PHILEMON 1 - Khumi Common Language Bible

¹ Pawla, Krista Isu deaungkho y theaung tla nai khumi hawi, kaichi i amjo amnau Timothei ly, kaichi i ngai parai nai hawi sa akawm ahawi nai Philemon teng y py, achi i tuicho Aphia teng y py,

² kaichi i tavaimi ahawi Arkipa teng y py, nang i yhm y palau takhra kamkawm teng y py,

³ Tameuh achi i Ampo hawi Areng Isu Krista teng i dengdairei pahenra hawi awmnem naira py nangchi teng y awm sy.

Philemon i tamen nai hawi ym nai

⁴ Areng Isu mang y hawi, khumi kachai bawibawichi mang y py nang i tamen naira hawi ym naira awm nai ly kathai reng nai deaungkho y,

⁵ nang i ym naira amkawm nai ly Krista mang y achi i vui awm nai atiti kahawi cheaungkhang pany angym naira y ly chawn thai ai nai,

⁶ kai i chiu sa naira y ly nang i amyn katabawi jojo iy, kai i Tameuh teng y kawn nai leu kathui reng.

⁷ Amjo amnau awi, nangmy i saho y khumi kachai bawibawichi i paleung amcheng veng lawh nai deaungkho y nang i tamen naira y ly amo katheu iy, khri pa-rei kaawm nem lawh veng.

Onesima i vui takeng pi nai

⁸ Hunai deaungkho y sa ai avo nai ryrei ly leu kang pei ai nai Krista y ly kavam teu i py,

⁹ huni ny y naimy Pawla, miteaung pui nai, vai Krista Isu deaungkho y theaung tla nai khumi ne iy, tamen naira deaungkho y kang takeng.

¹⁰ Kai i chanau kawm nai thym kha y katapen nai Onesima i vui y kang takeng pi;

¹¹ jangni y mymy ly nang i vui aly len y, vai naini nang i vui hawi kai i vui py aly len lawh veng;

¹² mymy kypkyp ai ly, kai i paleung khypkhyp ai ly nang teng y kang pato bi bo;

¹³ Satang Kahawi deaungkho y kawm naira y mymy ly nang i jeng y kai ai ang sabawm thai ai nai mymy ai ly kai teng y awm hai jo ai nai kangai parai;

¹⁴ na i py nang i kahawi sa naira ly sa tanga ai nai tla nai kamta ny y naimy, nang i ngaingai sa nai kamta lawn thai ai nai, nang i leu ny y baly ati sai py sa ai nai kangai y leang.

¹⁵ Nang ly mymy ai deungtasarei nga jojo ai nai mymy ai ly nang hawi kra y nai sala chy y taprei nai ne lym ai chy bo:

¹⁶ miseaung kamta ny y naimy, miseaung tleaung y hawi nai, amjo amnau ngai parai nai kamta, kai i vui ne khyp, nang i vui ipsaly tlang y hawi Areng y ly ne nai tleaung y ne kehkeh.

¹⁷ Hunaibaly nang ly kai ai ahawi kamta palawn baly, mymy ai kaimy ai kamta kawn kyh ba.

¹⁸ Na i py mymy ly nang i tlang tleaung y atitira y hawi y sa nai mo, atiti kalai mo awm baly, kai i kamta palwn kyh ba;

¹⁹ kai, Pawla ly, kaimy i kiu kypkyp y katajiu nai he, kaimy kaheung pi ai; ne mang ly nang ly nangmy kypkyp ai kai ai pe ai awm teang nai ly kang thui pi nai ny y leang.

²⁰ Ne, amjo amnau awi, nangmy deaungkho y Areng y ly kai ai kawn naira ngo hai ly; Krista y ly kai i paleung amcheng hai kyh.

²¹ Nang ly kai i thui pi nai tleaung y py sa keh ai, nanai kapany nai deaungkho y nang leu tangai ai nai athang kakhai khyp nai y nang teng y katajiu nai he.

²² Ati py ne sy, kai i anga naira so pi rym kyh: nangchi i chiu sa nairachi deaungkho y nangchi teng y kai ai ang pei ai, nanai athang kakhai.

Kangkhym i kawn nai leu

²³ Krista Isu deaungkho y kai hawi theaung tla ahawi nai Epaphra hawi,

²⁴ kai i kalop sa ahawi nai Marka py, Aristarka py, Dema py, Luka my py nang teng y kawn nai leu ang thui pi.

²⁵ Achi i Areng Isu Krista i pahenra ly nang i phailo teng y awm sy. Amen.