NEHEMIA 13 - Khumi Common Language Bible

Cheng takhrachi hawi amprei u nai

¹ Naibaly huni kani y Mosi i Reita leu pei nai ai khumichi i mo y phain u i, Ammon chengchi hawi Moba chengchi ai, Tameuh i khumichi theung y mana khala py tabawi pajau y, nanai leu sai tym bo.

² Ati mana nai mo na baly Ammon hawi Moba khumichi ly Israela chengchi Aikupta pri i dengdairei theu u nai thym khala y, teicha teinei hawi tui py pei y nai deaungkho y ne. Huni khyh chang y i, Balam ai alai iy Israela chengchi ai pasawi hai bo. Na i py kaichi i Tameuh ly huni amsawi leu ai amtheaung hai nai leu mang y lawm hai nai ne.

³ Huni Reita cha-iu phain pi nai thai u nai khala y, Israela chengchi ly mymychi kamkawm theung i nai cheng takhrachi ai patheu u bo.

Nehemia i sa palai vui naichi

⁴ Achura yhm vawnsai khaira takunchi kry nai pathyp pi nai keung Eliashib ly Tobiah hawi ahawi amrawi nai deaungkho y,

⁵ cha nei katalamrachi, mui katuichi, Achura yhm i vui ateaung alangchi, pathyp pi nai keungchi i vui katalamrachi hawi Levi theaung Achura yhm katyn kapau beu nai keungchi, Achura yhm tamcheaung typ nai risachi i vui horei y harei talam nai choh, kreip hang hawi olive asituichi khai ai naini teaung nai takun kalen pui ly Tobiah ai teaung ai nai pei pi nai ne.

⁶ Hina nai thym khala y kai ly Jerusalem mary y by y; Babulon samrang Artazeret i peang nai saneng 32 rei neng khala y, kai ly sa nai saichi amti pi ai nai kachei nai neng ne. Neng kra y nai sala y kai ly samrang teng i leu nga nai deaungkho y,

⁷ Jerusalem mary y tym teang i, Achura yhm theung i takun harei ai Tobiah teaung ai nai Eliashib my pei pi veng bo, nanai kathai nai khala y kai ly athengra i,

⁸ khri pa-rei kado theu nai y, Tobiah i vawnsai bawibawichi patheu pi pawn bo.

⁹ Kaimy takunchi ai Reita leaungsai kamta kachai sa hai teang iy, Achura yhm i ateaung alangchi, cha nei katalamrachi hawi mui katuichi pakun ali teang ai nai leu pei bo.

¹⁰ Naibaly Levi theaungchi hawi Achura yhm katyn kapau beu kawp naichi ly teicha teinei ka-leu pa-rei ngo u y nai deaungkho y, mymychi i li hlauchi awm nai mang y vawi u nai satang kathai nai ne.

¹¹ Huna nai Achura yhm khai su ai nai leu pei nai peang nai keungchi ai kajosei bo. Levi theaungchi hawi katyn kapau beu kawp naichi ai Achura yhm mang y palau iy, kalop sa hai ali teang nai ne.

¹² Hunaibaly Israela cheng bawibawichi ly mymychi i horei y harei talam nai choh, kreip hang hawi olive asituichi ai Achura yhm vawnsai khai nai takunchi mang y syn u bo.

¹³ Kai ly pathyp pi nai keung Shelemiah, reita leu kawp nai Zadok hawi Levi khumi Pedaiah ai, vawnsai kry nai kalop khai takhra bo. Mattaniah i katu, Zakura i chapo Hanan ai ly nichi i bangtang y khai; hinichi ly mymychi hawi vanrei kalop sa ahawi naichi teng y, ka-ym awm parai naimy cha nei vawn paji pi ai, nanai kai ly ym nai ne.

¹⁴ Aw kai i Tameuh, nang i Achura yhm i vui hawi Achura yhm y chiu sa achu nai molam y, kai i sa nai leaungsaichi pany pi jo kyh ba.

¹⁵ Huni neng khala y Juda mipui phyreichi ly anawn kani y kreip athai hang nip u nai py, phyreichi ly choh, kreip hang, kreip athai hawi thaidu athaichi ai, mymychi i keaungngo kano kasauchi tleaung y tang iy, Jerusalem mary mang y syn naichi py kaniu. Hunai deaungkho y anawn kani y ly ati sai py jo y ai nai, nichi teng y leu kapei nai ne.

¹⁶ Jerusalem mary y awm nai Turu mary i khumi phyreichi ly ngo hawi takhra vawnsaichi ai, kaichi i chengchi teng y anawn kani y jo ai nai syn u bo.

