MATTHAI 5 - Khumi Common Language Bible

Mawi salo mang leu thui nai

¹ Hunaibaly mymy ly khumi mipuichi ai niu i mawi y kalau: naibaly mymy ly ateh i mymy teng y abangnaichi ly ni teng y chei u:

² naibaly mymy ly leu thui i nichi ai patiu i,

Taham hawi nai leu sai

³ “Paleung apanem naichi ly taham hawi: kani pri ly mymychi i ne.

⁴ “Paleung mawn naichi ly taham hawi: nichi ai ang awm hai nem ai.

⁵ “Paleung jypjyp naichi ly taham hawi: nichi ly khaileaung pri amtym ai.

⁶ “Hawi naira nga ai nai kajeu kanglam tui kanghai dawn y pa-rei hau naichi ly taham hawi: nichi ly bym pa-rei nga ai.

⁷ “Amichi ai pahen naichi ly taham hawi: nichi ly pahen naira nga ai.

⁸ “Paleung y chai naichi ly taham hawi: nichi ly Tameuh ai niu ai.

⁹ “Aly hai nai keungchi ly taham hawi: nichi ai ly Tameuh i chanauchi pathi ai.

¹⁰ “Hawi nai deaungko y ana nai patang chum naichi ly taham hawi: kani pri ly nichi i ne.

¹¹ “Amichi my kai i molam y nangchi ai ang jo iy ana nai, ka-chawi cheaungkhangra y ang seu nai khala y ly nangchi taham hawi ai.

¹² Kawn u ly, khri pa-rei amo theu u; kani pri mang y nangchi i kawn nai vang ka-teng ny y nai awm; hunai kamta khyp teang nangchi by y rai khala y amochi ai py ana teang ly.

Palawi hawi kangvang

¹³ “Nangchi ly khaileaung pri i palawi ne: na i py palawi ly dau veng baly ati my lum hai bi ai mo? Hunai khala y ly aphi iy khumichi my chiu lyhlyh ai naira y harei ny y baly ati sai py aly by y leang bo.

¹⁴ “Nangchi ly khaileaung pri i kangvang ne. Mawi saleaung y awm nai avang ly heu pajau y.

¹⁵ Naibaly ami my maisi thawn iy teaung anui y khai vai y leang, khai reng naira y naini khai khyh, hunaibaly angtheung y awm nai bawibawichi teng y angvang.

¹⁶ Nangchi i kangvang ly khumichi i mei ka-niu y angvang sy, hunaibaly nangchi i atiti kahawi sa naichi ly nichi niu ai i, nichi ly Ngampo kani pri mang y awm nai ai palo thai ai.

Reita leaungsai patiu nai

¹⁷ “Reita mo amochi i leu mo tama hai ai nai kang jeu nai athang khai u moh; tama hai ai nai kang jeu nai ny y leang, angym hai ai nai kang jeu nai teu.

¹⁸ Meitang khyp kang thui pi, kani khaileaung tamo y ryrei ly Reita i leu maiden chy theung dyp nai mo, maiden chy jyn si nai mo, atiti bawibawi tym angym y ryrei ly ha py tama ai ny y.

¹⁹ Hunaibaly ami py hini leu pei nai jang keh naichi theung y harei py taphra iy, hunai kamta sa teang ai nai khumichi ai patiu nai ngierei ai ly kani pri y tahm anem keh nai khumi, nanai amyn pathi ai; na i py ami py patawm iy patiu pateang nai ngierei ai ly kani pri y khumi kalen, nanai amyn pathi ai.

²⁰ Nangchi i hawi naira ly Reita patiu nai keungchi hawi Pharisaichi i hawi naira y katlen y baly nangchi ly kani pri y pipi kun ai ny y, nanai kang thui pi nai he.

Kado theu nai leaungsai ai parip nai

²¹ “Jangni i khumichi teng y ly, ‘Khumi ai padei moh: ami py khumi ai padei nai ngierei ai ly tara chih ai nai avo, napi, nanai nangchi thai bo.’

²² Na i py kai ly kang thui pi, ami py mymy i amjo amnau i tlang tleaung y kado theu nai ngierei ai ly tara chih ai nai avo; naibaly ami py mymy i amjo amnau teng y, ‘Nang ly ati sai py ny y,’ napi nai ngierei ai ly tara chih nai keungchi i mo y tym hai ai nai avo; naibaly ami py, ‘Nang ly kamthu,’ napi nai ngierei ai ly ngari angawm y aphi ai nai avo.

²³ Hunaibaly nang ly maicham pakeung y atiti pei nai talam thym khyp nai khala y, ngamjo ngamnau my nang i tlang tleaung y paleung hawi y nai atiti awm, nanai nang adawn vau baly,

²⁴ huni maicham mo y nang i atiti talam nai ly daw jo ly, naibaly chei iy ngamjo ngamnau hawi aly manme veng ly, huni bo y chei iy nang i atiti pei nai ly talam.

