ROM AVANGCHI TENG Y PAWLA I CHA PA NAI 14 - Khumi Common Language Bible

Amjo amnauchi ai cheh moh

¹ Naibaly ym naira y ham y nai khumi ai ly mymy i ym thai y nai sai cheh y naimy kawn u.

² Khumi leaungrei ly ati cheaungkhang cha pajau ai nai aym: ham y nai khumi naini amti amjangchi harei cha khyh.

³ Cha nai khumi my ly cho y nai khumi ai ati sai py ny y nai palawn moh sy; cho y nai khumi my py cha nai khumi ai ly cheh moh sy. Tameuh my ni ai ly kawn veng bo chy bo.

⁴ Khumi takhra i miseaung ai cheh nai keung nang ly mana nai kha? Mymy i angdo nai hawi atlym nai ly mymy i yhmkeung i vui ne. Ne, ni ai angdo hai takengkei ai; Areng ly mymy ai angdo hai pajau.

⁵ Khumi leaungrei ly kanirei nai ai ly kani takhra tleaung y tahm khai keh; khumi takhra ly kani bawibawi ai lyvanrei kamta palawn. Khumi leaung leaungrei ly amymy i paleung y chai pyn pa-rei hawihai apany sy.

⁶ Huni kani ja nai keung ly Areng ai palo ai nai ja nai ne. Naibaly cha nai keung ly Tameuh teng y kawn nai leu thui nai deaungkho y Areng ai palo ai nai cha nai teu; cho y naikeung py Areng ai palo ai nai cho y nai teu; naibaly mymy ly Tameuh teng y kawn nai leu py thui teang.

⁷ Achi ly ami ami py amy i vui y heng nai ny y leang., naibaly ami py amy i vui y dei nai ny y leang teang.

⁸ Achi ly heng baly Areng i vui y heng nai ne: achi ly dei baly Areng i vui y dei nai ne; hunai deaungkho y achi ly heng iy py dei iy py achi ly Areng i ne.

⁹ Huni deaungkho y khypkhyp Krista ly kadeichi hawi kanghengchi i Areng lawn thai ai nai dei py dei i, heng py heng teang bo.

¹⁰ Na i py nang ly ati mana nai ngamjo ngamnau ai cheh lawh? Mana nai y ngamjo ngamnau ai tahm khai y lawh? Achi bawibawi ly Tameuh i tara chih nai atehra mo y angdo ai nai tla;

¹¹ “Areng my ly, ‘Khumi cheaungkhang kai i mo y meung ai i, Palai cheaungkhang py Tameuh teng y ahui ai, nanai Vaineng ka-beu nai ne,’ napi, nanai tajiu nai ne.

¹² Hunaibaly achi bawibawi ly Tameuh teng y amymy i satang thui pi bawibawi ai nai tla.

Amjo amnauchi atlym hai ai nai so moh

¹³ Hunai deaungkho y acheh u bi reng moh jau sina; ami py amy i amjo amnau ai paka ai nai mo, atlym hai ai nai mo so y ai nai phai tau sy.

¹⁴ Atiti py ne sy, huni kypkyp y ly chai y naira ati sai py by y leang, nanai kai ly Areng Isu y khri pa-rei kapany na: atiti chai y nai palawn nai keung i vui naini chai y nai teu.

¹⁵ Nang ly atiti cha nai deaungkho y ngamjo ngamnau ai paleung mawn hai lawh baly, nang ly tamen naira y tako nai ny y leang bo. Nang i atiti cha nai deaungkho y Krista my ang dei pi nai khumi ai ly tamo hai moh.

¹⁶ Hunaibaly nangchi i vui ly hawi napi naira ly kamngo tla, nanai thui nai awm moh sy:

¹⁷ Tameuh i peang naira ly cha ai nai hawi nei ai nai molam ny y leang, hawi naira hawi, aly naira hawi, Phailo Kachai y kawn naira hawi teu.

¹⁸ Ami py huni kamta Krista i kalop sa nai khumi ai ly Tameuh my kawn i, khumichi py palo.

¹⁹ Hunaibaly achi ly aly ai naira hawi akhaw hai leungtang ai nai atitichi ai hui u sina.

²⁰ Atiti cha nai deaungkho y Tameuh i sa nai ly taphra moh. Atitichi bawibawi ly chai takengkei nai bo, na i py atiti cha iy amichi ai atlym hai baly, huni cha nai keung i vui ly kamngo tla.

²¹ Ngamjo ngamnau atlym ai naira ne lawh baly, mawi cho y ai nai hawi, kreip athai hang nei y ai nai hawi, atiti sai py so y ai nai ly hawi keh nai ne.

²² Nang i ym naira awm nai ly Tameuh hawi nang i sala y awm palai sy. Atiti avo, na naira y ly apsum y nai khumi ly taham hawi.

²³ Na i py ym thai y kyh nai khumi my cha baly, ym naira y cho y nai deaungkho y sum naira nga nai ne; naibaly ym naira abawi y nai atiti sa nai ly kamngo tla.