NEHEMIA 9 - Khumi Common Language Bible

Khumichi ly mymychi i kamngo ahui u nai

^1-2 Huni lo kani 24rei kani y Israela chengchi ly mymychi i kamngo molam y, paleung si nai ka-ma-ra paisiuchi amchiu u iy, lu y spryh aphui u; naibaly nichi ly mymychi i kamngo hawi amsi pajochi i kamngochi pany hai iy uikheih u bo.

³ Nichi ly mymychi i Areng Tameuh i Reita leu phain nai ai nari thomrei tangai u chum baly, huni bo i nari thomrei ly mymychi i kamngo ahui u naimy, mymychi i Areng Tameuh ai chiu u nai ne.

⁴ Levi theaungchi i vui sa pi yb nai chang salo y Jeshua, Bani, Kamiela, Shebaniah, Buni, Sherebiah, Bani hawi Khenanichi ly angdo u iy, mymychi i Areng Tameuh teng y aeu naimy chiu sa u bo.

⁵ Naibaly Levi theaung Jeshua, Kamiela, Bani. Hashabaniah, Sherebiah, Hodiah, Shebaniah hawi Pethahiahchi my, “Angthau ly nangchi i Areng Tameuh ai palo u; mymy ai ly deungtasarei palo u! Tameuh ly khumichi my palo nai tleaung y phum-ang nang parai nai keung ne iy, achi bawibawi tleaung y amyn nang parai nai y palo u sina,” nanai chiu sa amteaung ai nai khumichi ai palau u bo.

Kamngo ahui nai chiu sa nai

⁶ Naibaly Israela chengchi ly hina nai kamta chiu sa u bo: “Aw Areng, nang naini Areng ne; nang ly kani khusang hawi kani mang i ka-sichi ai py sa. Khaileaung hawi pangli py, khaileaung salo hawi pangli theung y awm nai bawibawichi ai py sa; nang ly ati cheaungkhangchi ai py heng hai bo. Kani mang i ka-si taukichi ly nang ai lu meung naimy chiu u nai ne.

⁷ Aw Areng Tameuh, nang ly Abram ai vawi takhra iy Babulon pri Ura mary i nai theu hai i, ni i amyn ai ly Abraham, nanai amyn pathi palai pi bo.

⁸ Nang i tlang tleaung y ka-ym awm nai khumi, nanai niu nai deaungkho y, nang ly ni hawi Leu Maikawm asa bo. Ni i katu chanauchi awm ai nai i vui y, ni teng y Kanan pri, Hiti pri, Amori pri, Perizi pri, Jebusi pri hawi Kirakashi prichi pei ai nai adeu bo. Nang ly ka-ym awm nai keung ne nai deaungkho y, adeu nai leu khaw hai ai.

⁹ “Kaichi i amsi pajochi ly Aikupta pri y patang naira avum nai nang ly niu; pangli kamsenra y nichi aeu iy kasabawmra hnei nai raawi py nang ly thai.

¹⁰ Samrang Pharao i bangtangchi hawi khumi mipuichi ly nang i khumichi ai pahyp y naimy ana nai deaungkho y, nichi teng y nang ly lyh ai hawi parai nai ka-ma-rachi patei iy, pajengra tym hai bo. Huna nai y nang ly vaini khrairei amthang nai ne.

¹¹ Nang ly nangmy i khumichi i vui pangli angpeang ai nai lam sa pi iy, nichi ai khaileaung kaphui salo y tako hai bo. Nichi ai patiu ai nai hui naichi ai ly pangli tui sampyh theung y lengseaung tup nai kamta anum hai nai ne.

¹² Nang ly nangmy i khumichi ai kanithun y tamai hawi lam patei iy, vum y ly nichi i lam y maiteaung hawi angvang hai.

¹³ Nang ly kani mang i dengdairei satla kathiu iy, Sinai mawi y nang i khumichi ai leu pei bo; nichi teng y hawi parai nai reitachi hawi, parip nai leu kahawichi pei pi nai ne.