¹⁷ Hunaibaly kai ly Juda luchi teng y, “Nangmychi i hawi y sa naichi khen u cham! Nangchi ly anawn kani y chai hai y lawh bo.

¹⁸ Nangchi i amsi pajochi ly huna nai kamngo sa u nai deaungkho y, Tameuh ly hini mary ai taphra hai nai hawimy, nichi ai pajeng nai ne. Vaini nangchi ly anawn kani chai hai y nai molam y, Israela chengchi tlang tleaung y Tameuh i kado theu naira ly khri pa-rei tym hai ra ai bo a?,” nanai thui.

¹⁹ Hunai deaungkho y kai ly anawn kani i vui angveirym nai kani dymmo dengdairei anawn kani, kani dym nairyrei mary apai katheuchi kho typ ai nai leu pei bo. Anawn kani y mani vawnsaichi py mary theung y pakun y ai nai, kai ly khumi phyreichi ai mary katheu pa-khochira y typ hai nai ne.

²⁰ Vawnsai amjy cheaungkhang jo nai, ka-sum ka-pai sa nai phyreichi ly seukra kani dym y, mary katheu pa-kho angam mang y i u bo. Nichi ly huna nai kamta tlenrei, tlen nyhrei sa u nai ne.

²¹ Kai ly nichi teng y, “Nangchi ly khutawi pa-rei mary angam mang y ajeng u teu i py, atyhtyh teu; nangchi vai tlenrei hina nai sa u baly, kai ly nangchi ai khrukhra hai naira kang tym hai iy, kang paryh pawn ai,” napi. Huna khala i dengdairei nichi ly anawn kani y jeu u y bo.

²² Anawn kani y chai hai ai nai molam Levi theaungchi teng y, amymy ai apachai chum baly mary apai katheu pa-kho mang y chei iy typ ai nai kaimy leu kang pei bo. Aw Tameuh, hini molam y py dawn iy, kai ai pany jo ba; ati mana nai mo na baly tamen naira len parai nai hawimy, kai ai pahen ba.

²³ Huni neng khala y Juda cheng neangneangchi malawn py Ashado, Ammon, hawi Moba cheng neampachychi hawi apom u nai py kai avum nai ne.

²⁴ Nichi i cho chanau ka-hyhreichi ly kaichi i leu katheu u thai y; Ashado, ti y baly takhra leu ha harei naini, katheu u thai khyh.

²⁵ Hunai deaungkho y kai ly huni neampachochi ai amsawi amtlau hawi josei naimy, kapakhau nai ne. Nichi i sam py katheng. Naibaly kaichi py, kaichi i cho chanau py, mo mang y ly mana khala py cheng takhra khumichi hawi yhmtheaung kaso y leang bo, nanai nichi teng y Tameuh i amyn y vaineng abeu hai bo.

²⁶ Kai ly nichi teng y, “Samrang Solomon ai kamngo sa hai nai khumichi ly cheng takhra neampachychi ne. Huni samrang ly cheng takhra khumichi i samrang bawibawichi tleaung y sa thai naira len keh. Tameuh ly ni ai tamen nai deaungkho y, Israela pri verei y peang hai nai ne. Na i py ni ly cheng takhra neampachychi hawi apom nai kamngo sa bo.

²⁷ Huna nai y kaichi ly cheng takhra neampachychi hawi apom nai nangchi i sa nai sai molam y, Tameuh i tlang tleaung y kamngo sa ai a?,” napi.

²⁸ Jojada ly pathyp pi nai keung kalen keh Eliashib i chapo ne. Na i py ni i chapo leaungrei ly Beth Horon mary i Sanbala i chaniu hawi yhmtheaung sa nai deaungkho y, kai ly Jojada ai Jerusalem mary i nai kapatheu vui bo.

²⁹ Aw Tameuh, huni khumichi ly pathyp pi nai keung kalop py, pathyp pi nai keungchi hawi Levi theaungchi teng y nangmy sa nai leu Maikawm py, mana tahm khai u y na mo, nanai pany ba.

³⁰ Kai ly mipuichi ai cheng takhra khumichi hawi amtawn abi nai leaungsai ngiereichi asyn hai nai ne. Pathyp pi nai keungchi hawi Levi theaungchi teng y mymychi i kalop cheaungkhangchira y, pany thai ai nai reitachi khai pi bo.

³¹ Neng tym baly leng patlum naira y teaung ai nai theng py, choh chuluchi hawi, myn man nai thengthai katalamrachi py, syn u ai nai ka-vo sa nai ne. Aw Tameuh, hini sa nai leaungsaichi ai pany pi ly kaichi ai pahen kyh ba.