Levi 14 - Khumi Common Language Bible

Nganpeih no hawi nai bo y kachai sa nai

¹ Areng my Mosi teng y,

² nganpeih no hawi naichi i vui reita leaungsai y apachai ai nai khai pi nai reita ne. Huni khumi ai chai bo napi ai nai kani y, pathyp pi nai keung teng y chei hai ai nai tla.

³ Pathyp pi nai keung my ly ni ai tai naira angam mang y patheu iy, khen pi ai nai tla. Ni i no-na hawi bo na baly,

⁴ pathyp pi nai keung ly reita y tavo kachai bomrei, saitleang keung, kalang kamleng, hussop kateangchi jeu hai ai nai tla.

⁵ Naibaly tui kachai khai yb nai alai laawmra y, tavo harei padei hai ai nai tla.

⁶ Pathyp pi nai keung ly saitleang keung, kalang kamleng, hussop kateang hawi vanrei tavo kangheng ai kadeng yb nai tavo thira y, pani ai nai tla.

⁷ Naibaly ni ly nganpeih no hawi chum nai khumi ai thi hawi tlen saryhrei katheng iy, chai bo, nanai thai hai ai nai tla. Tavo kangheng ai ly daichi mang y patleaung hai ai nai tla.

⁸ No hawi nai khumi ly my i ateaungchi pasiu iy, mui ngiereichi avau chum baly tui ahiu ai nai tla. Naibaly ni ly reita leaungsai y chai nai deaungkho y, tai naira theung y kun teang pajau bo. Na i py mymy i tai angam mang y kani saryhrei awm ai nai tla.

⁹ Saryhrei kani y ni ly sam py, labeaung mui py, mei akhym mui py, tlang tleaung i mui ngierei py vau pyn bi iy, ateaungchi pasiu pyn chum baly tui ahiu pan ai nai tla; naibaly ni ly reita leaungsai y chai ai.

¹⁰ Kani tajarei kani y ni ly no-na by y iy sanengrei awm nai beram kataichy nyhrei, beram nuchy harei, olive asitui hawi katlen nai tako dei sie tariurei hawi, olive asitui palang ka-hyhrei syn ai nai tla.

¹¹ Pathyp pi nai keung ly huni khumi hawi ni i syn nai katalamrachi py, Areng i awmra Tabynako katheu pa-kho mang y chei hai ai nai tla.

¹² Naibaly pathyp pi nai keung ly beram kataichy harei hawi olive asitui palang ka-hyhrei ai, kamngo pajengra lawi nai katalamra talam ai nai tla. Huni kapathypra ai pathyp pi nai keung i vui Areng teng y talam patyp ai nai tla.

¹³ Ni ly kamngo pajengra lawi nai katalamra tawnbawi hawi, leng patlum nai katalamra tawnbawichi tleh reng nai meingtym kachaira y beram tleh ai nai tla. Kamngo pajengra lawi nai katalamra tawnbawi ly kamngo pahen nai katalamra tawnbawi kamta, pathyp pi nai keung i vui ne. Huni tawnbawi ly khri pa-rei chai nai ne.

¹⁴ Pathyp pi nai keung ly kachai sa nai khumi i lamtang kano sampum, lamtang kiupui hawi lamtang mang kheupuira y beram thi tabei ai nai tla.

¹⁵ Naibaly pathyp pi nai keung ly mymy i langvawi kiupadawira y olive asitui maidenrei paleaung iy,

¹⁶ lamtang kiupajeung hawi asitui y tapo plei iy Areng i mo y tlen saryhrei katheng ai nai tla.

¹⁷ Naibaly ni ly reita leaungsai y kachai sa nai khumi i lamtang kano sampum, lamtang kiupui, lamtang kheupuichira y kiu padawira i asituichi hawi tabei ai nai tla.

¹⁸ Kiupadawira awm rai nai asitui hawi, huni khumi i lu y tamui pi ai nai tla. Hina nai reita hawi ni ly kachai sa nai ne.

¹⁹ Naibaly pathyp pi nai keung ly kamngo pahen nai kapathypra talam iy, reita y kachai sa ai nai tla. Huni bo y ni ly bomverei leng patlum nai kapathypra tawnbawi tleh iy,

²⁰ teicha teinei katalamra hawi vanrei, maicham tleaung y leng patlum ai nai tla. Huna nai kamta pathyp pi nai keung my kachai sa chum baly, no hawi nai khumi ly reita y chai naira nga ai.

²¹ Ni ly khumi kamawn nai y, huni katalamrachi hawi kamngo pajengra lawi nai kapathypra talam pajau y lawh baly, beram kataichy harei naini syn ai nai tla. Huni kapathypra ly pathyp pi nai keung i vui Areng teng y talam patyp nai ne. Ni ly teicha teinei katalamra i vui olive asitui hawi katlen nai tako dei sie thomrei py, olive asitui palang ka-hyhrei py syn ai nai tla.

²² Kamngo pahen nai kapathypra hawi, leng patlum nai kapathypra i vui y, ha harei talam akyhkyh ai nai ly amprym buhu bomrei, yhm buhu bomrei syn ai nai tla.

²³ Kachai sa ai nai khumi ly tajarei kani y huni katalamrachi ai Tabynako katheu pa-khora y pathyp pi nai keung teng y syn pi ai nai tla.

²⁴ Pathyp pi nai keung ly beram cho hawi olive asitui la iy, pathyp pi nai keung i vui Areng teng y talam patyp ai nai tla.

²⁵ Ni ly beram tleh iy thi maidenrei hawi, huni khumi i lamtang kano sangpum, lamtang kiupui hawi lamtang kheupuira y tabei ai nai tla.