¹⁴ Nang ly nichi teng y anawn kani ai kani kachai palawn iy, ja ai nai leu pei, nang my i miseaung Mosi dengdairei Reitachi pei pi bo.

¹⁵ “Nichi kajeu alam u nai khala y kani mang i dengdairei teicha teinei pala pi iy, tui ahai u nai khala y lengseaung theung i theu nai tui pei pi. Nangmy pei ai, nanai adeu nai pri peang vui ai nai nichi teng y leu pei nai ne.

¹⁶ Na i py kaichi i amsi pajochi ly amlyh am-e naimy paleung tang u iy leu pei nai tangai u y.

¹⁷ Nichi ly nang i leu tangai u y; nang i sa pi naichi tami vui; nang i patei pi nai rengrang ka-ma-rachi py pany y veng bo. Amlyh am-e naimy miseaung achei nai Aikupta pri mang y hawi ali teang ai nai lu sa nai leaungrei ai vawi takhra u nai ne. Na i py nang ly kamngochi pahen pi nai Tameuh ne; neaung hawi iy paleung sau. Pahen naira ly len parai nai deaungkho y, nang ly nichi ai khai su y nai ne.

¹⁸ Nichi ly si cho myn sa u iy hini tameuh ly achi ai Aikupta pri i dengdairei pahawi nai tameuh teu bo!” nanai thui u. Aw Areng, nichi ly nang i tlang tleaung y khri pa-rei mei aniu y na lawh ly!

¹⁹ Na i py nang i pahen naira ly len parai nai deaungkho y, nang ly nichi ai khutaha daichi ka-vym y khai su y. Kanithun y lam patei nai tamai py, vum y nichi i khuleaung lam y angvang hai nai maiteaung py, lo pi veng y nai ne.

²⁰ Nang ly neaung hawi nai deaungkho y nichi i sa ai avo naichi lam patei pi; nichi ai Manna tako hawi pacho iy nei ai nai tui py pei.

²¹ Saneng vui palyhrei khutaha daichi ka-vym theung y nang ly nichi i ngai nai ryrei teicha teinei pei pi; nichi i ateaungchi ly mana khala py mawn hai y, nichi i kheu py tamo kalem ngo hai vai y nai ne.

²² “Nang ly nichi ai mymychi i khujyhra y awm nai prichi hawi, khumichi ai eaung ai nai pei bo. Nichi ly samrang Sihon my peang nai Hesabon pri py, samrang Oka my peang nai Bashan pri py peang u bo.

²³ Nang ly nichi ai kani mang i ka-sichi kamta, nawi parai nai cho chanauchi pei pi bo; naibaly nichi i amsi pajochi teng y nangmy i adeu nai pri peang hai iy, huni pri y awm hai nai ne.

²⁴ Nichi ly Kanan pri ai peang u; huni pri y awm nai khumichi ai nangmy tiu vui bo. Nang ly nangmy i khumichi teng y Kanan pri samrangchi hawi mipuichi ai, ngai nai kamta sa pajau ai nai sa thai naira pei pi.

²⁵ Nang i khumichi ly amtangra marychi, paitiu khuta hawi nai pri, yhmtheaung katui cheaungkhang awm angym nai yhmchi, tai yb nai tuikanchi, olive keungchi, thengthai keungchi hawi kreip akhochi peang u nai ne. Nichi ly ngai nai ryrei cha nei u iy, veung hawi u; nang i pei nai hawi nairachi amtym u bo.

²⁶ “Na i py nang i khumichi ly nang ai tiu iy, nang i leu tangai u y; nichi ly nang i Reita leu pei naichi khai u su nai ne. mymychi ai pany hai nai keung, mymychi ai nang teng y ali teaung ai nai thui pi nai keung amochi ai padei u. Nichi ly nang i tlang tleaung y avawrei mei aniu u y nai ne.

²⁷ Huna nai y nang ly paleung ka-echi teng y, nichi ai peang vui ai nai pei bo. Nichi patang naira avum nai khala ly kasabawmra nga ai nai, nang teng y aeu u. Hunaibaly nang ly kani pri mang dengdairei thai iy, pahen naira len parai nai hawimy, nichi ai paleung ka-echi kiu i nai atleu ai nai, lu sa naichi ai pato pi.

