MIKHA 7 - Khumi Common Language Bible

Israela chengchi kaja phra nai

¹ Athang khai naira by y leang bo! Kai ly kajeu alam nai deaungkho y, thengthai keung i thengthai athai py, kreip keung i kreip athai py, hau teu i py athairei py niu y nai khumi kamta ne. Kreip athai awm nai ngierei hawi, thaidu athai awm nai ngiereichi ai, jaw u be veng bo.

² Hini pri theung y khumi kahawi, Tameuh ai ka-ym awm nai khumi, nanai leaungrei py by y leang bo. Khumi ai padei ai nai neng ka-pe, khumi luteng ajeng u bo. Amjo amnau tengtawi, leaung leaungrei ai apatym iy apatiu u reng nai ne.

³ Nichi ly hawi y sa ai naira y kawp nai khumichi ne. Miteaung kehchi hawi tara chih nai keungchi ly un langseaung hnei u reng nai ne. Sa thai naira haidau awm nai khumi i kangai abang iy, nichi ly hawi y nai katau vanrei dawn u bo.

⁴ Kawp keh, pany keh napi nai khumichi malawn py, acha keung kamta vang teng y nai ne. Tameuh ly nichi ai typ nai tamcheaung lawm nai amochi dengdairei, pany hai nai kamta, khumichi ai Tameuh my pajeng ai nai neng tym bo. Nichi ly vai, tapai taveang u na bo.

⁵ Nangchi i yhm deaungpa ai py, ahawi kamrawi ai py ym u moh. Nangmy i aju teng y malawn py leu amkyn ba.

⁶ Huni neng khala y chapochi my, mychi i ampochi ai tahm khai y ai. Chaniuchi my amhmchi ai ka-awi sa ai. Lengngochi my amni ai ka-jo hau ai. Yhm dengtheungchi i paleung ka-echi ly amychi yhm dengtheung theung i theu ai.

⁷ Na i py kai ly Areng ai ajeng ai. Kai ai atleu ai nai Tameuh ai ym naimy ajeng ai. Kai i Tameuh ly kai i chiu sa nai tangai pi ai.

Areng i atleu nai

⁸ Kaichi i paleung ka-echi ly kaichi i kamngo nai molam y amo theu ai nai lam by y. Kaichi atlym i py, ang thau teang ai. Vai i neng y kaichi ly kaveng theung y awm i py, Areng ly kaichi i tlang tleaung y kangvang sangso tym hai ai.

⁹ Kaichi ly kamngo sa nai deaungkho y, tanarei ly Areng i kado theu nai avum u ai. Na i py mymy ly kangkhym y kaichi i molam ama hai iy, leu meitang naimy tara chih ai. Mymy ly kaichi ai kangvang mang y pahawi ai. Kaichi ly mymy i atleu nai niu takengkei ai.

¹⁰ Huna nai khala, “Nangchi i Areng Tameuh ly ma mang y awm mo?,” nanai panui hai naimy deng u nai, kaichi i paleung ka-echi ly hinichi niu i, kangji nga u ai. Nichi ly sum u nai deaungkho y, lamra i aneaung kapan kamta chiu piupa nai, kaichi niu ai.

¹¹ Jerusalem mary i khumichi awi, mary apaichi ai kangtha sa palai nai neng tym bo. Huna nai khala y nangchi i khu ka-peang ly kau ai.

¹² Nangchi i khumichi ly nisi mang Asuria pri dengdairei py, tokalawi mang Aikupta pri dengdairei py, Euphrat tavo jawnbai dengdairei py, palo parai nai panglichi hawi mawichi dengdairei py, nangchi teng y vawi u teang ai.

¹³ Na i py huni pri khumichi kamngo nai molam y, nichi i awm nai meingtymchi ly khumi by y nai daichi ka-vym lawm ai.

Israela chengchi ai Areng my pahen nai

¹⁴ Aw Areng, nangmy vawi takhra nai khumichi ai, beram typ nai keung kamta kry kyh ba. Nichi ly daichi theung y ahei akyhkyh teu i py, huni meingtym i paitiu khuta hawi nai khaileaung my, nichi ai taki teungtareung na sy. Nichi ai jangni khala y achachi peung nai Basan pri hawi Kilead prichira y sui tlai hai nai kamta, vai py hini pri y awm hai ba.

¹⁵ Areng nangmy kaichi ai Aikupta pri i dengdairei pahawi nai thym khala, nangmy sa pi nai rengrang ka-ma-rachi patei pi kyh ba.

¹⁶ Pri tleireichi ly atho awm i py, huni leaungsaichi niu i, jei u nai deaungkho y, mymychi i labeaung hawi kanochi tamym u ai.

¹⁷ Nichi ly pavui kamta speung theung y jawn ai. Nichi ly mychi i amtangra dengdairei jei naimy theu u iy, achi i Areng Tameuh teng y ahihawi u ai.

¹⁸ Aw Areng, nang hawi pata ai nai tameuh takhra by y. Nang ly dei kamthum nang i khumichi my tiu nai kamngo pahen pi bo. Nang ly kado theu jojo y leang. Nang ly kaichi ai pahen.

¹⁹ Nang ly kaichi ai pahen pi bi ai. Nang ly kaichi i kamngochi ai chiu piupa iy, pangli theung y aphi pi vui ai!

²⁰ Nang ly jangni khala, kaichi i amsi pajochi teng y adeu nai kamta, Abraham hawi Jakob i kangpreang lawm nai, nang i khumichi ai ka-ym awm naira hawi khaw parai nai tamen naira pahen naira hawimy hawi naira tym hai ai.