LUKA 5 - Khumi Common Language Bible

Isu my palau angchei nai abangnaichi

¹ Naibaly hina nai ne, khumi mipuichi ly Tameuh i leu tangai ai nai mymy ai i meimeaung nai khala y ni ly Kenneseret ang peang y angdo nai ne;

² naibaly ni ly ang peang y paleaung nyhrei niu, na i py ngo sarachi ly theu iy, mymychi i paleupy pasiu.

³ Hunaibaly mymy ly paleaung harei Simon i naira y atang i, ni teng y tui teng mang i dengdairei maidenrei anaw kyh ai nai hnei. Naibaly ni ly ateh iy paleung mang i dengdairei khumi mipuichi ai leu patiu.

⁴ Naibaly leu thui nai beang baly mymy ly Simon teng y, “Tui thui mang y hai u ly, ngo nga ai nai paleupy jang u,” napi.

⁵ Naibaly Simon my ni teng y, “Sara, kaichi vaivum torei jang i ati sai py ngo y; na i py nang i leu y paleupy jang bi ai mang,” nanai pathang.

⁶ Naibaly nichi jang iy ngo neangneang man i, paleupy achai pawn na;

⁷ naibaly mychi i kamkawm paleaung takhra y awm naichi ai ly mymychi ai sabawm ai nai kiu y kalawi. Naibaly nichi ly chei iy paleung nyhrei kawi pri nai, tuvi tuvi pa-rei tang u na.

⁸ Naibaly Simon Petera ly huna nai niu baly Isu i kheukhu ahawi y ambeu iy, “Areng, kai ai khai su ba, kai ly khumi kamngo he,” napi.

⁹ Ati mana nai mo nabaly mymy py mymy i ahawichi py nichi i ngo nga nai ly lyh parai na;

¹⁰ Simon i kamkawm teang Zebedai i chapo Jakob nini Johan py lyh parai teang. Naibaly Isu my Simon teng y, “Jei moh, vai hini bo y nang ly khumi ai patiu ai,” napi.

¹¹ Naibaly nichi ly mymychi i paleaung ly tui peang y ryh i, ati cheaungkhang khai jo iy mymy teng y abang u.

Isu my keaungsi man nai khumi ai hawi sa pi nai

¹² Naibaly hina nai ne, mymy ly avang harei y awm nai khala khen cham, khumi leaungrei tlang verei keaungsi man nai awm; ni my ly Isu ai niu i khaileaung y ambeu iy, “Areng, nang ly ngai baly kai ai pachai pajau,” nanai khri pa-rei takeng.

¹³ Naibaly ni my ly jaha iy nam i ni teng y, “Ngai mang, chei jau sy,” napi. Naibaly tlenrei khyh my ni i keaungsi ly chai ryp bo.

¹⁴ Naibaly mymy ly ni teng y, “Ami teng y py thui moh, na i py pathyp pi nai keung teng y akhen hai, khumichi ai pany hai ai nai py nang chai ai nai Mosi i leu pei nai kamta talam,” nanai leu pei.

¹⁵ Na i py ni i satang ly amthang tleaung y amthang ra; ni i leu tangai ai nai hawi, nichi i no hawi sa pi ai nai khumi mipui ka-teng ny y nai achu.

¹⁶ Na i py mymy ly ka-vymra y chei takhra iy chiu sa.

Isu my kamkhyn no hawi sa pi nai

¹⁷ Naibaly hina nai ne, kanirei nai ly mymy ly leu patiu i, Pharisaichi hawi Reita pany nai keungchi py ni i ahawi y ateh mang: nichi ly Kalili pri hawi Judai pri avang tleirei i dengdairei hawi, Jerusalem i dengdairei py theu nai ne; naibaly khumichi ai hawi sa pi ai nai Areng i sa thai naira ly ni teng y awm.

¹⁸ Naibaly khen cham, ira hawi verei kamkhyn no nai khumi leaungrei ai ajeaung i, mymy i mo y khai ai nai pakun naira hau u.

¹⁹ Naibaly khumi mipuichi deaungkho y kun ai naira den py ngo y nai, amphu y lyn kalau i, eukhi kheaung iy um pareaung y Isu i mo y ira hawi verei pala hai kathiu.