²⁸ Tlamsa naira nga u ali teang nai khala y nichi ly kamngo sa u bi nai y, nang ly nichi ai paleung ka-echi i kiu y au ali teang bi bo. Na i py nichi ly uikheih naimy nichi ai atleu ai nai nang teng y hnei takeng nai khala y nang ly kani pri mang dengdairei pathang pi bo. Pahen naira len parai nai deaungkho y, nichi ai avaw avawrei atleu nai ne.

²⁹ Nang ly nangmy i parip nai leu nichi tangai ai nai pany hai bo; Reita leu pei nai patawm nai ly mymychi tlang hengra lam ne i py, nichi ly amlyh am-e naimy nang i leuchi khai u su nai ne. Nichi ly khri pa-rei paleung tang nai y, nang i leu tangai y naimy awm u.

³⁰ Nang ly nichi i tlang tleaung y saneng tlei tleirei neaung kham naimy pany hai bo. Nang i pany hai nai keung amochi my thui parip u teu i py, nang i khumichi ly kano pang u nai ne. Huna nai y nang ly cheng takhra khumichi teng y nang i khumichi ai tiu ai nai pei bo.

³¹ Na i py pahen naira len parai nai hawimy, nang ly nichi ai khai su y nai ne; Phra naira hawi tama naira y tym hai y. Nang ly tamen iy pahen naira hawi angym nai keung Tameuh ne na a!

³² “Aw Tameuh, kaichi i Tameuh, nang ly khri pa-rei tahm asang parai na ly! Khri pa-rei jei hyn ai nai hawi iy, sa thai naira len parai na ly! Nang ly nangmy i Leu Maikawm molam adeu naichi ai ka-ym awm naimy kry bo. Kaichi ly kaimychi teng y Asuria samrangchi my ana kali kachi nai neng dengdairei, vaini khrairei ngari kamtang ka-vum u na bo ly! Kaichi i samrangchi, lu sa naichi, pathyp pi nai keungchi, amochi, kaimychi i amsi pajochi hawi mipui bawibawichi ly ngari kamtang avum u bo. Kaichi mana tanrei ngari kamtang avum mo, nanai pany pi jo kyh ba!

³³ Kaichi i tlang tleaung y nangmy pajengra tym hai nai ly hawi khyp nai bo; kaichi ly kamngo sa tamang u teu i py, nang ly ka-ym awm nai ne.

³⁴ Kaichi i amsi pajochi, samrangchi, lu sa naichi hawi pathyp pi nai keungchi ly nang i Reita leu pei nai ai patawm u y nai ne. Nichi ly nang i leu pei naichi, pany hai naichi tangai u y.

³⁵ Kaichi i samrangchi ly nang i pei nai kau parai nai hawi apu parai nai pri theung y awm ai nga nai thym khala y, nang teng i amtheaung naira nga nai hawimy, nang i khumichi ai peang ai nai nga u nai ne. Na i py nichi ly kamngo ai en vui y, nang i kalop ai py so u y.

³⁶ Naibaly vai kaichi ly nangmy cha ai pei nai thengthai, amti amjang takang y nai pri y miseaung kalawn u bo.

³⁷ Kaichi ly kamngo sa tamang nai deaungkho y, hini pri i theu nai amti amjangchi ly kaichi ai nangmy peang hai nai samrangchi my amtym u veng nai ne. Huni samrangchi ly kaichi hawi kaichi i tawnbawichi ai, mymychi ngaingai teaung u. Hunai deaungkho y kaichi ly khri pa-rei patang u nai ne.

Adeu nai leu ai mipuichi lamai nip u nai

³⁸ Hini atitichi molam y kaichi Israela mipuichi ly adeu nai leu ai cha hawi tajiu iy kaichi i luchi, Levi theaungchi hawi pathyp pi nai keungchi my, pajawp typ nai ka-ma-ra nip u bo.