MATTHAI 12 - Khumi Common Language Bible

Anawn kani kahm

¹ Hunai thym khala y Isu ly Anawn Kani y choh bai y tako prei bo; naibaly abangnaichi ly kajeu alam nai, choh vui khei amteaung i cha u bo.

² Naibaly Pharisaichi ly huna nai niu i mymy teng y, “Khen cham, nang teng y abangnaichi ly Anawn Kani y so ngau y nai sa lawh ly,” napi.

³ Naibaly mymy ly nichi teng y, “Davida hawi mymy teng y abangnaichi ly kajeu alam nai khala y atiti sa nai ly phain u y nai sai a?

⁴ Huna nai mymy ly Tameuh i yhm y kun iy mymy hawi ni teng y abangnaichi py cho ngau y nai, pathyp pi nai keungchi harei cha ngau khyh nai khai takhra nai tako cha nai leu ly?

⁵ Ti y baly Anawn Kani y achura yhm kalen pui i pathyp pi nai keungchi ly anawn Kani taphra iy py, hawi y naira abawi y, nanai nangchi ly Reita y phain u y nai sai a?

⁶ Ati py ne sy achura yhm kalen pui tleaung y len keh nai leaungrei ly hi y awm, nanai kang thui pi.

⁷ Na i py, ‘Apathyp naira ngai y naimy pahen naira kangai,’ nanai awm nai sai pany u i khyly, nangchi ly kamngo so y naichi ai parip nai ny y.

⁸ Khumi i Chapo ly Anawn Kani i Areng na a,” napi.

Kiu Makengrei dei nai khumi

⁹ Naibaly mymy ly hu i dengdairei tako i, nichi i achura yhm y kun.

¹⁰ Naibaly khen cham, kiu amkhyn nai khumi leaungrei awm. Naibaly nichi ly mymy ai seu u thai ai nai, “Anawn Kani y no naichi ai hawi sa ngau a?” nanai deng u.

¹¹ Naibaly mymy ly nichi teng y, “Nangchi theung y ami py beram harei awm sy, huni ly Anawn Kani y angawm y tlo khyly, patawn iy ami mo atheu kalau y ai nai?

¹² Beram harei tleaung y khumi leaungrei ly mana tanrei teng keh na ly! Hunai deaungkho y Anawn Kani y hawi sa ngaungau,” napi.

¹³ Hunaibaly mymy ly huni khumi teng y, “Nang i kiu pataw,” napi. Hunaibaly ni ly pataw i makengrei mang kamta hawi teang bo.

¹⁴ Hunaibaly Pharisaichi ly theu iy mymy ai padei thai ai nai sai arum u bo.

Tameuh i vawi nai miseaung

¹⁵ Naibaly Isu ly huna nai pany i, hu i dengdairei tako vui bo.

¹⁶ Naibaly khumi neangneangchi ly mymy teng y abang i, mymy ly nichi bawibawi ai hawi sa pi: naibaly mymy i satang ly den py ahei y ai nai nichi teng y leu pei.

¹⁷ Amo Isaia i thui nai kamta,

¹⁸ “Khen cham, kai i miseaung kavawi nai, Kai i ngai parai nai, kai i paleung ly mymy i tlang tleaung y khrikhri pa-rei kawn parai; mymy i tlang tleaung y kai i Phailo kadaw pi ai, Hunaibaly mymy ly Cheng Takhrachi teng y tara chih nai leu thui pi ai.

¹⁹ Mymy ly aei py aei y ai, aeu py aeu y ai, Lam y py ami py mymy i raawi thai y ai.

²⁰ Mymy ly eaung ai nai tara chih nai ly tym hai y ryrei ly, Kadi du nai satleung taphra y ai, Teicha angveaung paijei nai py padei y ai,

²¹ Naibaly Cheng Takhrachi ly mymy i amyn y athang khai ai,” nanai tym thai ai nai thui nai ne.

Isu hawi Beelzibula

²² Naibaly hunai thym khala y ly mei kamju leu katheu thai y nai, vawinam my nam nai leaungrei ai mymy teng y pahawi u i, mymy ly ni ai hawi sa pi: naibaly leu katheu thai y nai khumi ly leu katheu thai i, niu py niu thai bo.

²³ naibaly khumi mipuichi bawibawi ly khri pa-rei lyh nai, “Hini ly Davida i Chapo ny y a? napi.

²⁴ Na i py Pharisaichi ly huna nai thai iy, “Hini khumi ly vawinam areng Beelzibula ny y baly vawinamchi ai patheu nai ny y leang,” napi.

²⁵ Naibaly Isu ly nichi i dawn naichi ly pany i nichi teng y, “Mani pri y py amy tengtawi atiu nai ngierei ly tama ai; naibaly mani avang y py dengtheung py amy tengtawi atiu nai ngierei ly awm thai ai ny y.

²⁶ Naibaly Setan ly Setan ai patheu ryp baly amy tengtawi atiu ryp nai tla veng; hunaibaly mymy i peang naira ly mana awm thai ai mo?

²⁷ Naibaly kai ly Beelzibula deaungkho y vawinamchi ai patheu nai teu nabaly nangchi i chanauchi ly ami deaungkho y patheu nai mo? Hunai deaungkho y nichi ly nangmychi ai chih ai nai keungchi ne ai.

²⁸ Na i py kai ly Tameuh i Phailo deaungkho y vawinamchi ai patheu nai ne baly, Tameuh i peang nai ly nangchi teng y tym nai bo.

