LUKA 11 - Khumi Common Language Bible

Isu my chiu sa nai patiu pi nai

¹ Naibaly hina nai awm, mymy ly mani meingtym y mo chiu sa i, chiu sa pajau kha y abangnaichi theung y leaungrei my ni teng y, “Areng, Johan i mymy teng y abangnaichi ai chiu sa nai reita patiu nai kamta, kaichi ai py patiu teang kyh,” napi.

² Naibaly ni my ly mymychi teng y, “Nangchi chiu sa khala ly hina nai thui u; Ngaai, nangmy amyn tahm khai nai awm sy; nangmy i peang nai tym sy.

³ Kaichi i kani tleirei cha ai nai ly pei ba.

⁴ Kaichi i kamngo pahen kyh ba, ati mana nai mo nabaly kaichi py kaichi i atiti kalai bawibawi pahen nai ne. Parawi naira y pahawi moh ba,” napi.

⁵ Naibaly Isu my nichi teng y, “Nangchi theung y ami mo ahawi awm sy, aneng hyh y mymy teng y chei iy,

⁶ ‘Nai awi, tako phi thomrei piu pei kyh; kai i ahawi khuleaung chei nai kai i yhm y anga i, ni ai pacho ai nai kai ati sai py by y,’ ti khyly, yhm theung i khumi my,

⁷ ‘Khru khra hai reng moh; vai ly katheu py kho pawn bo i, kai i chanauchi py i pawn bo; angthau iy kang pei thai y leang bo,’ nanai ang pathang ai.

⁸ Kang thui pi, ahawi ne nai deaungkho y pei ai nai angthau y i py, hnei ryry nai deaungkho y angthau iy, ni i ngai nai jirei ang pei ai.

⁹ Hunai deaungkho y nangchi teng y kang napi, Hnei u, naibaly pei ai; hau u, naibaly niu ai; takhei u, naibaly ang paeaung pi ai.

¹⁰ Ami py hnei nai ngierei ly nga ai; ami py hau baly niu ai; ami py takhei baly ang paeaung pi ai.

¹¹ Nangchi theung y ampo awm nai ngierei ly mymy i chapo my tako phi hnei khyly, lengseaung pei lawh na a? Ti y baly ngo hnei khyly ngo i vui y pavui pei lawh na a?

¹² Ti y baly akadui hnei khyly kani taai pei lawh na a?

¹³ Hunaibaly nangchi khumi kamngo malawn py chanauchi teng y atiti kahawi pei ai nai sai pany baly, kani pri mang i Ngampo ly hnei nai keungchi teng y ly Phailo Kachai mana tanrei ang pei ai mo?” napi.

Isu hawi Beelzibula

¹⁴ Naibaly mymy ly vawinam leu katheu thai y nai harei ai patheu i, hina nai awm: vawinam theu veng nai bo y ly leu katheu thai y nai khumi ly leu katheu thai bo; hunaibaly khumi mipuichi ly lyh parai.

¹⁵ Na i py phyreichi my ly, “Vawinam areng Beelzibula deaungkho y na a, vawinamchi ai patheu rengnai ly,” napi.

¹⁶ Naibaly phyreichi my ly mymy ai cham ai nai kani pri mang i nai atiti ka-ma-ra hnei.

¹⁷ Na i py ni my ly mymychi i dawn naichi pany i mymychi teng y, “Mani pri y py amy tengtawi atiu nai ngierei ly tama ai; dengtheung py amy tengtawi atiu nai ngierei ly phra ai.

¹⁸ Setan py amy tengtawi atiu baly ni i peang nai ly mana awm thai ai mo? Nangchi ly ‘Beelzibula deaungkho y na a vawinam ai patheu reng,’ napi nai y.

¹⁹ Naibaly kai ly Beelzibula deaungkho y vawinamchi ai patheu nai teu nabaly, nangchi i chanauchi ly ami deaungkho y patheu nai mo? Hunai deaungkho y nichi ly nangchi ai chih ai nai keungchi ne ai.

²⁰ Na i py kai ly Tameuh i kiu pajeung deaungkho y vawinamchi ai patheu nai ne baly, Tameuh i peang nai ly nangchi teng y tym nai bo.

²¹ “Khumi atho kaawm my ly mymy i yhm kry nai sala y ly mymy i vawn ly chymme naimy awm;

²² na i py mymy tleaung y atho awm keh nai my ly jeu iy pajau nai kha ly, mymy i aeng nai tavai ateaung kangym lawm pi veng iy, mymy i vawn ly la pi i paji phro veng.

²³ Ami py kai mang y aso hai y nai ly kai ai tiu nai ne; ami py kai ai lo hai achu y nai ly ahei hai nai ne.

Aso y nai vawinam vawi ali teang nai

²⁴ “Vawinam ly khumi taku theung i dengdairei theu nai bo y anawnra hau nai tui by y nai meingtym y aleaung ryry; naibaly pipi ngo y i, ‘Kai i theu nai yhm y ka-li teang khere ai,’ napi.

²⁵ Naibaly tym kha y ly pasi pan iy hawihai palum nai niu lawh.

²⁶ Hunaibaly chei iy mymy tleaung y kamngo keh nai vawinam takhra saryhrei hawi i, hu y kun iy awm u jo ryp; naibaly huni khumi i kangkhym i awm nai sai ly angchei i tleaung y hawi y keh bo,” napi.

Taham hawi nai tatang

²⁷ Naibaly hina nai ne, mymy ly huni leu thui nai thym kha y, khumi mipui theung i neampachy ami mo aeu i ni teng y, “Nang ai aneng nai kajeu hawi, nang i nei nai kanu py taham hawi,” napi.

