MATTHAI 15 - Khumi Common Language Bible

Amsi pajochi i reita tanynchi

¹ Hunai thym khala y ly Jerusalem avang i dengdairei Pharisaichi hawi Reita patiu nai keungchi ly Isu teng y chei u iy,

² “Ati mana nai nang teng y abangnaichi ly miteaungchi i tanyn taphra lawh mo? Nichi ly tako cha iy py kiu asi u vai y,” napi.

³ Naibaly mymy ly nichi teng y, “Nangchi py nangchi i tanyn deaungkho y ati mana nai y Tameuh i leu pei nai ly taphra u lawh be?

⁴ Tameuh my, ‘Ngamhm ngampo ai tahm khai:’ naibaly, ‘Ami py mymy i amhm ai mo ampo ai mo pasawi nai ngierei ai ly padei takenkei ai nai tla,’ napi.’

⁵ Na i py nangchi my ly, ‘Ami py mymy i amhm teng y mo, ampo teng y mo, Kai ly nang ai sabawm ai avo nai ly Tameuh i vui y khai takhra veng bo, napi nai ngierei ly mymy i amhm ampo ai sabawm ai nai tlo y,’ na u lawh.

⁶ Hunaibaly nangchi i tanyn deaungkho y nangchi ly Tameuh i leu pei nai ai ly tama hai nai bo he.

⁷ Nangchi tapawp naichi awi, amo Isaia my nangchi i satang thui yb nai ly teng khyp nai bo; mymy ly,

⁸ ‘Hini khumichi ly nichi i labeaung y ly kai ai tahm ang khai i, Mymychi i paleung ly kai hawi palo parai veng;

⁹ nichi i reita patiu naira y ly khumichi i leu pei nai patiu lawh iy, Nichi i kai ai chiu nai ly jawmjawm teu,’ napi,” nanai pathang.

Khumi ai chai hai y nai atitichi

¹⁰ Naibaly mymy ly khumi mipuichi ai palau i nichi teng y,

¹¹ “Tangai u ly, dawn pany u; labeaung y kun nai ly khumi ai chai hai y nai ny y leang, leabeaung i nai theu nai ly huni kypkyp my khumi ai chai hai y nai ne,” napi.

¹² Hunai thym khala y abangnaichi ly chei i mymy teng y, “Pharisaichi ly huni leu thai iy paleung hawi y, nanai ly pany a? napi.

¹³ Mymy ly pathang i, “Kani pri mang i Ngaai my ui y nai keung tleirei ai ly akyn ai nai tla.

¹⁴ Nichi ai paka u reng moh; lam patei nai keung mei kamju teu. Hunaibaly mei kamju ai mei kamju my lam patei baly angawm y tla mei ai,” napi. Naibaly Petera my niteng y,

¹⁵ “Huni pata nai leu ly kaichi ai thui pi pachai kyh,” napi nai pathang.

¹⁶ Naibaly mymy ly, “Nangchi py vai khrairei pany y jojo rai nai sai a?

¹⁷ Labeaung y kun nai ngierei ly kajeu y tym i, daichi cheira y theu ryp veng, nanai pany u y nai sai a?

¹⁸ Labeaung i nai theu naichi naini paleung theung i nai theu nai ne; hunichi kypkyp my ly khumi ai chai hai y nai ne.

¹⁹ Paleung theung i nai kamngo dawn naichi, khumi ai padei naichi, pajang sa naichi, angai naichi, paviu naichi, seu rumrang naichi, thui tamawm naichi py theu:

²⁰ hunichi my ly khumi ai chai hai y naichi ne: na i py kiu asi y naimy cha nai ly khumi ai chai hai y nai ny y leang,” napi.

Neampachy leaungrei i ym nai

²¹ Naibaly Isu ly hu i dengdairei theu i, Tura hawi Sidon ka-peang y chei.

²² Naibaly khen cham, huni tengtang i dengdairei Kanan pri i neampachy leaungrei theu i, “Aw Areng, Davida i Chapo awi, kai ai pahen kyh; kai i chaniu ai vawinam my nam thleng bo,” nanai aeu bo.

