NEHEMIA 3 - Khumi Common Language Bible

Jerusalem mary apai palum teang nai

¹ Mary apai palum teang nai sai ly hina nai ne: Pathyp pi nai keung kalen keh Eliashib hawi, ni i ahawi pathyp pi nai keungchi ly beram katheu palum teang iy khai takhra i, katheu dawnchi tai u bo. Nichi ly apai chungvai angdeangra hawi Hananela angdeangra y tym pa-rei sa u bo.

² Jeriko mary i khumichi ly mary apai phyrei sa u. Imari i chapo Zakura ly huni bo i phyrei ai sa.

³ Hasenah nupai my ngo katheu sa chum baly, katheu laibeaungchi, katheu dawnchi, katheu angtleangrachi hawi katheu lengteaungchi tai u bo.

⁴ Huni bo i mary apai phyrei ly Hako i katu, Uriah i chapo Meremoth my sa i, huni bo i phyrei ai ly Meshezabela i katu, Berekhiah i chapo Meshulam my sa. Huni bo i phyrei ai Baana i chapo Zadok my sa.

⁵ Huni bo i phyrei ai Tekoa mary i khumichi my sa; na i py mary i miteaung keh kalenchi ly nichi ai pacheang nai keungchi my sa hai nai kalop ai akhi u bo.

⁶ Naibaly Paseah i chapo Jojada hawi, Besodiah i chapo Meshulam nini ly Jeshana katheu pa-kho sa palum chum baly, katheu laibeaungchi, katheu dawnchi, katheu angtleangrachi hawi katheu lengteaungchi tai u.

⁷ Huni bo i mary apai phyrei ai ly Kibeon mary i Melatiah, Merono mary i khumi Jadon, Kibeon mary i khumichi hawi Mizapa mary i khumichi my, Euphrat tavo nidym khu ka-peang samrang i bangtang kalen i yhm y tym pa-rei sa u nai ne.

⁸ Huni bo i phyrei ai ly Hahaiah i chapo paitheng Uziela my sa. Huni bo i phyrei ai mary apai kakau ryrei, rimui hang sa nai keung Hananiah my sa.

⁹ Hura i chapo Jerusalem mary ka-hyhrei peang nai keung Riphaiah ly huni bo i mary apai phyrei ai sa.

¹⁰ Haruma i chapo Jedaiah ly my i yhm ahawi y awm nai mary apai phyrei ai sa. Hashabaniah i chapo Hattu ly huni bo i phyrei ai sa nai ne.

¹¹ Harim i chapo Malakhijah hawi, Pahat Moba i chapo Hashu nini ly mary apai phyrei hawi tako takeang angdeangra ai sa hawi bo.

¹² Hallohe i chapo Jerusalem mary ka-hyhrei peang nai keung Shalum ly huni bo i phyrei ai sa. (Sa nai kalopra y my i chaniuchi my sabawm nai ne.)

¹³ Hanun hawi Zanoah mary i khumichi ly leaunghawi katheu pa-kho palum u chum baly, katheu dawnchi, katheu angtleangrachi hawi, katheu lengteaungchi tai u; naibaly apai kasau miu 1,000 rei ai anyn angso aphira katheu pa-kho ryrei sa u nai ne.

¹⁴ Rekha i chapo Beth Hakhirem ka-peang ai peang nai keung Malakhijah ly anyn angso aphira katheu pa-kho sa palum teang i, katheu dawnchi, katheu angtleangrachi hawi, katheu lengteaungchi tai.

¹⁵ Kolahozeh i chapo, Mizapa ka-peang ai peang nai keung Shalum ly tuipum katheu pa-kho palum teang iy amphu tabiu i, katheu dawnchi, katheu angtleangrachi hawi, katheu lengteaungchi tai; ni ly samrang i akho sahawi, Siloh tuikanra i mary apai ai Davida i mary khaileira tym pa-rei sa nai ne.

¹⁶ Azabu i chapo Betzura ka-peang ka-hyhrei ai peang nai keung Nehemia ly huni bo i mary apai phyrei ai Davida i tapreaung, tuikan hawi tavaimichi awmra yhm kasauchi ryrei sa nai ne.

