Levi 12 - Khumi Common Language Bible

Deaungdi tapen nai bo y neampachychi ai kachai sa nai reita

¹ Areng my Mosi teng y, Israela khumichi teaung ai nai hini reitachi pei pi nai ne.

² Neampachy ly tlangchai awm nai thym khala i chai y nai kamta, deaungdi neampacho tapen nai bo y kani saryhrei sala ly reita y chai y nai ne.

³ Kani tajarei kani y deaungdi ai ly lengkhym takip ai nai tla.

⁴ Amhm ly huni bo kani phai palyh thomrei sala reita y chai y nai deaungkho y, thi kachai tym teang y ryrei ly atiti kachaichi nam ngau y, Tabynako theung y kun ngau y.

⁵ Naibaly neampachy deaungdi tapen lawh baly, tlangchai awm nai thym khala i chai y nai kamta, chaniu tapen nai bo y kani holai palyhrei sala ly reita y chai y nai ne. Amhm ly thi kachai tym teang y ryrei ly kani vui tariu saryh tariurei, reita y chai y nai ne.

⁶ Amhm ly chapo tapen nai py ne sy, chaniu tapen nai py ne sy, thi chai y nai neng tym nai khala, leng patlum nai kapathypra talam ai nai sanengrei awm nai beramcho harei hawi, kamngo pahen nai kapathypra talam ai nai yhm buhu, ti y baly amprym buhu harei ai, Areng i awmra Tabynako katheu pa-khora y syn iy, pathyp pi nai keung teng y au ai nai tla.

⁷ Pathyp pi nai keung ly huni kapathyprachi Areng teng y talam iy, amhm i vui kachai sa pi nai deaungkho y, reita y chai ai. Hini reita ly chanau tapen pajau nai bo y neampachychi i sa ai nai reitachi ne.

⁸ Amhm ly beram cho hawi apathyp pajau y lawh baly, yhm buhu bomrei, ti y baly amprym buhu bomrei syn ai nai tla. Harei nai ly leng patlum nai talam ai nai i vui, vai harei nai ly kamngo pahen nai talam ai nai i vui ne. Pathyp pi nai keung ly amhm i vui kachai sa pi nai deaungkho y, amhm ly reita y chai ai.