²⁵ Nang ly nang ai seu nai keung hawi lam y tako hawi nai thym khala y ly aly hai praw, ti y baly seu nai keung ly nang ai tara chih nai keung teng y ang tym hai iy, tara chih nai keung ly pajeng nai keung teng y ang au ai i, theaung y ang peaung lawh na.

²⁶ Meitang khyp kang thui pi pia sei chy py nang pe angym y ryrei ly hu i dengdairei nang pipi theu ai ny y.

Pajang sa nai molam parip nai

²⁷ “ ‘Pajang so moh,’ napi, nanai nangchi thai bo.

²⁸ Na i py kai ly kang thui pi, ami py neampachy ai ngai tahau nai khen seaung eng nai ngierei ly mymy i paleung theung y pajang sa nai bo.

²⁹ Naibaly nang i lamtang mang i mei my nang ai atlym hai baly, takhawi piu ly, aphi la; nang i tlang bomrei ngari angawm y aphi nai tleaung y ly nang i tlang kangprei chy tama nai ly nang i vui hawi keh alam.

³⁰ Naibaly nang i lamtang mang i kiu my nang ai atlym hai baly tameng ly, aphi la; nang i tlang bomrei ngari angawm y tym nai tleaung y ly tlang kangprei harei tama nai ly nang i vui hawi keh alam.

Aju juvo akhai nai molam parip nai

³¹ “ ‘Ami py aju ai khai nai ngierei ly mymy teng y akhai nai cha pei sy,’ napi bi.

³² Na i py kai ly kang thui pi, ami py angai naira ny y naimy aju ai khai nai ngierei ly mymy ai pajang sa hai bo: naibaly ami py juvo my khai nai neampachy ai la nai ngierei ly pajang sa nai bo.

Vaineng abeu nai molam parip nai

³³ “Jangni i khumichi teng y ly, ‘Ka-chawi naimy vaineng abeu moh ly, Areng teng y phai nang i vaineng abeu nai so jojo,’ napi, nanai nangchi thai bo.

³⁴ Na i py kai ly kang thui pi, vaineng den py abeu u reng moh; kani y tauh iy py abeu u reng moh, huni ly Tameuh i areng atehra ne;

³⁵ Khaileaung y tauh iy py abeu u reng moh, huni ly mymy i kheu khai naira ne; Jeursalem y tauh iy py abeu u reng moh, huni ly Nang Parai nai Samrang i avang ne.

³⁶ Ne, nang i lu y tauh iy py abeu ai nai avo y, nang ly sam amairei py kaleung hai thai y, panum py panum hai thai y leang.

³⁷ Na i py nangchi i thui nai ly ‘Ne,’ nanai ly ‘Ne nai’ ne sy, ‘Ny y,’ nanai ly ‘Ny y nai,’ ne sy; huni tleaung y apo thui nai ly kamngo dengdairei theu nai teu.

Vawitheung tha nai molam parip nai

³⁸ “ ‘Mei i vui y mei, ho i vui y ho,’ napi nanai nangchi thai bo.

³⁹ Na i py kai ly kang thui pi, khumi kamngo ai ei u reng moh; ami py nang i lamtang mang i tangbeng y ang tabeang nai ngierei ai ly makengrei mang py amteng tlam.

⁴⁰ Naibaly ami py nang ai seu iy nang i baichu la pi ai nai tau baly, nang i kanih py lo hai tlam.

⁴¹ Ami py nang ai hlaurei chei hai akhikan baly hlau nyhrei chei hawi.

⁴² Ang hnei nai keung teng y pei ly; nang teng y atiti alai ai nai ngai nai khumi ai ly hi pi vui moh.

Paleung ka-e ai tamen nai

⁴³ “Nang i saleaungchi ai tamen ly, nang i paleung ka-echi ai niu ngai moh,’ napi nanai nangchi thai bo.

⁴⁴ Na i py kai ly kang thui pi, nangchi ly nangchi i Ampo kani mang y awm nai i chanauchi lawn thai ai nai, nangchi i paleung ka-echi ai tamen u ly; nangchi ai ana nai keungchi i vui y chui so pi u: ati mana nai mo nabaly.

⁴⁵ Ngampo kani pri mang y awm nai ly khumi kamngo hawi khumi meitang i tlang tleaung y kani si hai i, khumi kahawi hawi khumi hawi y nai tlang tleaung y kani nai hai teang.

⁴⁶ Nangchi ai tamen nai keungchi ai harei tamen u khyh baly, kawn nai vang ati nga u ai mo? Akeu cheaung nai keungchi py hunai kamta so teang y a?

⁴⁷ Naibaly ngamjo ngamnau ai harei kawn nai leu thui pi khyh baly, kalangchi i sa nai tleaung y ati sa u moh?

⁴⁸ Cheng Takhrachi py hunai kamta so teang y a? Hunaibaly Ngampo kani pri mang y awm nai i hawi angym nai kamta ly hawi angym nai awm u ai nai tla.