y pany hai nai bo):

²⁷ nangchi ai khaw hai pajau nai keung cheng nai Tameuh harei khyh nai teng y ly Isu Krista deaungkho y deungtasarei palo naira awm sy. Amen.