²³ Na i py mymy ly sai py pathang y. Naibaly abangnaichi my ly mymy teng y chei i, “Ni ly achi i nithun y aeu ryry ly: tako hai kyh,” napi nai takeng u.

²⁴ Na i py mymy ly pathang i, “Israela cheng tama nai beramchi teng y ny y baly kai ai pato nai ny y leang,” napi.

²⁵ Na i py neampachy my ly chei iy, “Areng awi, kai ai sabawm kyh,” nanai ni ai chiu.

²⁶ Naibaly mymy ly, “Chanauchi i tako la pi iy, uichi teng y aphi lawh nai ly avo y leang,” napi nai pathang.

²⁷ Naibaly ni my ly, “Ne, Areng, na i py uichi py yhmkeung i sabawi tleaung i dengdairei tako dei beu naichi ly cha reng chy bo,” napi.

²⁸ Hunaibaly Isu my ni teng y, “Lo awi, nang i ym naira ly khri pa-rei len na ly: nangmy i ngai nai kamta khyp my nang i tlang tleaung y tym sy,” napi nai pathang. Naibaly ni i chaniu ly huni neng khypkhyp kha i dengdairei hawi ryp bo.

Isu my khumi kano neangneangchi ai hawi sa pi nai

²⁹ Naibaly Isu ly hu i dengdairei chei vui i Kalili ang ahawi y tym; naibaly mymy ly mawi y kalau iy hu y ateh bo.

³⁰ Naibaly khumi mipui ka-teng ny y nai mymy teng y chei u i, kheu kambaichi khumi kaphrachi, mei kamjuchi, leu katheu thai y naichi ai hawi, kalang neangneangchi ai py mymy teng y chei hai u iy, mymy i kheu keung y khai i, mymy ly nichi ai hawi sa bo.

³¹ Hunaibaly khumi mipuichi ly leu katheu thai y naichi leu katheu lawh nai, khumi kaphrachi hawi lawh nai, kheu kambaichi tako lawh nai, mei kamjuchi mei angvang lawh naichi ai niu u iy, khri pa-rei lyh nai Israelachi i Tameuh ai palo u bo.

Isu my khumi sang palyhreichi ai pacho nai

³² Naibaly Isu ly abangnaichi ai palau iy, “Khumi mipuichi ly vai kai teng y kani thomrei awm i, nichi ly cha ai nai ati sai py by y nai deaungkho y kai ly nichi ai khri pa-rei pahen na; biu hai naimy ly nichi ai tako hai ai nai ngai y, ti y baly nichi ly lam sala y paha u lawh na,” napi.

³³ Naibaly abangnaichi my ly, “Khumi mipui hu ji jarei cha ai nai ka-lawh tako phi ly daichi ka-vym y ly ma mang i nai nga ai mo?” napi.

³⁴ Naibaly Isu my nichi teng y, “Tako phi majirei awm u mo?” napi. Naibaly nichi my ly, “Phi saryhrei hawi ngo katheang maidenrei awm kyh,” napi.

³⁵ Naibaly mymy ly khumi mipuichi ai khaileaung y ateh ai nai leu pei.

³⁶ Naibaly mymy ly tako phi saryhrei hawi ngo ly la iy, kawn nai leu thui i, theng baw theng baw iy abangnaichi teng y pei: naibaly abangnaichi my ly khumi mipuichi teng y paji.

³⁷ Naibaly nichi bawibawi cha i kajeu kawi bawibawi; nichi i cha nai kamthom akhui nai py atlem saipa saryhrei kawi teang.

³⁸ Cha nai keungchi ly neampachychi hawi deaungdichi ai thui y naimy, neampocho ka-cheang ryry naimy sang palyhrei awm.

³⁹ Naibaly mymy ly khumi mipuichi ai amprei hai iy paleaung y atang i Makadan pri tengtang y chei bo.