ROM AVANGCHI TENG Y PAWLA I CHA PA NAI 10 - Khumi Common Language Bible

¹ Amjo amnauchi awi, kai i paleung i kangai hawi mymychi i vui y Tameuh teng y chiu kasa pi nai ly, nichi ly hengra nga u thai ai nai ne.

² Nichi ly Tameuh mang y dawn u patyp, nanai kapany hai nai ne, ne mang ly pany angym nai kamta ny y leang.

³ Nichi ly Tameuh i hawi naira pany y naimy, mymychi i hawi naira khaw hai ai nai tau iy, Tameuh i hawi naira y apei u y lawh.

⁴ Krista my ym nai ngiereichi ai hawi naira nga hai thai ai nai reita ai anawn hai nai keung ne.

Khumi cheng cheaungkhangchi i vui atleu naira

⁵ Mosi my ly, “reita i hawi naira patawm nai keung ly huni deaungkho y heng ai,” nanai tajiu bo.

⁶ Na i py ym naira i hawi naira ly hina nai thui: Nangchi i paleung y, “kani pri mang y ami lyn ai mo?” nanai mo (huni ly Krista ai salo mang i dengdairei pahawi kathiu ai nai, nanai sai ne); ti y baly,

⁷ “Angawm kalawi by y naira y ami kathiu ai mo?” nanai mo (huni ly Krista ai kadeichi theung i nai pahawi kalau bi ai nai, nanai sai ne,) ti moh, nanai thui.

⁸ Huni ly ati thui mo? Leu my ly ang kasa, nang i labeaung y hawi nang i paleung y py awm, nanai thui; huni ly kaichi i kang thui pi reng nai ym nai leu ne:

⁹ ati mana nai mo nabaly Isu ly Areng ne, nanai nang ly nang i labeaung y pany hai iy, Tameuh my mymy ai ly kadeichi theung i nai pathau, nanai paleung y ym baly nang ly hengra nga ai.

¹⁰ Amichi my paleung y ym u iy hawi naira nga; naibaly labeaung y pany hai u iy heng naira nga.

¹¹ Tameuh i cha-iu ly, “Ami py mymy ai ym nai ngierei ly amthang leaung y ai,” napi nai ne.

¹² Juda hawi Krik hawi ly atira y py takhra lawh y leang, leaungrei ly nichi bawibawichi i tlang tleaung y Areng ne; naibaly mymy ai palau nai ngiereichi i tlang tleaung y mymy i neaung hawi nai sai ka-teng ny y.

¹³ Ne, “Ami py Areng i amyn palau nai ngierei ly hengra nga ai,” napi nai ne.

¹⁴ Hunaibaly nichi ly mychi i ym y nai keung ai ly mana palau u ai mo? Mymy i satang thai y naichi ly mymy ai mana ym u ai mo? Naibaly leu thui pi nai keung by y naimy mana thai u ai mo?

¹⁵ Naibaly pato nai ny y baly leu ly mana thui u ai mo? “Atiti Satang Kahawi kawn ai awm nai tym hai nai keungchi i kheu ly khri pa-rei apu na ly, nanai tajiu nai kamta.

¹⁶ Na i py nichi bawibawi ly Satang Kahawi ym bawi y leang. Ati mana nai mo nabaly Isaia my ly, “Areng awi, kaichi i leu thui nai ly ami ym mo?” napi lawh.

¹⁷ Hunaibaly ym naira ly thai naira deaungkho y awm, naibaly thai naira ly Krista i leu deaungkho y awm,

¹⁸ Na i py kai ly napi, Nichi ly thai u y nai sai a? Thai u chy y; “Nichi i katyn ly meingtym tleirei y amthang iy Nichi i leu ly khuteng taki y tym pa-rei amthang bo,” napi nai ne.

¹⁹ Tumbaly Israelachi ly pany u y nai sai a? Mosi my thui manme i, “Cheng, nanai amyn pathi y naichi ai teaung iy kaimy nangchi ai kang takho hai ai; Pany thai naira by y nai cheng ai teaung iy Kaimy nangchi ai kado kang patheu hai ai,” napi.

²⁰ Naibaly Isaia ly vam parai pa-rei my, “Kai ai hau y naichi my kai ai avum bo,’ Kai ai palau y naichi teng y kamteng hai nai awm,” napi.

²¹ Na i py mymy ly Israelachi i molam y ly, Leu tangai y nai hawi aawi naichi teng y Kani khengrei kai kiu jaha na ly,” napi.