²⁹ Hunai ny y baly ami my khumi atho kaawm ai kawm manme y baly, atho kaawm i yhm y kun iy mymy i yhmtheaung ly mana la pi thai ai mo? Hunai bo y naini la pi thai ai ngang.

³⁰ Ami py kai mang y aso hai y nai ly kai ai tiu nai ne; ami py kai ai lo hai achu y nai ly ahei hai nai ne.

³¹ Hunai deaungkho y kang thui pi, khumichi i kamngo hawi Tameuh ai thui tamawn nai cheaungkhangra y pahen pi ai, na i py Phailo y khrairei thui tamawn nai ly pahen pi y ai.

³² Naibaly ami py Khumi i Chapo ai cheh nai ngierei ai ly pahen pi ai; na i py ami py Phailo Kachai y khrairei cheh nai ngierei ai ly vai heng nai sala y py, neng tym ai nai khala y khrairei py pahen pi y ai.

Keung hawi athai

³³ “Dengkeaung ai ly kahawi palawn u makho baly athai py kahawi palawn ai nai tla; dengkeaung ai ly hawi y nai palawn u mako baly athai py hawi y nai palawn ai nai tla; ati mana nai mo nabaly dengkeaung ly athai y amny.

³⁴ Pavui i kangpreangchi awi! Nangchi ly kamngo awm iy leu kahawi mana thui u thai ai mo? Paleung y kawi palai nai ly labeaung y thui reng.

³⁵ Khumi kahawi ly mymy i paleung i yhmtheaung kahawi i dengdairei atiti kahawi patheu reng; khumi kamngo ly mymy i paleung i yhmtheaung hawi y nai i dengdairei atiti hawi y nai patheu reng.

³⁶ Naibaly kang thui pi, ami py leu avo y nai thui rumrang nai ngierei ly huni satang ly tara chih nai kani y thui pi ai nai tla.

³⁷ Nang i leu my ly nang ai eaung hai ai i, nang i leu my ly nang ai ang pasum hai teang ai,” napi.

Rengrang ka-ma-ra hnei u nai

³⁸ Hunai thym khala y ly Reita patiu nai keungchi hawi Pharisaichi theung i phyreichi ly mymy teng y, “Sara awi, kaichi ly nang teng i dengdairei ka-ma-ra niu ai nai ngai he,” nanai pathang.

³⁹ Naibaly mymy ly nichi teng y, “kamngo parai nai hawi pajang sa ryry nai deung kangthauchi ly ka-ma-ra hau u lawh, na i py amo Jona harei ny y baly nichi teng y ka-ma-ra pipi patei ai ny y.

⁴⁰ Jona ly ngo kalen pui i kajeu theung y kani kani thomrei vum vum thomrei awm nai kamta ly, Khumi i Chapo ly khaileaung theung y kani kani thomrei vum vum thomrei awm teng ai he.

⁴¹ Ninevi avang i khumichi ly tara chih nai neng khala y ly vai deung i kangthauchi hawi vanrei angdo ai i, nichi ai sum hai ai; ati mana nai mo nabaly Jona my leu thui nai deaungkho y nichi ly uikhei u veng bo; naibaly khen cham, Jona tleaung y len keh nai ly hi y awm na a.

⁴² Tokalawi mang i samrang nu ly tara chih nai neng khala y ly vai deung i kangthauchi hawi vanrei angthau ai i, nichi ai sum hai ai; ati mana nai mo nabaly mymy ly Solomon i cheng naira tangai ai nai malawn py khuteng taki i dengdairei jeu be; naibaly khen cham, Solomon tleaung y len keh nai ly hi y awm na a.

Aso y nai vawinam vawi teang nai

⁴³ “Naibaly vawinam ly khumi i taku theung i dengdairei theu nai bo y tui by y nai meingtym y aleaung ryry i, anawn naira hau nai ngo y.

⁴⁴ Naibaly mymy ly, ‘Kai i theu nai yhm y ka-li teang khere ai,’ napi; naibaly tym kha y ka-keu pasi pan iy hawihai palum nai niu lawh.

⁴⁵ Hunaibaly chei iy mymy tleaung y kamngo keh nai vawinam takhra saryhrei hawi i, hu y kun iy awm u jo ryp; naibaly huni khumi i kangkhym i awm nai sai ly angchei i tleaung y hawi y keh bo. Hunai kamta ly vai deung i kangthau kamngo parai naichi i tlang tleaung y tym ai,” nanai pathang.

Isu i amhm hawi amnauchi

⁴⁶ Naibaly mymy ly khumi mipuichi teng y leu thui nai thym khala y ly khen cham, mymy i amhm hawi amjo amnauchi ly mymy hawi arum ai tau nai angam mang y angdo u bo.

⁴⁷ Naibaly khumi leaungrei ly mymy teng y, “Khen cham, ngamhm hawi ngamjo ngamnauchi ly nang hawi arum ai tau nai angam mang y angdo u jo na a,” napi.

⁴⁸ Na i py mymy ly thui pi nai keung teng y ly, “Kai i amhm ly ami mo? Kai i amjo amnauchi ly ami mo? napi nai pathang.

⁴⁹ Naibaly mymy ly abangnaichi ai takhi pi iy,

⁵⁰ “Khen cham, kai i amhm hawi kai i amjo amnauchi ly! Ati mana nai mo nabaly ami py kani pri mang i Ngaai i kangai sa nai ngierei ly kai i amjo amnau hawi, kai i tuicho hawi, kai i amhm py ne,” napi.