²⁶ Naibaly pathyp pi nai keung ly my i langvawi kiu padawira i asitui maidenrei paleaung iy,

²⁷ lamtang kiupajeung hawi asituira tapo plei iy, Areng i mo y tlen saryhrei katheng ai nai tla.

²⁸ Naibaly ni ly thi tabei yb nai lamtang kano sampum, lamtang kiupui hawi lamtang kheupuira y asitui maidenrei pajui ai nai tla.

²⁹ Ni ly langvawi kiupadawira i awm rai nai asitui hawi, huni khumi i lu y tamui pi ai nai tla; huna nai kamta reita y kachai sa pi ai nai tla.

³⁰ Naibaly pathyp pi nai keung ly yhm buhu harei, ti y baly amprym buhu harei ai,

³¹ kamngo pahen nai kapathypra i vui py, takhra harei ly leng patlum nai kapathypra i vui py, teicha teinei katalamra hawi vanrei, Areng teng y talam ai nai tla. Huna nai kamta pathyp pi nai keung ly reita y kachai sa pi ai nai tla.

³² Hini reita ly nganpeih no man nai khumi kamawn i vui teaung ai nai kachai sa nai reita ne.

Yhmchira y yhmsavi chawp nai

³³ Areng ly Mosi nini Aron teng y,

^34-35 yhmchira y yhmsavi chawp nai molam reitachi pei pi nai ne. (Hini reita ly Israela khumichi ai amtym ai nai Areng my pei nai kanan pri y tym nai bo y teaung ai nai reitachi ne.) Nangchi theung i amimi py my i yhm y yhmsavi chawp nai niu baly, pathyp pi nai keung teng y thui pi ai nai tla.

³⁶ Pathyp pi nai keung ly huni yhm y chei iy khen y rai khala, yhm i vawnsaichi patheu pawn ai na tla, ti y baly yhm theung i vawnsai ngierei chai y, nanai thai hai ai nai tla. Naibaly ni ly yhm theung y kun iy,

³⁷ yhmsavi chawp nai khen pi ai nai tla. Huni yhm angpangra heng-up-au nai, ti y baly pasen heaung nai yhmsavi mo chawp iy sadyn lawp nai niu baly,

³⁸ ni ly yhm paneaung su iy, kani saryhrei katheu atleang cheng ai nai tla.

³⁹ Ni ly saryh kani huni yhm y chei iy khen pi bi ai nai tla. Pathyp pi nai keung ly yhmsavi chawp nai nawi ra nai niu lawh baly,

⁴⁰ yhmsavi chawp nai lengseaungchi la pawn iy, mary angam mang i anyn angso aphi nai meingtym y aphi ai nai tla.

⁴¹ Huni bo y yhm angtheung angpangchira i angkadengchi kheaung hai pawn iy mary angam mang i anyn angso aphi naira y aphi ai nai tla.

⁴² Naibaly la pawn nai lengseaungchira y takhra lengseaungchi theng teang iy, angpangchira angkadeng kangtha pajui teang ai nai tla.

⁴³ Huni yhm i lengseaungchi kheaung iy angpangchi hi nai, angkadeng kangthachi pajui bi nai bo y, yhmsavi chawp taleang bi lawh baly,

⁴⁴ pathyp pi nai keung ly huni yhm y chei iy, khen pi bi ai nai tla. Huni yhm ly yhmsavi chawp nai ty ra nai niu lawh baly, huni yhm ly chai y nai ne.

⁴⁵ Huni yhm ly aphrei vui iy lengseaungchi, pjengchi, angkadengchi ai mary apai ngam mang i anyn angso aphi naira y tawn pan ai nai tla.

⁴⁶ Huni yhm atleang cheng nai sala, yhm theung y kun nai khumi ly dym mang y khrairei chai y nai ne.

⁴⁷ Huni yhm theung y i nai, ti y baly cha nei nai khumi py, mymy i ateaungchi pasiu pan ai nai tla.

⁴⁸ Yhm y angkadeng kangtha pajui palai bi nai bo y, pathyp pi nai keung ly chei iy khen pi nai khala y, yhmsavi chawp bi y nai niu baly, yhmsavi chawp ali bi y nai deaungkho y, huni yhm ly reita y chai bo, nanai thai hai ai nai tla.

⁴⁹ Ni ly huni yhm i vui kachai sa ai nai, tavo bomrei, saitleang keung, kalang kamleng hawi hussop kateangchi syn ai nai tla.

⁵⁰ Ni ly tui kachai kadeng yb nai alai laawm salo y, tavo harei padei ai nai tla.

⁵¹ Naibaly saitleang keung, hussop kateang, kalang kamleng hawi vanrei tavo kangheng ai kadeng yb nai tavo thira y panih iy yhm ai tlen saryhrei katheng ai nai tla.

⁵² Hina nai kamta ni ly tavo thi, tui kachai, tavo kangheng, saitleang keung, hussop kateang, kalang kamlengchi teaung iy yhm i vui kachai sa ai nai tla.

⁵³ Naibaly tavo kangheng ai ly mary angam i daichi mang y patleaung ai nai tla. Huna nai kamta, ni ly yhm i vui reita leaungsai y kachai sa pi nai deaungkho y, huni yhm ly reita y kachai lawm bo.

⁵⁴ Hini reitachi ly ka-jei awm nai nganpeih nochi,

^55-56 nganpeihra man nai ang vawi nochi, uisaluchi, ti y baly taposa nai no, ateaungchira kani-ei chawp nai hawi yhmchira yhmsavi chawp nai i vui khai pi nai reitachi ne.

⁵⁷ Hini reitachi ly chai nai hawi chai y nai i vui pany pajau nai reitachi ne.