²⁰ Naibaly mymy ly nichi i ym nai sai niu iy ni teng y, “Deang awi, nang i kamngochi ly pahen bo mang,” napi.

²¹ Naibaly Reita patiu nai keungchi hawi, Pharisaichi my ly, “Tameuh ai thui tamawn nai ly ami kha? Tameuh my ny y baly kamngo ami pahen thai mo? nanai dawn u pasym.

²² Hunaibaly Isu my nichi i dawn pasym nai ly pany i nichi teng y, “Nangchi i paleung y ati dawn u pasym mo?

²³ ‘Nang i kamngochi ly pahen bo mang,’ nanai hawi, ‘Angthau ly, tako jau,’ napi nai ly mani thui ai nai rai y keh mo?

²⁴ Ati py ne sy khaileaung pri y ly Khumi i Chapo ly kamngo pahen ai nai aly peang naira awm, nanai nangchi pany ai nai (kamkhyn no nai teng y ly) “Angthau ly, nang i ira la iy nang i yhm y leh teu, kang napi,” napi.

²⁵ Hunaibaly nichi i mei ka-niu y ni ly angthau praw iy mymy i ira la i, Tameuh ai palo prei naimy mymy i yhm y leh bo.

²⁶ Naibaly nichi bawibawi lyh parai nai Tameuh ai palo i, “Vaini ly khrikhri pa-rei rengrang tlai nai achi niu bo,” na u i, nichi khrikhri pa-rei jei.

Isu my Levi ai palau nai

²⁷ Naibaly mymy ly hunai pajau khala y theu i, akeu cheaung nai meingtym y akeu cheaung nai khumi leaungrei amyn Levi ai ateh nai niu; naibaly mymy ly ni teng y, “Kai teng y abang,” napi.

²⁸ Hunaibaly ni ly ati cheaungkhang khai jo iy angthau i abang bo.

²⁹ Naibaly Levi ly yhm y Isu i vui pawi len parai nai sa; hunaibaly akeu cheaung nai keung neangneangchi hawi, khumi takhrachi py nichi hawi biu vanrei o u.

³⁰ Naibaly Pharisaichi hawi, nichi i Reita patiu nai keungchi ly abangnaichi i tlang tleaung y jo sei i, “Ati mana nai nangchi ly akeu cheaung nai keungchi hawi, kamngochi teng y nei cha lawh mo?” napi.

³¹ Naibaly Isu my nichi teng y, “No by y nai khumichi ly daitang aly ngai y, no awm naichi naini aly ngai nai teu.

³² Khumi kahawichi ai uikhei hai ai nai kang jeu nai ny y leang, khumi kamngochi ai uikhei hai ai nai kang jeu nai teu,” napi.

Biu hai nai kahm

³³ Naibaly nichi my ni teng y, “Johan teng y abangnaichi ly biu hai reng, chiu py sa; Pharisaichi teng y abangnaichi py hunai kamta sa teang; na i py nang teng y abangnaichi ly nei cha lawh,” napi.

³⁴ Naibaly Isu my nichi teng y, “Aju palyn nai keung i ahawichi ai ly aju palyn nai keung nichi teng y awm jo nai sala ryrei ly biu hai hai thai a?

³⁵ Na i py aju palyn nai keung ai nichi teng i dengdairei la vui nai kani tym ai i, huna nai kani y ly biu hai ai,” napi.

³⁶ Naibaly mymy ly nichi teng y pata nai leu py thui pi i, “Ami py kanih kangtha sei iy kanih kangngym y bau vai y; bau teu i py kangtha py asei ai i, kangtha sei ly kangngym hawi aly y ai.

³⁷ Naibaly ami py kriep athai hang kangtha ly mawipeih adym kangngym y tleng vai y; ti y baly kreip athai hang kangtha my ly mawipeih adym ai ly apeu hai iy beu ai, mawipeih adym py phra teang ai.

³⁸ Na i py kreip athai hang kangtha ly mawipeih adym kangtha y tleng ai nai tla.

³⁹ Naibaly ami py kreip athai hang kam-i nei nai bo y kangtha ly ngai vai y leang: ‘Kam-i nai hawi keh,’ napi veng,” napi.