Mary apai sa nai Levi theaungchi

¹⁷ Anui mang i Levi theaungchi ly mary apai sa nai kalopra y sabawm nai khumichi ne Bani i chapo Rehum ly mary apai phyrei ai sa; Keila ka-peang ka-hyhrei ai peang nai keung Hashabiah ly huni bo i ka-hyhrei ai, my i ka-peang jeng y sa.

¹⁸ Huni bo i ka-hyhrei ly Hanada i chapo Keia ka-peang ka-hyhrei ai peang nai keung Bavawi my sa.

¹⁹ Jeshua i chapo, Mizapa mary ai peang nai keung Ezera ly tavai ateaungchi khai nai yhm pui mo i mary apai ai, mary taki ryrei sa.

²⁰ Huni bo i ka-hyhrei ai Zabai i chapo Baru ly pathyp pi nai keung kalen keh Eliashib i yhm apai pa-kho ryrei sa.

²¹ Huni bo i phyrei ai Hako i katu, Uriah i chapo Meremoth ly Eliashib i yhm kachawn ryrei sa nai ne.

Mary apai sa nai pathyp pi nai keungchi

²² Anui mang i pathyp pi nai keungchi ly mary apai sa naira y sabawm naichi ne: Jerusalem mary tengpang sahawi y awm nai khu ka-peang theung i pathyp pi nai keungchi ly mary apai phyrei ai sa u bo.

²³ Huni bo i ka-hyhrei ai Benjamin hawi Hashuchi my, mychi i yhm mo kataw i apai sa u; Ananiah i katu, Maseja i chapo Azariah ly my i yhm mo katawra i apai phyrei ai sa.

²⁴ Henada i chapo Binnui ly huni bo i phyrei ai, Azariah i yhm dengdai mary taki ryrei sa.

^25-26 Uzai i chapo Palal ly mary apai taki hawi, tamcheaung typ nai yhm apai sahawi i samrang yhm angdeangra dengdai amteaung iy, mary apai phyrei ai sa; Parosh i chapo Pedaiah ly huni bo i phyrei ai, nisi mang i tui apai pa-kho hawi Achura yhm tamcheaung typ nai angdeangra sahawi y tym pa-rei sa. (Hini meingtym ly Achura yhm kalop sa naichi awm nai Jerusalem mary i Ophel, napi nai saleaung y awm nai ne.)

Takhra sa nai khumichi

²⁷ Tekoa mary i khumichi ly Achura yhm tamcheaung typ nai angdeangra yhm pui dengdairei, huni hawi adengdang nai Ophel meingtym mary apai sahawi y tym pa-rei, huni bo i mary apai phyrei ai tlen pa-nyh sa u.

²⁸ Huni bo i phyrei ai pathyp pi nai keung kamkawm harei my, keaungngo apai pa-kho dengdairei tosyh mang, mychi i yhm mo kataw ryrei sa.

²⁹ Immera i chapo Zadok ly my i yhm mo i, mary apai phyrei sa. Naibaly Shekaniah i chapo, nisi apai pa-kho typ nai keung Shemaiah ly mary apai phyrei sa.

³⁰ Shelemiah i chapo Hananiah hawi Zalap i tariu chapo Hanun nini ly mary apai phyrei ai tlen pa-nyh sa. Huni bo i phyrei ai Berekhia i chapo Meshulam ly my i yhm mo i mary apai sa.

³¹ Paitheng Malakhia ly Achura yhm i Miphaka katheu pa-kho hawi, mary apai nisi mang tosyh taki salo y awm nai takun sahawi, Achura yhm y kalop sa naichi hawi, ka-sum ka-pai sa nai khumichi i yhm ryrei, mary apai phyrei sa.

³² Kangkhym i mary apai ai ly paithengchi hawi, ka-sum ka-pai sa nai khumichi my, huni mary apai taki dengdairei beram katheu pa-kho tym pa-rei sa u nai ne.