²⁸ Na i py ni my ly, “Ne, na i py Tameuh i leu thai iy patawm naichi ly taham hawi keh,” napi.

²⁹ Naibaly khumi mipuichi ly ni teng y awm achu khala y mymy ly, “Vai deung kangthauchi ly deung kangthau kamngo ne i, ka-ma-ra hau u lawh; na i py Jona i tlang tleaung i ka-ma-ra harei ny y baly ka-ma-ra ha py pei ai ny y.

³⁰ Jona ly Ninevi avang khumichi i vui ka-ma-ra lawn nai kamta ly, Khumi i Chapo py vai deung kangthauchi i vui ka-ma-ra ne ai.

³¹ Tokalawi mang i samrang nu ly tara chih nai neng khala y ly vai deung i kangthauchi hawi vanrei angdo ai i, nichi ai sum hai ai; ati mana nai mo nabaly mymy ly Solomon i cheng naira tangai ai nai malawn py khuteng taki i dengdairei jeu be; naibaly khen cham, Solomon tleaung y len keh nai ly hi y awm na a.

³² Ninevi avang i khumichi ly tara chih nai neng khala y ly vai deung i kangthauchi hawi vanrei angdo i, nichi ai sum hai ai; ati mana nai mo nabaly Jona my leu thui nai deaungkho y nichi ly uikhei u veng bo; naibaly khen cham, Jona tleaung y len keh nai ly hi y awm na a.

Tlang i kangvang

³³ “Ami py maisi thawn iy ka-deng ra y mo, teaung anui y mo khai vai y leang; kun nai khumichi ly kangvang niu thai ai nai khai reng naira y khai khyh.

³⁴ Nang i tlang i maisi ly mei ne; nang i mei pachym baly, nang i tlang py bom vanrei angvang, na i py chai y baly nang i tlang py kaveng kawi bebe bo.

³⁵ Hunaibaly nang theung y awm nai kangvang ly kaveng ne lawh na, nanai amkym u.

³⁶ Hunaibaly nang i tlang ly manira y py veng y naimy, tlang bom verei angvang bawibawi baly, maisi kangvang ka-teng ny y angvang hai nai kamta ly angvang bebe ai,” napi.

Isu my Pharisai hawi Reita patiu naichi ai pasum nai

³⁷ Naibaly mymy ly leu thui nai thym khala y Pharisai leaungrei my ni ai biu heang i, mymy ly kun iy biu o.

³⁸ Naibaly mymy ly kiu asi y naimy biu o nai ly Pharisai my niu i rengrang tlai ly, napi.

³⁹ Naibaly Areng my ni teng y, “Nangchi Pharisaichi ly khau hawi saibi ly salo mang paju veng; na i py nangchi i paleung y ly cha parawp ai nai hawi, kamngo nai kawi veng.

⁴⁰ Vang y naichi awi, salo mang sa nai keung my ly theung mang y so y a?

⁴¹ Na i py theung y atiti awm nai ly khumi ngarichi teng y pei ai nai vui teaung u; hunaibaly khen cham, nangchi i vui ati cheaungkhang chai nai bo.

⁴² “Nangchi Pharisaichi awi nangchi ly taham si! Nangchi ly seaungsyn hawi seaungken hawi amti amjang cheaungkhangchi ly horei y harei pei reng; hawi naira hawi, Tameuh i tamen naira ly dawn katlen vui veng; na i py huni na a nangchi i sa ai nai avo nai ly, takhrachi py khai su y naimy.

⁴³ Nangchi Pharisaichi awi, nangchi ly taham si! Achura yhm y tahm asang keh nai atehra hawi, seng meingtym y chiu nai py nangchi ngai keh lawh nai y.

⁴⁴ Nangchi ly taham si! Up naira amyn y nai, salo mang y khumichi aleaung nai atawm nangchi ly!” napi.

⁴⁵ Naibaly Reita pany nai keung leaungrei my ni teng y, “Sara awi, nang i hini leu thui nai ly kaichi ai py jo nai na a hi ly,” nanai pathang.

⁴⁶ Naibaly ni my ly, “Nangchi Reita pany nai keungchi awi, nangchi py taham si! Atiti myn kaji bym parai pa-rei khumichi ai pho hai iy, nangmychi my ly kiu pajeung harei py nam vai y.

⁴⁷ Nangchi ly tahm si! Nangchi ly amochi i tapreaung sa u lawh, nichi ai ly amsichi my padei.

⁴⁸ Hunaibaly amsichi i atiti sa nai ly nangchi my pany hai iy asa hai; nichi my ly padei iy, nangchi my ly tapreaung sa.

⁴⁹ Hunai deaungkho y Tameuh i chengra my py ‘Nichi teng y amochi hawi amtaw thau naichi ai kapato ai i, phyreichi ai ly padei ai, phyreichi ai ly ana ai;

⁵⁰ hunaibaly Abela i thi dengdairei maicham hawi meingtym kachai sala y dei nai Zakari i thi khrairei,

⁵¹ amo bawibawi i thi khaileaung palum angchei nai dengdairei theu nai ly, vai deung kangthauchi i tlang tleaung y vawitheung tha pajau ai, nanai ly; ne, kang thui pi, vai deung kangthauchi i tlang tleaung y vawitheung tha ai.

⁵² Nangchi Reita pany nai keungchi awi, nangchi ly taham si! Cheng naira saw ly nangchi my la vui iy, nangmychi py kun y pasi lawh i, kun ai naichi ai py kam veng lawh,” napi.

⁵³ Naibaly hu i nai theu baly Reita patiu nai keungchi hawi, Pharisaichi my ly mymy ai preng meimeaung i leu cheaungkhang thui hai akikan;

⁵⁴ leu thui tamang naira y patiu ai tau nai amo jojo.