LUKA 3 - Khumi Common Language Bible

Baptis sa nai Johan i leu thui nai

¹ Naibaly Tiberia Kaisara i peang nai saneng holai pangrei saneng y, (Pontia Pilata ly Judai pri i aripeng py ne, Heroda ly Kalili pri i areng py ne, ni i amnau Philipa ly Iturea hawi Trakoniti pri i areng py ne, Lusania ly Abilini pri i areng py ne,

² Anna nini Kaiapha ly pathyp pi nai keung kalen keh nai py ne i,) daichi ka-vym y Zakaria i chapo Johan teng y ly Tameuh i leu tym.

³ Naibaly mymy ly Jordan tavo peang meingtym tleirei y chei iy, kamngo pahen naira nga ai nai uikhei nai baptisma leu thui prei;

⁴ amo Isaia i leu cha-iu y tajiu nai kamta, “Daichi ka-vym y aeu nai raawi ly, Areng i lamlen so u rym ly, Mymy i lam cheaungkhang pataw u.

⁵ Mawi kathiu kacheaung padeng padyh pawn ai, Mawi ka-sang tleirei hawi aheung tleirei py panem teang ai: Akawi naira py pataw ai i, Lam adyh y naichi py padyh ai,

⁶ Khumi bawibawichi my py Tameuh i paheng naira niu ai,’ napi,” nanai ne.

⁷ Hunaibaly ni ly baptisma nga ai nai mymy khi y theu nai khumi mipuichi teng y ly, ‘Pavui i kangpreangchi awi, kado theu naira ang tym nai ly preang veng ai nai ami my ang pachei mo?

⁸ Hunaibaly uikhei nai amyn ataing ai nai athai u; ‘Abraham ly kaichi i amsi sangum na a,’ nanai paleung theung y adawn u moh: Tameuh my hini lengseaungchi ai ly Abraham i kangpreang y angdo hai thai na a, kang napi.

⁹ Vai py dengkeaung pakeung tleirei y atiu khai yb bo; hunaibaly dengkeaung tleirei athai kahawi athai y nai ngierei ly paliu iy mai y aphi nai ne,” napi.

¹⁰ Naibaly mipuichi my ly ni teng y, “Kaichi mana sa ai mo?” nanai deng.

¹¹ Mymy ly nichi teng y, “Ami py baichu nyhrei awm nai ly by y nai khumi teng y pei sy; ami py cha ai nai awm nai ly huna nai kamta so teang sy,” nanai pathang.

¹² Akeu cheaung nai khumichi py baptisma nga ai nai jeu i mymy teng y, “Sara, kaichi mana sa ai mo?” napi.

¹³ Mymy ly nichi teng y, “Pei nai bo y rawn takeng u moh,” napi.

¹⁴ Naibaly tavaimichi ly mymy teng y, “Kaichi py mana sa ai mo?” napi. Mymy ly nichi teng y, “Ami ai py ano moh, seu py seu rumrang moh; nangmychi i nga nai jirei kawn u,” napi.

¹⁵ Naibaly khumichi my athang khai iy khumi bawibawi my Johan i satang ly mychi i paleung theung y Krista ne lawh mo? nanai adawn u nai thym khala y ly, Johan my pathang i nichi bawibawi teng y,

¹⁶ “Kai ly nangchi ai tui hawi baptis kang sa nai teu; na i py kai tleaung y len keh nai leaungrei ang jeu ai, kai ly ni i phainai vui su ai nai py ataing y leang: ni my ly Phailo Kachai hawi mai hawi baptis ang sa pi ai mang.

¹⁷ Mymy i ho nai meingtym pachai pan ai nai hawi, mymy i cho ly chenghi y adyh ai nai py mymy i paho ly kiu y awm; choh ali naini padei pajau y nai mai y leng ai,” napi.

¹⁸ Naibaly mymy ly pacheang nai leu sai takhra neangneang hawi khumichi teng y Satang Kahawi ang thui pi;

¹⁹ na i py Areng Heroda ly amnau i aju Herodi i tlang tleaung y hawi mymy i atiti hawi y sa nai bawibawira y py Johan my preng nai deaungkho y,

²⁰ mymy i atiti sa nai bawibawi panawira nai ni ai ly theaung y paeung.

Isu i baptisma nga nai

²¹ Naibaly hina nai ne, khumi bawibawichi baptisma nga nai bo y Isu py baptisma nga iy chiu sa; naibaly kani am-eaung iy Phailo Kachai ly tlang awm naimy buhu ka-tawm ang kathiu iy, mymy i tlang tleaung y chym;

²² naibaly kani pri mang i dengdairei raawi ly, “Nang ly kai i Chapo ngai parai nai ne; kai ly nang i tlang tleaung y khrikhri pa-rei kakawn parai,” napi.

Isu i angpreng nai keungchi

²³ Naibaly Isu ly patiu angchei khala saneng phairei mo awm bo, ni ly amichi i dawn naira y Josepha i chapo ne, huni ly Heli i chapo ne,

²⁴ huni ly Matthata i chapo ne, huni ly Levi i chapo ne, huni ly Melki i chapo ne, huni ly Jannai i chapo ne,

²⁵ huni ly Josepha i chapo ne, huni ly Matathi i chapo ne, huni ly Amosa i chapo ne, huni ly Nahum i chapo ne,

²⁶ huni ly Esli i chapo ne, huni ly Nakai i chapo ne, huni ly Maatha i chapo ne, huni ly matathi i chapo ne, huni ly Semein i chapo ne, huni ly Josepha i chapo ne, huni ly Joda i chapo ne,

²⁷ huni ly Joanan i chapo ne, huni ly Rhisa i chapo ne, huni ly Zerubabela i chapo ne, huni ly Salathiela i chapo ne,

²⁸ huni ly Neri i chapo ne, huni ly Melki i chapo ne, huni ly Addi i chapo ne, huni ly kosan i chapo ne, huni ly Elmadam i chapo ne,

²⁹ huni ly Era i chapo ne, huni ly Isu i chapo ne, huni ly Eliezera i chapo ne, huni ly Jorim i chapo ne, huni ly Maththata i chapo ne, huni ly Levi i chapo ne,

³⁰ huni ly Simeon i chapo ne, huni ly Juda i chapo ne, huni ly Josepha i chapo ne, huni ly Jonam i chapo ne, huni ly Eliakim i chapo ne,

³¹ huni ly Melea i chapo ne, huni ly Menna i chapo ne, huni ly Matatha i chapo ne, huni ly Nathan i chapo ne,

³² huni ly Davida i chapo ne, huni ly Jessai i chapo ne, huni ly Obeda i chapo ne, huni ly Boaza i chapo ne, huni ly Salmon i chapo ne, huni ly Nashon i chapo ne,

³³ huni ly Aminadaba i chapo ne, huni ly Arni i chapo ne, huni ly Esron i chapo ne, huni ly Pharesa i chapo ne,

³⁴ huni ly Juda i chapo ne, huni ly Jakob i chapo ne, huni ly Isaka i chapo ne, huni ly Abraham i chapo ne, huni ly Terah i chapo ne,

³⁵ huni ly Nahora i chapo ne, huni ly Seruka i chapo ne, huni ly Reu i chapo ne, huni ly Pelek i chapo ne, huni ly Eber i chapo ne,

³⁶ huni ly Selah i chapo ne, huni ly Kainan i chapo ne, huni ly Arphaksada i chapo ne, huni ly Sema i chapo ne, huni ly Nova i chapo ne, huni ly Lameka i chapo ne, huni ly Methusela i chapo ne,

³⁷ Huni ly Enoka i chapo ne, huni ly Jareda i chapo ne, huni ly Mahalalela i chapo ne,

³⁸ huni ly Kainan i chapo ne, huni ly Enosh i chapo ne, huni ly Setha i chapo ne, huni ly Adam i chapo ne, huni ly Tameuh i chapo ne.